រថយន្តដឹកប្រេង បើកបុករ៉ឺម៉កពីក្រោយពេញទំហឹង បណ្ដាលឱ្យស្លាប់ ៤នាក់ របួសធ្ងន់ ៨នាក់

ភ្នំពេញ៖ ករណីគ្រោះថ្នាក់ចរាចរណ៍គួរឲ្យរន្ធត់ ដោយរថយន្តដឹកប្រេងបុករ៉ឺម៉កពីក្រោយពេញទំហឹង បណ្ដាលឱ្យមនុស្ស បួននាក់ ស្លាប់នៅលើដងផ្លូវយ៉ាងអាណោចអាធ័ម និង ៨នាក់ទៀតរងរបួសធ្ងន់។

ហេតុការណ៍នេះកើតឡើងនៅថ្ងៃទី០៣ ខែ០៥ ឆ្នាំ២០២៣ វេលាម៉ោង ០៣:២០នាទីទៀបភ្លឺ នៅលើផ្លូវជាតិលេខ៥ នៅត្រង់ចំណុចគីឡូ ៤០និង៤១ ស្ថិតក្នុងភូមិជន្លាត់ដៃ ឃុំស្វាយ ស្រុកសាមគ្គីមានជ័យ ខេត្តកំពង់ឆ្នាំង ។

តាមប្រភពពីកន្លែងកើតហេតុឲ្យបានដឹងថា មុនពេលកើតហេតុគេបានឃើញបុរសម្នាក់ជាអ្នកបើករ៉ឺម៉ក និងជនរងគ្រោះប្រមាណ ៨នាក់ ផ្សេងទៀត ជាអ្នកជិះរ៉ឺម៉កខាងលើ លុះដល់កន្លែងកើតហេតុ ក៏មានរថយន្តដឹកប្រេង ១គ្រឿង បើកបរក្នុងល្បឿនលឿន បានរេចង្កូតជ្រុលទៅបុកពីក្រោយរ៉ឺម៉កពេញទំហឹង បណ្ដាលឱ្យស្លាប់មនុស្ស បួននាក់ និង របួសធ្ងន់ ៨នាក់ ដោយឡែកអ្នកបើកបររថយន្តបង្ក បានរត់គេចបាត់ស្រមោល។

ប្រភពព័ត៌មានបានឲ្យដឹងថា៖ រថយន្ដ ០១គ្រឿង ម៉ាក HYUNDAI ពណ៌ស ស្លាកលេខភ្នំពេញ 3G-2103 អ្នកបើកបរដោយបុរសម្នាក់មិនស្គាល់អត្តសញ្ញាណ ចំណែក អ្នកបើកបរម៉ក ១គ្រឿងគ្មានស្លាកលេខ ក៏មិនស្គាល់អត្តសញ្ញាណដូចគ្នា ប៉ុន្តែតាមការបញ្ជាក់ពីសមត្ថកិច្ចជនរងគ្រោះខាងលើ រស់នៅភូមិបឹងកក់ ឃុំលង្វែក ស្រុកកំពង់ត្រឡាច ខេត្តកំពង់ឆ្នាំង ។ ចំពោះរថយន្ដបង្កខូចខាតផ្នែកខាងមុខ រីឯរ៉ឺម៉កជនរងគ្រោះខូចខាតទាំងស្រុង ។

ប្រភពឲ្យដឹងបន្តថា មូលហេតុបណ្តាលឲ្យមានករណីគ្រោះថ្នាក់ចរាចរណ៍ដ៏រន្ធត់នេះ មូលហេតុមកពីអ្នកបើកបររថយន្តមានស្ថានភាពងោកងុយ ។

ក្រោយពេលកើតហេតុកម្លាំងនគរបាលជំនាញបានចុះទៅដល់កន្លែងកើតហេតុធ្វើការវាស់វែង និងចាប់យកវត្ថុតាងរក្សាទុក្ខអធិការដ្ឋាននគរបាលប៉ុស្តិ៍ផ្សារត្រាច ដើម្បីកសាងសំណុំរឿងចាត់ការទៅតាមសន្តិវិធីច្បាប់ ៕