ប្រធានក្រុមប្រឹក្សាខេត្តក្រចេះ សរសើរមន្ទីរអង្គភាពពាក់ព័ន្ធ អាជ្ញាធរមូលដ្ឋាន ដែលបានរក្សាសន្តិសុខសុវត្ថិភាពជូនពលរដ្ឋ និងទេសចរ ក្នុងអំឡុងចូលឆ្នាំខ្មែរ
ភ្នំពេញ៖ ក្រុមប្រឹក្សាខេត្តក្រចេះ នាព្រឹកថ្ងៃអង្គារ ៦កើត ខែពិសាខ ឆ្នាំថោះ បញ្ចស័ក ព.ស.២៥៦៦ ត្រូវនឹងថ្ងៃទី២៥ ខែមេសា ឆ្នាំ២០២៣ បានរៀបចំកិច្ចប្រជុំសាមញ្ញលេីកទី៤៧ អាណត្តិទី៣ ឆ្នាំទី៤ របស់ក្រុមប្រឹក្សាខេត្ត ក្រោមអធិបតីភាពឯកឧត្តម ហឿ ស៉ីយ៉ែម ប្រធានក្រុមប្រឹក្សាខេត្ត និងឯកឧត្តម ដួង ពៅ អភិបាលរងខេត្ត តំណាងឯកឧត្តម វ៉ា ថន អភិបាលខេត្ត នៅសាលប្រជុំក្រុមប្រឹក្សាខេត្ត។
របៀបវារៈកិច្ចប្រជុំរួមមាន៖
១-ពិនិត្យ និងអនុម័តសេចក្ដីព្រាងកំណត់ហេតុកិច្ចប្រជុំសាមញ្ញលើកទី៤៦ អាណត្តិទី៣ ឆ្នាំទី៤ របស់ក្រុមប្រឹក្សាខេត្ត។
២-ពិនិត្យ និងអនុម័តសេចក្តីព្រាងរបាយការណ៍ស្តីពីលទ្ធផលការងារប្រចាំត្រីមាសទី១ និងលើកទិសដៅបន្តឆ្នាំ២០២៣ របស់រដ្ឋបាលខេត្ត។
៣-បញ្ហាផ្សេងៗ។
ឯកឧត្តម ហឿ សុីយ៉ែម បានមានប្រសាសន៍កោតសរសើរ និងវាយតម្លៃខ្ពស់ចំពោះមន្ទីរអង្គភាពពាក់ព័ន្ធ អាជ្ញាធរមូលដ្ឋាន ដែលបានរក្សាសន្តិសុខសណ្តាប់ធ្នាប់ សោភ័ណ្ឌភាព និងសុខសុវត្ថិភាពជូនបងប្អូនប្រជាពលរដ្ឋ ក៏ដូចជាភ្ញៀវទេសចរណ៍ជាតិ និងអន្តជាតិ ដែលចូលមកទស្សនាកម្សាន្តនៅក្នុងឱកាសបុណ្យចូលឆ្នាំថ្មីប្រពៃណីខ្មែរគួរឲ្យគត់សម្គាល់ និងសូមចូលរួមអបអរសាទរជាមួយបងប្អូនប្រជាពលរដ្ឋ និងយុវជនដែលបានចូលរួមយ៉ាងផុលផុសក្នុងពិធីសង្រ្កានឆ្នាំថ្មី និងរក្សាអនាម័យ ដែលស្តែងឲ្យឃើញពីភាពសប្បាយរីករាយរបស់កម្ពុជា ក្រោមដំបូលសន្តិភាព និងគ្មានជំងឺរាលត្បាត និងសូមឲ្យបងប្អូនបន្តរក្សាអនាម័យបរិស្ថាន ដើម្បីត្រៀមទទួលព្រឹត្តិការបើកកីឡាស៊ីហ្គេម នៅពេលខាងមុខនេះ ហើយទន្ទឹមនោះខេត្តក្រចេះយើងក៏បានកិត្តិយសទទួលភ្លើងព្រះអគ្គិជ័យកីឡាផងដែរ។
ឯកឧត្តមប្រធានក្រុមប្រឹក្សាខេត្ត បានបន្តថានេះជាភ័ពសំណាងខេត្តទទួលបានស្ពានឆ្លងកាត់ទន្លេ១ខែ្ស និងហេដ្ឋារចនាសម្ព័ន្ធមួយចំនួនពីរាជរដ្ឋាភិបាល នាពេលថ្មីនេះ ប្រជាពលរដ្ឋខេត្តក្រចេះ ក៏ទទួលបានផ្លូវតភ្ជាប់ខេត្តនិងឆ្ពោះទៅទីតាំងរម្មណីយដ្ឋានមួយចំនួន ដើម្បីបង្កើនវិស័យសេដ្ឋកិច្ចខេត្ត និងប្រជាជន ក្នុងនោះដែរសូមស្នើឲ្យមន្ទីរសង្គមកិច្ចអតីតយុទ្ធជន និងយុវនីតិសម្បទាខេត្ត និងមន្ទីរផែនការ សូមពិនិត្យនិងពន្លឿនលើការបើផ្តល់សាច់ប្រាក់ជូនគ្រួសារនិវត្តជន និងគ្រួសារទទួលបានប័ណ្ណសមធម៌ ឲ្យបានគម្លាតនិងមន្ត្ត្រីរាជការស៊ីវិលដែរ ៕
