សម្តេចតេជោ ផ្ញើបទចម្រៀង «ចន្ទរះលើរថយន្តក្រុង» ដើម្បីជាចំណងដៃសម្រាប់កម្លោះក្រមុំ ដែលស្គាល់គ្នាលើឡានក្រុង

ភ្នំពេញ៖ បន្ទាប់ពីបញ្ចប់ពិធីសម្ពោធដាក់ឲ្យប្រើប្រាស់ជាផ្លូវការ នូវអគារសម្ភព ក្នុងបរិវេណមន្ទីរពេទ្យកុមារជាតិ នាព្រឹកថ្ងៃទី២០ ខែមេសា ឆ្នាំ២០២៣នេះសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានផ្ញើបទចម្រៀងមួយបទដែលមានចំណងជើងថា «ចន្ទរះលើរថយន្តក្រុង» ដើម្បីជាចំណងដៃសម្រាប់កម្លោះក្រមុំ ដែលស្គាល់គ្នាលើឡានក្រុង ក្នុងពេលជិះទៅស្រុកកំណើត ក្នុងអំឡុងពេលចូលឆ្នាំខ្មែរ ។

សម្ដេចតេជោ ហ៊ុន សែន បញ្ជាក់តាមតេឡេក្រាមយ៉ាងដូច្នេះថា «ខ្ញុំនិយាយថា ប្រជាជនប្រមាណ ៥ម៉ឺននាក់ បានជិះរថយន្តក្រុងដែលរៀបចំ ដោយសាលារាជធានីភ្នំពេញ ក្នុងពេលចូលឆ្នាំកន្លងមក។ (និយាយព្រឹកមិញក្នុងពិធីសម្ពោធអគារសម្ភព នៃមន្ទីរពេទ្យកុមារជាតិ 20/4/2023)។ ពេលនោះខ្ញុំបានលើកឡើងថា ប្រជាជនបានស្គាល់គ្នាលើឡានក្រុង និងដែលអាចមានកម្លោះក្រមុំស្គាល់គ្នាផងដែរ និងប្រសិនបើរៀបការសូមប្រាប់ខ្ញុំផង។ ដើម្បីជាចំណងដៃសម្រាប់ក្រមុំកម្លោះទាំងឡាយ ដែលស្គាល់គ្នាលើឡានក្រុង សូមស្តាប់បទ (ចន្ទរះលើរថយន្តក្រុង)។ ចំហាយសប្បាយនៅសល់ពី ចូលឆ្នាំជាមួយសមិទ្ធផលថ្មីក្នុងឆ្នាំថ្មី» ៕