ឧត្តមសេនីយ៍ទោ ហួត សុធី ចុះសួរសុខទុក្ខ លោកវរសេនីយ៍ទោ សត្យា រ៉ូម៉េអ៊ូ កំពុងសម្រាកព្យាបាលជំងឺ បន្ទាប់ពីជួបគ្រោះថ្នាក់ចរាចរណ៍ក្នុងពេលបំពេញបេសកកម្ម
ភ្នំពេញ៖ លោកឧត្តមសេនីយ៍ទោ ហួត សុធី ស្នងការនគរបាលខេត្តឧត្តរមានជ័យ អមដំណើរដោយ លោកអធិការ-អធិការរងក្រុងសំរោង នាព្រឹកថ្ងៃទី១៨ ខែមេសា ឆ្នាំ២០២៣ បានអញ្ជើញចុះទៅជួបសំណេះសំណាល សួរសុខទុក្ខ លោកវរសេនីយ៍ទោ សត្យា រ៉ូម៉េអ៊ូ អធិការរង ទទួលផែនការងារនគរបាលយុត្តិធម៌ នៃអធិការដ្ឋាននគរបាលក្រុងសំរោង ដែលកំពុងតែសម្រាកព្យាបាលជំងឺ នៅឃ្លីនិកឯកជន (មន្ទីរសម្រាកព្យាបាល ហួត សុគន្ធ) ខេត្តបាត់ដំបង បន្ទាប់ពី លោកបានជួបឧបទ្ទវហេតុគ្រោះថ្នាក់ចរាចរណ៍ កាលពីយប់ថ្ងៃទី១១ ខែមេសា ឆ្នាំ២០២៣ វេលាម៉ោងប្រហែល ២១:៣០នាទី ខណៈពេលដែលលោកកំពុងចុះចេញល្បាត និងតាមបង្ក្រាបក្រុមក្មេងទំនើង នៅតាមបណ្តោយផ្លូវក្រវ៉ាត់ក្រុង ចំណុចក្បែរស្ពានអូរក្រវ៉ាន់លើ។
ក្នុងនោះផងដែរ លោកឧត្តមសេនីយ៍ទោ ស្នងការ និងសហការី ក៏បាននាំយកនូវ កន្ត្រកអនុស្សាវរីយ៍ ១ឈុត និងថវិកាចំនួន ៣លាន រៀល ដែលជាអំណោយដ៏ថ្លៃថ្លារបស់ ឯកឧត្តម នាយឧត្ដមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ ប្រគល់ជូនដល់ លោកវរសេនីយ៍ទោ សត្យា រ៉ូម៉េអ៊ូ និងក្រុមគ្រួសារ ផងដែរ ដើម្បីជាការផ្តល់កម្លាំងចិត្ត លើកទឹកចិត្ត និងជួយសម្រាលបន្ទុកក្នុងការព្យាបាលជំងឺ ៕
