រដ្ឋមន្ត្រីការបរទេសអាមេរិក នឹហទៅទស្សនកិច្ចប្រទេសប៉ាពួញូហ្គីណេ ដើម្បីចុះហត្ថលេខាលើកិច្ចព្រមព្រៀងការពារជាតិ និងដែនសមុទ្រ
វ៉ាសុីនតោន៖ ក្រសួងការបរទេសអាមេរិកបាននិយាយកាលពីថ្ងៃព្រហស្បតិ៍ថា រដ្ឋមន្ត្រីការបរទេសអាមេរិកលោក Antony Blinken នឹងទៅបំពេញទស្សនកិច្ចនៅប្រទេសប៉ាពួញូហ្គីណេនៅថ្ងៃទី ២១ ដល់ថ្ងៃទី ២២ ខែឧសភា ដើម្បីចុះហត្ថលេខាលើកិច្ចព្រមព្រៀងការពារជាតិ និងសន្តិសុខដែនសមុទ្រទ្វេភាគី និងជួបជាមួយមេដឹកនាំវេទិកាកោះប៉ាស៊ីហ្វិក។
ដំណើរទស្សនកិច្ចនេះធ្វើឡើងបន្ទាប់ពីលោកប្រធានាធិបតីអាមេរិក Joe Biden បានដកខ្លួនចេញពីដំណើរទស្សនកិច្ចដែលបានគ្រោងទុក។
វិបត្តិដែលផ្ទុះឡើងជុំវិញពិដានបំណុលរបស់សហរដ្ឋអាមេរិកបានជំរុញឱ្យលោក Biden កាលពីថ្ងៃអង្គារពន្យារពេលធ្វើដំណើរទៅប្រទេសប៉ាពួញូហ្គីណេ។
សហរដ្ឋអាមេរិកកំពុងព្យាយាមទប់ទល់នឹងការកើនឡើងនៃឥទ្ធិពលរបស់ចិននៅក្នុងតំបន់ឥណ្ឌូប៉ាស៊ីហ្វិក ហើយដំណើរទស្សនកិច្ចរបស់លោក Biden ត្រូវបានគេមើលឃើញថាជាផ្នែកនៃកិច្ចខិតខំប្រឹងប្រែងនោះ។
ក្រសួងការបរទេសបានឲ្យដឹងថាលោក Antony Blinken គ្រោងនឹងពិភាក្សាអំពីបញ្ហាជាច្រើនជាមួយមេដឹកនាំកោះប៉ាស៊ីហ្វិក រួមទាំងអាទិភាពរួមគ្នា ដូចជាការដោះស្រាយវិបត្តិអាកាសធាតុ និងការជំរុញកំណើនសេដ្ឋកិច្ចរួមបញ្ចូលសម្រាប់ប្រជាជននៃកោះប៉ាស៊ីហ្វិក។
