បាក់ច្រាំងតាមដងទន្លេរបាសាក់! ឧបនាយករដ្ឋមន្ត្រីប្រាក់ សុខុន ស្នើឱ្យអជ្ញាធរត្រូវយកចិត្តទុកដាក់ពីសុវត្ថិភាពអាយុជីវិត ជួយសង្គ្រោះ និងការពារបញ្ចៀសកុំឱ្យមានការរងគ្រោះដល់អាយុជីវិត

ភ្នំពេញ៖ នៅព្រឹកថ្ងៃទី២៥ ខែមេសា ឆ្នាំ២០២៣ ឯកឧត្ដម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស ប្រធានក្រុមការងាររាជរដ្ឋាភិបាលចុះជួយស្រុកស្អាង ដោយមានការអញ្ជើញចូលរួមពី ឯកឧត្ដម គ្រុយ ម៉ាឡែន អភិបាលរងខេត្តកណ្ដាល ចុះពិនិត្យនិងសួរសុខទុក្ខគ្រួសារប្រជាពលរដ្ឋ២១គ្រួសារ ស្មើនឹង៤០ខ្នងផ្ទះដែលរងផលប៉ះពាល់ដោយសារស្រុតផ្ទះ និងបាក់ច្រាំងតាមដងទន្លេរបាសាក់ នៅភូមិត្រពាំងឈូក ឃុំព្រែកគយ ស្រុកស្អាង ។

ក្នុងឱកាសចុះពិនិត្យ និងសួរសុខទុក្ខ ឯកឧត្ដម ឧបនាយករដ្ឋមន្ត្រីស្នើ ឱ្យអជ្ញាធរ ត្រូវយកចិត្តទុកដាក់ពីសុវត្ថិភាពអាយុជីវិត ជួយសង្គ្រោះ និងការពារបញ្ចៀសកុំឱ្យមានការរងគ្រោះដល់អាយុជីវិត។

បន្ថែមពីនេះឯកឧត្ដមក៏បានណែនាំឱ្យត្រូវចាត់កំលាំងការពារសុវត្ថិភាពសម្ភារៈ ដែលនៅមានត្រូវរៀបចំក្រុមការងារស្រាវជ្រាវពីមូលហេតុនៃការស្រុតផ្ទះបាក់ច្រាំង និងវាយតំលៃពីស្ថានភាពផ្ទះ ឱ្យបានឆាប់រហ័ស និងរៀបចំជារបាយការណ៍ជូនថ្នាក់ជាតិ និងជម្រាបជូនគ្រួសារប្រជាពលរដ្ឋដែលរងគ្រោះ៕