ឯកឧត្តម វ៉ា ថន៖ បច្ចុប្បន្ននេះ សេដ្ឋកិច្ចប្រជាជន មានការរីកចម្រើន និងមានឱកាសចូលរួមចំណែកកសាង និងអភិឌ្ឍន៍នូវហេរដ្ឋារចនាសម្ព័ន្ធរូបវន្ត័របស់ជាតិ ជាមួយរាជរដ្ឋាភិបាលឡើងវិញ

ភ្នំពេញ៖ ឯកឧត្តម វ៉ា ថន អភិបាលខេត្តក្រចេះ នាព្រឹកថ្ងៃសៅរ៍ ១កើត ខែជេស្ឋ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី២០ ខែឧសភា ឆ្នាំ២០២៣ បានអញ្ជើញកាត់ខ្សែបូរសម្ពោធឆ្លងនូវសមិទ្ធផលនានារួមមាន ៖ ដងទង់ របង ខ្លោងទ្វារ ចេតិយ គំនូរព្រះវិហារ រួមនិងសមិទ្ធផលនានាមួយចំនួនបន្ថែមទៀត ដែលសរុបថវិកាអស់ចំនួន៥០៧.៥៨០ ដុល្លាអាមេរិកក្នុងវត្តបទុមចារបឹងរៃ ស្ថិតក្នុងឃុំឬស្សីកែវ ស្រុកព្រែប្រសព្វ ខេត្តក្រចេះ។

ឯកឧត្តម វ៉ា ថន អភិបាលខេត្ត បានថ្លែងថា រាល់សមិទ្ធផលដែលកើតមានឡើងទាំងវិស័យអាណាចក្រ និងពុទ្ធចក្រ នៅទូទាំងប្រទេស និយាយជារួម និងនិយាយដោយឡែកនៅក្នុងខេត្តក្រចេះ គឺបន្ទាប់ពីប្រទេសជាតិមានសុខសន្តិភាព ស្ថេរភាព ក្រោមនយោបាយដឹកនាំប្រកបដោយគតិបណ្ឌិត របស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ដែលតែងតែគិតគូជានិច្ច ចំពោះសុខទុក្ខ និងការរស់នៅរបស់ប្រជាពលរដ្ឋទូទាំងប្រទេស មិនថាអ្នករស់នៅទីក្រុង ឬជនបទនោះឡើយ គឺឱ្យតែមានការលំបាកសម្តេច រួមនិងថ្នាក់ដឹកនាំគ្រប់ជាន់ថ្នាក់ តែងតែគិតគូដោះស្រាយជានិច្ច។ ហើយមកទល់បច្ចុប្បន្ននេះ សេដ្ឋកិច្ចប្រជាជន មានការរីកចម្រើនធូធារ និងមានឱកាសបានចូលរួមបានចំណែកជួយកសាង និងអភិឌ្ឍន៍នូវហេរដ្ឋារចនាសម្ព័ន្ធរូបវន្ត័របស់ជាតិ ជាមួយរាជរដ្ឋាភិបាលឡើងវិញ ជាពិសេសវិស័យពុទ្ធចក្រនេះ ឃើញថាមានការកសាងរីកដុះដាលទៅដល់គ្រប់ទីជនបទផងដែរ។

ឯកឧត្តម វ៉ា ថន បានបញ្ជាក់ថា យើងពិតជាសប្បាយរីករាយណាស់ ចំពោះសមិទ្ធផលទាំងឡាយ ដែលកើតមានឡើងនៅក្នុងវត្តឃុំឬស្សីកែវនេះ ព្រោះបានមកពីទឹកចិត្តបរិសុទ្ធជ្រះថ្លា ដែលជាកុសល និងការជឿជាក់ ចំពោះព្រះពុទ្ធសាសនា និងបានអំពាវនាវ ទៅដល់បងប្អូនប្រជាពលរដ្ឋ ពុទ្ធសាសនិក សូមឲ្យចូលរួមថែរក្សាទុកសមិទ្ធផលទាំងអស់នោះ ជាគុណប្រយោជន៍ និងសម្បត្តិរួមរបស់យើងទាំងអស់គ្នា ត្រូវចេះថែរក្សា ការពារមរកតរបស់ជាតិដែលកំពុងតែមាន រួមនិងបន្តកសាងនូវសមិទ្ធផលថ្មីៗបន្ថែមទៀតឲ្យមាននៅក្នុងមូលដ្ឋាន ។

បន្ថែមពីនោះ ត្រូវចូលរួមអនុវត្តន៍គោលនយោបាយ ភូមិ ឃុំ សង្កាត់ មានសុខសុវត្ថិភាពឱ្យបានទាំងអស់គ្នា និងគោរពដឹងគុណសម្តេចតេជោ ហ៊ុន សែន ដែលនាំមកនូវសុខសន្តិភាព និងការអភិវឌ្ឍន៍លើគ្រប់វិស័យ។

ក្នុងឱកាសនោះដែរ ឯកឧត្តម វ៉ា ថន អភិបាលខេត្ត បានចូលរួមបច្ច័យចំនួន ៣លានរៀល សម្រាប់កសាងទីវត្តអារាមផងដែរ ៕