ប.ស.ស. បន្តបណ្តុះបណ្តាលអប់រំផ្លូវចិត្ត ដល់សមាជិករបស់ខ្លួន ជាជនពិការភាពជាច្រើនរូប

ភ្នំពេញ៖ នាថ្ងៃទី២៥ ខែមេសា ឆ្នាំ២០២៣ សមាជិក ប.ស.ស. ដែលទទួលរងគ្រោះថ្នាក់ការងាររហូតធ្លាក់ខ្លួនពិការ បានចូលរួមសិក្សាឈ្វេងយល់ក្នុងកម្មវិធីសមាហរណកម្មស្ដីពីការអប់រំសុខភាពផ្លូវចិត្ត លំហែទាំ និងផ្សព្វផ្សាយពីសេវាស្តារនីតិសម្បទាដល់ជនពិការ។

ដោយទទួលបានការអនុញ្ញាតពី ឯកឧត្តម អ៊ុក សមវិទ្យា ប្រតិភូរាជរដ្ឋាភិបាលទទួលបន្ទុកជាអគ្គនាយកបេឡាជាតិសន្តិសុខសង្គម (ប.ស.ស.) លោកស្រី រ័ត្ន រ៉ានីន អនុប្រធាននាយកដ្ឋានស្ដារនីតិសម្បទា នៃបេឡាជាតិសន្តិសុខសង្គម (ប.ស.ស.) បានបញ្ជាក់ឲ្យដឹងថា ៖ កម្មវិធីខាងលើនេះ រៀបចំឡើងក្នុងគោលបំណងដើម្បីឲ្យសមាជិក ប.ស.ស. ដែលរងគ្រោះថ្នាក់ការងាររហូតធ្លាក់ខ្លួនជាជនពិការទាំងអស់ បានយល់ដឹងអំពីចំណេះដឹងផ្នែកចិត្តសាស្រ្តបែបសង្រ្គោះបឋមក្នុងការជួយខ្លួនឯង បន្ទាប់ពីធ្លាក់ខ្លួនពិការ និងបានយល់ដឹងពីសេវាស្ដារនីតិសម្បទាដែល ប.ស.ស. បាននឹងកំពុងផ្តល់ជូនពួកគាត់ផងដែរ។

យោងតាមរបាយការណ៍របស់នាយកដ្ឋានស្ដារនីតិសម្បទា នៃបេឡាជាតិសន្តិសុខសង្គម (ប.ស.ស.) បានបង្ហាញឲ្យដឹងថា៖ គិតរហូតមកដល់បច្ចុប្បន្ននេះ ប.ស.ស. មានសមាជិកសរុបចំនួន ២ ៤៦៨នាក់ហើយ ដែលបានរងគ្រោះថ្នាក់ការងាររហូតធ្លាក់ខ្លួនជាជនពិការ និងកំពុងទទួលបានសេវាស្តារនីតិសម្បទា រួមទាំងអត្ថប្រយោជន៍របបសន្តិសុខសង្គមផ្សេងៗជាច្រើនទៀតពី ប.ស.ស. ដែលក្នុងនោះ សមាជិក ប.ស.ស. ជាជនពិការនៅក្នុងខេត្តកំពង់ស្ពឺមានចំនួន១៦០នាក់។

សូមបញ្ជាក់ថា ៖ កម្មវិធីខាងលើនេះ រៀបចំឡើងដោយនាយកដ្ឋានស្ដារនីតិសម្បទា នៃបេឡាជាតិសន្តិសុខសង្គម (ប.ស.ស.) សហការជាមួយសាខា ប.ស.ស. ខេត្តកំពង់ស្ពឺ ដោយមានការអញ្ជើញចូលរួមពីលោក លោកស្រី ជាថ្នាក់ដឹកនាំ ប.ស.ស. និងបងប្អូនសមាជិក ប.ស.ស. ជាជនពិការ នៅលើទឹកដីខេត្តកំពង់ស្ពឺ៕