ឯកឧត្តម ម៉ែន វិបុល៖ ខេត្តស្វាយរៀង មានច្រកទ្វារព្រំដែនចំនួន ៨កន្លែង ដែលកំពុងដើរតួនាទីយ៉ាងសំខាន់ក្នុងការជួយសម្រួលដល់ការដោះដូរពាណិជ្ជកម្ម កសិផលផ្សេងៗ និងការធ្វើដំណើរឆ្លងកាត់ព្រំដែន របស់ប្រជាពលរដ្ឋ
ភ្នំពេញ៖ ឯកឧត្តម ម៉ែន វិបុល អភិបាល នៃគណៈអភិបាលខេត្តស្វាយរៀង បានមានប្រសាសន៍ថា ខេត្តមានច្រកទ្វារព្រំដែនចំនួន ៨កន្លែងរួមមាន៖ ច្រកទ្វារព្រំដែនអន្តរជាតិចំនួន ២កន្លែង ច្រកទ្វារទ្វារព្រំដែនទ្វេភាគីចំនួន ២កន្លែង និងច្រកទ្វារតំបន់ព្រំដែនចំនួន ៤កន្លែង និងមានកំពង់ផែចំនួន ១កន្លែង ដែលកំពុងដើរតួនាទីយ៉ាងសំខាន់ក្នុងការជួយសម្រួលដល់ការដោះដូរពាណិជ្ជកម្ម កសិផលផ្សេងៗ និងការធ្វើដំណើរឆ្លងកាត់ព្រំដែន របស់ប្រជាពលរដ្ឋ ភ្ញៀវជាតិ និងអន្តរជាតិ។
ឯកឧត្តម ម៉ែន វិបុល បានមានប្រសាសន៍បែបនេះក្នុងឱកាសអញ្ជើញដឹកនាំគណៈប្រតិភូ ចូលរួមសន្និសីទសារព័ត៌មានស្ដីពី “ភាពជោគជ័យក្នុងរយៈពេល៥ឆ្នាំកន្លងមក របស់រដ្ឋបាលខេត្តស្វាយរៀង” នៅទីស្ដីការគណៈរដ្ឋមន្ត្រី នាព្រឹកថ្ងៃទី២៧ ខែមេសា ឆ្នាំ២០២៣។
ឯកឧត្តមអភិបាលខេត្ត បានមានប្រសាសន៍បន្តថា បច្ចុប្បន្នខេត្តស្វាយរៀង បានរៀបចំសំណើរទៅរាជរដ្ឋាភិបាល ដើម្បីស្នើសុំបង្កើតច្រកទ្វារតំបន់ព្រំដែនមួយកន្លែងទៀត គឺច្រកទ្វារតំបន់ព្រំដែនក្រសាំងជ្រំ ដែលស្ថិតនៅភូមិក្រសាំងជ្រំ ឃុំគ្រួស ស្រុកស្វាយជ្រំ ខេត្តស្វាយរៀង ៕
