ឯកឧត្តម ព្រុំ សុខា លើកទឹកចិត្តការពង្រឹងពង្រីកសមាជិកបក្សតាមក្រុមនីមួយៗឱ្យបានល្អ បង្កលក្ខណៈឱ្យបងប្អូនរួមសាមគ្គីគ្នា ជួយថែរក្សាគ្នា និងយល់ទុក្ខធុរៈគ្នាទៅវិញទៅមក

ភ្នំពេញ៖ ឯកឧត្តម ព្រុំ សុខា រដ្ឋមន្ត្រីក្រសួងមុខងារសាធារណៈ និងជាប្រធានក្រុមការងារគណបក្សប្រជាជនកម្ពុជាចុះមូលដ្ឋានខេត្តក្រចេះ បានថ្លែងមតិសំណេះសំណាលជាមួយអ្នកចូលរួមក្នុងអង្គពិធីទាំងមូល ដោយសង្កត់ធ្ងន់ពីការងារបន្ទាន់ក្នុងការយកចិត្តទុកដាក់គ្រប់គ្រងសហគមន៍ និងលើកទឹកចិត្តការពង្រឹងពង្រីកសមាជិកបក្សតាមក្រុមនីមួយៗឱ្យបានល្អ បង្កលក្ខណៈឱ្យបងប្អូនរួមសាមគ្គីគ្នា ជួយថែរក្សាគ្នា និងយល់ទុក្ខធុរៈគ្នាទៅវិញទៅមក បន្តជំរុញចលនាសកម្មភាពធ្វើអំពើល្អនៅមូលដ្ឋានជាប្រចាំ និងព្យាយាមដោះស្រាយរាល់ការថ្នាំងថ្នាក់របស់ប្រជាពលរដ្ឋ។ ចំពោះមុខត្រូវជួយយកអាសារទំនុកបំរុងជីវភាពប្រជាជនរងគ្រោះដោយផលប៉ះពាល់ពីកូវីដ-១៩ និងពីវិបត្តិផ្សេងៗទៀតឱ្យបានជាប់ជាប្រចាំ ដើម្បីរួមចំណែកកាន់តែរឹងមាំ រក្សាឧត្តមភាពប្រៀបឈ្នះរបស់គណបក្សប្រជាជនកម្ពុជាតាមមូលដ្ឋាននៅទូទាំងប្រទេស។

ក្នុងពិធីជួបសំណេះសំណាលជាមួយតំណាងប្រជាពលរដ្ឋដែលជាប្រធាន និងអនុប្រធានក្រុមបក្សគណបក្សប្រជាជនកម្ពុជាក្នុងភូមិទាំង៤នៅឃុំហាន់ជ័យ ស្រុកឆ្លូង ខេត្តក្រចេះ កាលពីរសៀលថ្ងៃទី៦ ខែឧសភា ឆ្នាំ២០២៣។

ទន្ទឹមនេះ ឯកឧត្តមរដ្ឋមន្ត្រី ព្រុំ សុខា មានប្រសាសន៍ថា ត្រូវចូលរួមយ៉ាងសកម្មលើកកម្ពស់ឥទ្ធិពលកិត្យានុភាពល្បីរន្ទឺក្លៀវក្លា របស់កម្ពុជានាពេលបច្ចុប្បន្ន ក្រោមការដឹកនាំនៃរដ្ឋាភិបាលរបស់គណបក្សប្រជាជនកម្ពុជា ដែលមាន សម្តេចតេជោ ហ៊ុន សែន ជានាយករដ្ឋមន្ត្រី ដែលបានប្រយុទ្ធឈ្នះកូវីដ-១៩ និងកំពុងនាំសេដ្ឋកិច្ច ជីវភាពសង្គមជាតិ វិលមកកាន់ប្រក្រតីភាពជាធម្មតាឡើងវិញ ហើយបានទទួលជោគជ័យដ៏ត្រចះត្រចង់ បង្កើតស្នាដៃធំធេងជាប្រវត្តិសាស្ត្រលើឆាកអន្តរជាតិក្នុងការធ្វើជាម្ចាស់ផ្ទះនៃកិច្ចប្រជុំកំពូលអាស៊ាន កាលពីខែវិច្ឆិកា ឆ្នាំ២០២២ និងជោគជ័យក្នុងការធ្វើជាម្ចាស់ផ្ទះរៀបចំព្រឹត្តិការណ៍កីឡាស៊ីហ្គេមលើកទី៣២។ល។

ឯកឧត្តមរដ្ឋមន្ត្រី មានប្រសាសន៍បន្តទៀតថា ជ័យជំនះធំធេងថ្មីៗនេះ នឹងក្លាយជាឈ្នួនជំរុញសន្ទុះវាយសំរុកកាន់តែខ្លាំងក្លារបស់គណបក្សយើងដើម្បីដណ្តើមជ័យជំនះទាំងស្រុងសម្រាប់ការបោះឆ្នោតជាតិនាពេលដ៏ខ្លីខាងមុខជាក់ជាមិនខាន ៕