ឯកឧត្តម ឆាយ ថន៖ ការបំពេញបាននូវលក្ខណៈវិនិច្ឆ័យទាំង៣ ដើម្បីត្រៀមខ្លួនចាកចេញពីចំណាត់ក្រុមប្រទេសអភិវឌ្ឍន៍តិចតួច គឺជាការឆ្លុះបញ្ចាំងអំពីសមិទ្ធផល និងជោគជ័យនៃការអភិវឌ្ឍសង្គម-សេដ្ឋកិច្ច របស់កម្ពុជា

ភ្នំពេញ ឯកឧត្តមកិត្តិសេដ្ឋាបណ្ឌិត ឆាយ ថន ទេសរដ្ឋមន្ត្រី រដ្ឋមន្ត្រីក្រសួងផែនការ និងជាប្រធានគណៈកម្មាធិការជាតិសម្រាប់ការត្រៀមចាកចេញរបស់កម្ពុជាពីចំណាត់ក្រុមប្រទេសអភិវឌ្ឍន៍តិចតួច នាព្រឹកថ្ងៃទី១០ ខែឧសភា ឆ្នាំ២០២៣ បានអញ្ជើញជាអធិបតីក្នុងពិធីបើកកិច្ចប្រជុំលើកទី១ គណៈកម្មាធិការជាតិសម្រាប់ការត្រៀមចាកចេញរបស់កម្ពុជាពីចំណាត់ក្រុមប្រទេសអភិវឌ្ឍន៍តិចតួច។ ដោយមានការអញ្ជើញចូលរួមពីឯកឧត្តម លោកជំទាវ អនុប្រធាន សមាជិក សមាជិកានៃគណៈកម្មាធិការជាតិសម្រាប់ការត្រៀមចាកចេញរបស់កម្ពុជាពីចំណាត់ក្រុមប្រទេសអភិវឌ្ឍន៍តិចតួច ព្រមទាំងក្រុមការងារចំពោះកិច្ចក្រសួងផែនការ សម្រាប់ការត្រៀមចាកចេញរបស់កម្ពុជាពីចំណាត់ក្រុមប្រទេសអភិវឌ្ឍន៍តិចតួច ដែលជាលេខាធិការដ្ឋានរបស់គណៈកម្មាធិការជាតិ ស្វែងយល់ពីដំណើរការនៃការត្រៀមការចាកចេញ ការចាកចេញ និងក្រោយការចាកចេញរបស់កម្ពុជា និងពិភាក្សាអំពីការងារដែលត្រូវធ្វើបន្តរបស់គណៈកម្មាធិការជាតិ និយាយជារួម និងរបស់ក្រសួងស្ថាប័នពាក់ព័ន្ធនិយាយដោយឡែក ដើម្បីចូលរួមសហការគ្នាឱ្យបានល្អ ក្នុងការបំពេញភារកិច្ចទៅតាមសមត្ថកិច្ចរបស់ខ្លួនក្នុងក្របខណ្ឌនៃការងារត្រៀមចាកចេញ ឱ្យសម្រេចបានជោគជ័យនូវភារកិច្ចដ៏ធំធេងនេះជូនរាជរដ្ឋាភិបាលកម្ពុជា។

ឯកឧត្តមកិត្តិសេដ្ឋាបណ្ឌិត បានថ្លែងបញ្ជាក់ថា នៅឆ្នាំ២០២១ ការិយាល័យអ្នកសម្របសម្រួលនៃអង្គការសហប្រជាជាតិប្រចាំនៅប្រទេសកម្ពុជា បានជូនព័ត៌មានថា កម្ពុជាបំពេញបាននូវលក្ខណៈវិនិច្ឆ័យទាំង៣ លើកទីមួយ ដើម្បីត្រៀមខ្លួនចាកចេញពីចំណាត់ក្រុមប្រទេសអភិវឌ្ឍន៍តិចតួច។ លក្ខណៈវិនិច្ឆ័យទាំង៣ ដែលវាយតម្លៃដោយ គណៈកម្មាធិការគោលនយោបាយអភិវឌ្ឍន៍ របស់អង្គការសហប្រជាជាតិ (UN Committee for Development Policy, CDP) រួមមាន៖
១-ប្រាក់ចំណូលជាតិសរុបសម្រាប់មនុស្សម្នាក់ (Gross National Income, GNI, per capita) ត្រូវធំជាង១.២២២ដុល្លារ។ កម្ពុជាមានប្រាក់ចំណូលជាតិសរុបសម្រាប់មនុស្សម្នាក់ ស្មើនឹង ១.៣៧៧ដុល្លារ នៅឆ្នាំ២០២១។
២-សន្ទស្សន៍ធនធានមនុស្ស (Human Assets Index, HAI) ត្រូវមានតម្លៃស្មើឬធំជាង ៦៦។ កម្ពុជាទទួលបានពិន្ទុ ៧៤,៣។
៣-សន្ទស្សន៍ភាពងាយរងគ្រោះសេដ្ឋកិច្ចនិងបរិស្ថាន (Economic and Environmental Vulnerability Index, EVI) ត្រូវមានតម្លៃស្មើឬតូចជាង ៣២។ កម្ពុជាទទួលបានពិន្ទុ ៣០,៦។

ឯកឧត្តមកិត្តិសេដ្ឋាបណ្ឌិត បានបន្តថា ជាមួយនឹងការវាយតម្លៃខាងលើ ស្ថាប័នអង្គការសហប្រជាជាតិ នឹងវាយតម្លៃប្រទេសកម្ពុជាជាថ្មីម្តងទៀតនៅឆ្នាំ២០២៤ គឺគណៈកម្មាធិការគោលនយោបាយអភិវឌ្ឍន៍ នឹងវាយតម្លៃអំពីលក្ខណៈវិនិច្ឆ័យទាំង៣ ជាលើកទីពីរ និង សន្និសីទអង្គការសហប្រជាជាតិស្តីពីពាណិជ្ជកម្ម និងការអភិវឌ្ឍន៍ (Conference on Trade and Development, UNCTAD) នឹងវាយតម្លៃអំពីស្ថានភាពនៃភាពងាយរងគ្រោះរបស់កម្ពុជា (Vulnerability Profile of Cambodia)។ ក្នុងករណីដែលប្រទេសកម្ពុជាទទួលបានជោគជ័យនៅក្នុងការវាយតម្លៃលើកទីពីរនេះ ប្រទេសកម្ពុជានឹងមានពេល ៣ឆ្នាំ ឬ ៥ឆ្នាំ សម្រាប់ត្រៀមខ្លួនចាកចេញពីចំណាត់ក្រុមប្រទេសអភិវឌ្ឍន៍តិចតួច ពោលគឺនៅឆ្នាំ២០២៧ ឬ២០២៩ កម្ពុជានឹងចាកចេញពីចំណាត់ក្រុមប្រទេសអភិវឌ្ឍន៍តិចតួច។

ឯកឧត្តមកិត្តិសេដ្ឋាបណ្ឌិត បានមានប្រសាសន៍បន្ថែមថា ការបំពេញបាននូវលក្ខណៈវិនិច្ឆ័យសម្រាប់ត្រៀមចាកចេញពីចំណាត់ក្រុមប្រទេសអភិវឌ្ឍន៍តិចតួច គឺជាការឆ្លុះបញ្ចាំងអំពីសមិទ្ធផល និងជោគជ័យនៃការអភិវឌ្ឍសង្គម-សេដ្ឋកិច្ច របស់ប្រទេសកម្ពុជា ក្រោមការដឹកនាំប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។ ការចាកចេញរបស់ប្រទេសកម្ពុជាពីចំណាត់ក្រុមប្រទេសអភិវឌ្ឍន៍តិចតួច នឹងបង្កើតបាននូវរបត់ប្រវត្តិសាស្ត្រថ្មីមួយទៀតនៃការរីកចម្រើនឥតឈប់ឈររបស់ប្រទេសកម្ពុជា ដែលជាមោទនភាពជាតិដ៏ឧត្តុងឧត្តមរបស់ប្រទេស និងប្រជាជនកម្ពុជា ៕