ក្រសួងសេដ្ឋកិច្ច និង JICA ចុះកិច្ចព្រមព្រៀងឥណទានសម្បទាន (កញ្ចប់ទី២) គម្រោងស្តារឡើងវិញប្រព័ន្ធស្រោចស្រព និងប្រព័ន្ធរំដោះទឹកភាគនិរតី រាជធានីភ្នំពេញ ចំនួន ២៤៨២លានយ៉េន
ភ្នំពេញ៖ ឯកឧត្ដម ហែម វណ្ណឌី រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានទទួលបុព្វសិទ្ធិពីឯកឧត្ដមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ជាភាគីហត្ថលេខី តំណាងរាជរដ្ឋាភិបាលកម្ពុជា ជាមួយលោក SANUI KAZUMASA ប្រធានទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) ប្រចាំកម្ពុជា បានចុះហត្ថលេខាលើកិច្ចព្រមព្រៀងឥណទានសម្បទាន (កញ្ចប់ទី២) សម្រាប់គម្រោងស្តារឡើងវិញនូវប្រព័ន្ធស្រោចស្រព និងប្រព័ន្ធរំដោះទឹកភាគនិរតីរាជធានីភ្នំពេញ មានទឹកប្រាក់ចំនួន ២៤៨២លានយ៉េនជប៉ុន។
ឯកឧត្ដមរដ្ឋលេខាធិការ បានថ្លែងថា នេះគឺជាឯកសារ គតិយុត្តមួយទៀត បន្ទាប់ពីការចុះហត្ថលេខាលើលិខិតប្តូរសារ ស្តីពីការផ្តល់ឥណទានសម្បទាន សម្រាប់គម្រោងនេះ កាលពីថ្ងៃទី១០ ខែមេសា ឆ្នាំ២០២៣ រវាងឯកឧត្ដមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ និងលោក UENO ATSUSHI ឯកអគ្គរាជទូតវិសាមញ្ញ និងពេញសមត្ថភាពជប៉ុន ប្រចាំនៅកម្ពុជា។
គម្រោងស្តារឡើងវិញនូវប្រព័ន្ធស្រោចស្រព និងប្រព័ន្ធដោះទឹកភាគនិរតីរាជធានីភ្នំពេញ មានទិសដៅកែលម្អ និងស្តារឡើងវិញនូវប្រព័ន្ធធារាសាស្ត្រដែលមានអនុគម្រោងចំនួន ២ រួមមាន អនុគម្រោងប្រព័ន្ធធារាសាស្រ្ត រលាំងជ្រៃ និងអនុគម្រោងប្រព័ន្ធធារាសាស្រ្តកណ្តាលស្ទឹង-បាទី ដែលការងារសាងសង់នេះ ស្ថិតនៅក្នុងខេត្តកំពង់ស្ពឺ, ខេត្តតាកែវ និងខេត្តកណ្តាល ដែលមានផ្ទៃដីធារាសាស្រ្តសរុបប្រមាណ ២១ ០០០ហិកតា និង ផ្តល់គុណប្រយោជន៍ដល់ប្រជាជនប្រមាណ ៧ ៩២៥ គ្រួសារ ដោយមានកសិករទទួលផលពីគម្រោងប្រមាណ ៤៤ ០០០ នាក់ តាមរយៈការផ្គត់ផ្គង់ធនធានទឹកស្រោចស្រពឲ្យបានគ្រប់គ្រាន់ ដែលជួយឱ្យកសិករ អាចបង្កើនផលិតកម្មស្រូវបានពីចំនួនប្រមាណ ២,០៩-៣,៥០ តោន/ហត ទៅ ៣,៥០-៥,០០ តោន/ហត។
ឆ្លៀតក្នុងឱកាសនេះ ឯកឧត្ដម ហែម វណ្ណឌី ក្នុងនាមរាជរដ្ឋាភិបាលកម្ពុជា ក្រសួងសេដ្ឋកិច្ច និងហិរញ្ញវត្ថុ និងប្រជាជនកម្ពុជា បានថ្លែងអំណរគុណចំពោះរដ្ឋាភិបាលជប៉ុន និងប្រជាជនជប៉ុន គ្រប់ស្ថាប័នពាក់ព័ន្ធរបស់រដ្ឋាភិបាលជប៉ុន ដែលតែងតែបានផ្តល់នូវកិច្ចសហប្រតិបត្តិការ ដ៏ល្អប្រសើរ ជាពិសេស ទីភ្នាក់ងារសហប្រតិបត្តិការអន្តរជាតិ នៃប្រទេសជប៉ុន (JICA) ដែលបានបន្តផ្តល់ហិរញ្ញប្បទាន សម្រាប់កិច្ចសហប្រតិបត្តិការអភិវឌ្ឍន៍ផ្លូវការ (ODA) ទាំងក្នុងក្របខណ្ឌហិរញ្ញប្បទានឥតសំណង, ឥណទានសម្បទាន និង ជំនួយបច្ចេកទេស ដែលបានឆ្លើយតបចំទិសដៅអភិវឌ្ឍន៍របស់រាជរដ្ឋាភិបាលកម្ពុជា ក្នុងការស្តារ និង អភិវឌ្ឍន៍សង្គម-សេដ្ឋកិច្ច។
ជាទីបញ្ចប់ ក្នុងនាមឯកឧត្ដមអគ្គបណ្ឌិតសភាចារ្យ អូន ព័ន្ធមុនីរ័ត្ន និង ប្រជាជនកម្ពុជា ឯកឧត្ដម ហែម វណ្ណឌី បានថ្លែងអំណរគុណយ៉ាងជ្រាលជ្រៅជាទីបំផុត ចំពោះរដ្ឋាភិបាលជប៉ុន, ទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) និងប្រជាជនជប៉ុន សម្រាប់ការគាំទ្រ និងការរួមចំណែកដ៏សប្បុរសក្នុងការអភិវឌ្ឍសង្គម និងសេដ្ឋកិច្ចកម្ពុជា ៕
