នាយករដ្ឋមន្ត្រីកម្ពុជា អំពាវនាវប្រទេសដែលផ្ដល់ថវិកាឧបត្ថម្ភ ឲ្យកម្មករណាហ្គា ធ្វើបាតុកម្មត្រូវដកខ្លួនថយ
ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានស្នើដល់ប្រទេសដែលបានផ្ដល់ថវិកាឧបត្ថម្ភដល់កម្មករណាហ្គាវ៉ើល សម្រាប់ធ្វើបាតុកម្មជាប្រចាំនោះ ត្រូវដកខ្លួនចេញ ហើយបញ្ឈប់ការធ្វើអន្ដរជាតិតូបនីកម្មនៅកម្ពុជា ខណៈរាជរដ្ឋាភិបាលដឹងច្បាស់អំពីផែនការទាំងអស់នេះ។
ក្នុងឱកាសអញ្ជើញ បើកការដ្ឋានសាងសង់ចំណតផែកុងតឺន័រថ្មី នៅកំពង់ផែស្វយ័តក្រុងព្រះសីហនុ នាថ្ងៃទី១ ឧសភានេះ សម្ដេចតេជោ ហ៊ុន សែន បានបញ្ជាក់ថា «ខ្ញុំសុំស្នើឲ្យមិត្តភ័ក្ដបរទេសខ្លះដែលបានឧបត្ថម្ភប្រាក់ធ្វើអន្ដរជាតិតូបនីយកម្ម លើបញ្ហាបាតុកម្មមនុស្សជាង១០០នាក់ ដែលធ្វើបាតុកម្មប្រមាណជាង២ឆ្នាំរួចមកហើយ។ បាតុកម្មតាំងពីមនុស្សជាង៣០០នាក់ រហូតដល់មនុស្សនៅសល់១០០នាក់ ចោទចេញជាសំណួរថា ខ្លួនជាកម្មករសោះក៏ប៉ុន្ដែរយៈពេលអត់ការងារធ្វើ២ឆ្នាំ ប៉ុន្ដែនៅមានបាយស៉ី នៅមានកម្លាំងមកធ្វើបាតុកម្ម តើរឿងនេះរដ្ឋាភិបាលដឹងឬមិនដឹង មិនមែនរដ្ឋាភិបាលមិនដឹងទេ កន្លែងបើកលុយនៅកន្លែងណានោះ»។
សម្ដេចតេជោ បានបង្ហើបថា សម្ដេចមានមនុស្សរាយការណ៍មកថា ប្រសិនបើថ្ងៃទី១ ខែឧសភាមិនចូលរួមដង្ហែក្បួនទេនោះ គេនឹងកាត់ផ្ដាច់លុយឧបត្ថម្ភមកពីក្រៅប្រទេស ដូច្នេះសហជីពមួយចំនួននៅកម្ពុជា គឺជាសហជីពដែលផ្ដល់លុយដោយជនបរទេស។
សម្ដេចបានស្នើកុំឲ្យមានទិវាពលកម្មអន្ដរជាតិតែមួយថ្ងៃ ដែលសម្ដេចចង់សំដៅថា កុំគោរពសិទ្ធិត្រឹមតែមួយថ្ងៃនេះ ពោលត្រូវគោរពសិទ្ធិមនុស្ស គោរពសិទ្ធិពលករ ត្រូវធ្វើ៣៦៥ថ្ងៃ សម្រាប់កម្មករ កម្មការិនីទាំងអស់ទើបជាការត្រឹមត្រូវ ៕
