ឯកឧត្តម ហ៊ុន ម៉ានី៖ ភាពលូតលាស់នៃ ស.ស.យ.ក រយៈពេលជាង១០ឆ្នាំនេះ មិនមែនជារឿងសមញ្ញនោះទេ វាចេញពីការខិតខំប្រឹងប្រែងទាំងអស់គ្នា
ភ្នំពេញ៖ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា មានប្រសាសន៍ថា ភាពលូតលាស់នៃ ស.ស.យ.ក រយៈពេលជាង១០ឆ្នាំនេះ មិនមែនជារឿងសមញ្ញនោះទេ វាចេញពីការខិតខំប្រឹងប្រែងទាំងអស់គ្នា ហើយការបង្កើនទំនុកចិត្តដល់មហាជនឱ្យមានភាពជឿជាក់ និងទទួលស្គាល់ គឺទាមទារការអនុវត្តជាប្រចាំ និងចំណាយពេលវេលា។
មានប្រសាសន៍ក្នុងពិធីប្រកាសទទួលស្គាល់សមាសភាពគណៈកម្មាធិការសហភាពសហព័ន្ធយុវជនកម្ពុជាខេត្តព្រះសីហនុ នារសៀលថ្ងៃទី១៥ ខែឧសភា ឆ្នាំ២០២៣។
ឯកឧត្តម ហ៊ុន ម៉ានី បានគូសបញ្ជាក់ជូនសមាជិក សមាជិកា អំពីសាវតា និងដំណើររីកលូតលាស់របស់ ស.ស.យ.ក ជាស្ថាប័នយុវជនដែលមានបេសកកម្ម និងមាគ៌ាបន្តស្មារតី ២ធ្នូ ដោយការដាក់ផលប្រយោជន៍ផ្ទាល់ខ្លួន ដោយឡែកមករួមគ្នាជាក្រុមសម្រេចគោលដៅរួមមួយសម្រាប់ប្រទេសជាតិ។
ទន្ទឹមនេះឯកឧត្តមប្រធាន ក៏បានធ្វើការផ្សារភ្ជាប់រវាងស្មារតី២ធ្នូរ និងស្ថានភាពបច្ចុប្បន្ន ដោយគូសបញ្ជាក់ផ្តាំផ្ញើដល់ថ្នាក់ ដឹកនាំគណៈកម្មាធិការខេត្ត ក្រុង ស្រុក និង សមាជិក សមាជិកាស.ស.យ.ក គ្រប់ៗរូបបន្តខិតខំប្រឹងប្រែងអនុវត្តការងារប្រកបដោយស្មារតី និងយល់ច្បាស់ពីបុព្វហេតុ បេសកកម្ម ជាពិសេសការចូលរួមក្នុងកិច្ចការងារសង្គម និងការដាក់ប្រយោជន៍ប្រជាជន និងប្រទេសជាតិជាចម្បង ៕
