ឯកឧត្ដម ហ៊ុន ម៉ានី៖ កីឡាមិនត្រឹមតែនាំមកនូវសុខភាព ប៉ុន្តែកីឡាថែមទាំងបង្កើតសាមគ្គីភាពសម្រាប់យើងគ្រប់គ្នា

ភ្នំពេញ៖ ឯកឧត្ដម ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានលើកឡើងថា កីឡាមិនត្រឹមតែនាំមកនូវសុខភាព ប៉ុន្តែកីឡាថែមទាំងបង្កើតសាមគ្គីភាពសម្រាប់យើងគ្រប់គ្នា។

តាមរយៈបណ្ដាញសង្គមនៅថ្ងៃទី១៩ ខែឧសភានេះ ឯកឧត្ដម ហ៊ុន ម៉ានី បានលើកឡើងថា កម្ពុជាមិនត្រឹមតែជាម្ចាស់ផ្ទះរៀបចំព្រឹត្តិការណ៍ប្រកួតកីឡាអាស៊ីអាគ្នេយ៍ដែលទើបបញ្ចប់ដោយជោគជ័យនាពេលថ្មីៗនេះប៉ុណ្ណោះទេ ប៉ុន្តែកម្ពុជា នឹងទទួលធ្វើជាម្ចាស់ផ្ទះ ព្រឹត្តិការណ៍ប្រកួតប៉ារ៉ាឡាំពិកហ្គេមលើកទី១២ នៅឆ្នាំ២០២៣ នាថ្ងៃទី០៣ ដល់០៩ ខែមិថុនា ឆ្នាំ២០២៣ ខាងមុខនេះ ក្នុងទឹកដីនៃព្រះរាជាណាចក្រកម្ពុជា។

ឯកឧត្ដមបញ្ជាក់ថា “កីឡាមិនត្រឹមតែនាំមកនូវសុខភាព ប៉ុន្តែកីឡាថែមទាំងបង្កើតសាមគ្គីភាពសម្រាប់យើងគ្រប់គ្នា។ សម្រាប់ក្រុមជនមានពិការភាព ការផ្តល់លទ្ធភាពឲ្យបានចូលរួមប្រកួត ជាការលើកស្ទួយនូវសិទ្ធិ សេរីភាព សមភាព និងការទទួលស្គាល់យ៉ាងពេញលេញនូវសិទ្ធ និងសេរីភាពរបស់ពួកគាត់”។

ឯកឧត្ដម ហ៊ុន ម៉ានី បន្ថែមថា ក្នុងដំណើរឆ្ពោះទៅការប្រកួតកីឡាអាស៊ានប៉ារ៉ាហ្គេម លើកទី១២ ឆ្នាំ២០២៣ កម្ពុជាត្រៀមខ្លួនជាស្រេចក្នុងការទទួលគណៈប្រតិភូប៉ារ៉ាហ្គេមទាំង១១ប្រទេស មកកាន់ទឹកដីដ៏ស្រស់បំព្រងរបស់យើង។

ជាមួយគ្នានោះឯកឧត្ដម ហ៊ុន ម៉ានី ក៏បានអំពាវនាវឱ្យចូលរួមគាំទ្រដល់អត្តពលិកប៉ារ៉ាឡាំពិកកម្ពុជារបស់យើង ខណៈវេលានេះអត្តពលិកទាំងអស់បាន និងកំពុងផ្តោតទាំងកាយទាំងចិត្ត ស្មារតី ក្នុងការហ្វឹកហាត់តាមវិញ្ញាសារនីមួយៗ ក៏ដូចជាត្រៀមខ្លួនគ្រប់ជ្រុងជ្រោយក្នុងការសម្រេចឱ្យបាននូវជោគជ័យជាសមិទ្ធផលថ្មីបន្ថែមជូនជាតិមាតុភូមិរបស់យើង៕