អាចារ្យ អាចារ្យរិនី ចំនួន ១៨៥អង្គ/នាក់ ទទួលការតម្រង់ទិស បណ្តុះបណ្តាលតួនាទីភារកិច្ច និងក្រមសីលធម៌អាចារ្យខ្មែរ ពីក្រសួងធម្មការ និងសាសនា
ភ្នំពេញ៖ នាទីស្តីការក្រសួងធម្មការ និងសាសនា មានរៀបចំបើកវគ្គតម្រងទិសបណ្តុះបណ្តាលតួនាទី ភារកិច្ច និងក្រមសីលធម៌អាចារ្យខ្មែរជំនាន់ទី៤១ ក្រោមអធិបតីភាព ឯកឧត្តម សេង សុមុនី រដ្ឋលេខាធិការ និងជាតំណាង ឯកឧត្តម ឈិត សុខុន រដ្ឋមន្ត្រីក្រសួងធម្មការ និងសាសនា។
ឯកឧត្តម ស៊ិន សុវណ្ណនិ អគ្គនាយក នៃអគ្គនាយកដ្ឋានកិច្ចការសាសនា មានប្រសាសន៍លើកឡើងថា ដោយបានទទួលអនុសាសន៍ណែនាំប្រកបដោយគតិបណ្ឌិតពី សម្តេចអគ្គមហាសេនាបតីតេជោ ហ៊ុន សែន ស្តីពីវិបត្តិអាចារ្យខ្មែរកាលពីថ្ងៃទី៩ ខែតុលា ឆ្នាំ២០០៩ មក ក្រសួងធម្មការ និងសាសនា បានខិតខំស្រាវជ្រាវរកធនធានចាស់ព្រឹទ្ធាចារ្យ និងអាចារ្យដែលមានចំណេះដឹងពីកម្មវិធីនានា មានបទពិសោធន៍ជ្រៅជ្រះដើម្បីរៀបចំវគ្គបណ្តុះបណ្តាលតម្រង់ទិសអាចារ្យខ្មែរឱ្យមានការឯកភាពគ្នា ឈ្វេងយល់ពីគ្នា ផ្លាស់ប្តូរចំណេះដឹង និងបទពិសោធន៍ពីគ្នាទៅវិញទៅមក លើទម្រង់ពិធីកម្មផ្សេងៗ ដែលកប់នៅតាមមូលដ្ឋាននានា ក្នុងព្រះរាជាណាចក្រកម្ពុជា។ សិក្ខាមដែលមកទទួលការបណ្តុះបណ្តាលនាថ្ងៃនេះ មានចំនួន១៨៥អង្គ នាក់ ក្នុងនោះមានព្រះសង្ឃ២៣អង្គ និងស្ត្រី១នាក់។ សិក្ខាកាមទាំង១៨៥រូបនេះ មានជំនាញខុសៗគ្នា អាចារ្យកាន់ពេលាការចំនួន ៤៤រូប អាចារ្យយោគីចំនួន ៣២រូប អាចារ្យវត្តចំនួន ៧០រូប គណៈកម្មការវត្ត ១២រូប។ សិក្ខាកាមអាយុក្រោម ២៥ឆ្នាំមានចំនួន ១៤រូប ក្មេងជាងគេមានអាយុ ១៨ឆ្នាំមាន ១រូប និងសិក្ខាកាមអាយុលើស ៧០ឆ្នាំ មានចំនួន ១១រូប និងមានសិក្ខាកាម វ័យចំណាស់ជាងគេអាយុ ៧៩ឆ្នាំមាន ១នាក់ សិក្សាលើមុខវិជ្ជាចំនួន ១១មុខវិជ្ជា។
មានប្រសាសន៍បើកវគ្គបណ្តុះបណ្តាលនាឱកាសនេះ ឯកឧត្តម សេង សុមុនី តំណាងឯកឧត្តមរដ្ឋមន្ត្រីក្រសួងធម្មការ និងសាសនា សូមកោតសរសើរនិងវាយតម្លៃខ្ពស់ចំពោះថ្នាក់ដឹកនាំ មន្ត្រីរាជការទាំងអស់ដែលបានខិតខំប្រឹងប្រែងយកចិត្តទុកដាក់ធ្វើយ៉ាងណាឱ្យវគ្គបណ្តុះបណ្តាលដ៏មានសារៈសំខាន់នេះអាច ដំណើរការទៅបាន។ កិច្ចការងារនេះគឺការចូលរួមចំណែកកសាងធនធានមនុស្ស និងលើកស្ទួយវិស័យវប្បធម៌ សាសនាជាពិសេសគឺការចែករំលែកចំណេះដឹង ដើម្បីតម្រងទិសរបៀបរបបរៀបចំពិធីមង្គល និងពិធីបុណ្យ ផ្សេងៗដោយមានការចូលរួមយ៉ាងសកម្មប្រកបដោយស្មារតីព្យាយាម យកចិត្តទុកដាក់និងឆន្ទះមុះមុតរបស់គ្រូឧទ្ទេសគ្រប់រូបក្នុងការបង្ហាត់បង្រៀន ផ្ទេរចំណេះដឹងដើម្បីបំពេញបន្ថែមនូវចំណេះដឹង ចំណេះធ្វើ ដល់សិក្ខាកាមអាចារ្យរហូតដល់ទទួលបានជាគុណប្រយោជន៍ដ៏ធំធេង។
ឯកឧត្តម សេង សុមុនី រដ្ឋលេខាធិការ មានប្រសាសន៍បន្តទៀតថា កិច្ចការដែលយើងបាននិងកំពុង ធ្វើនេះ គឺពិតជារក្សាបាននូវការអភិរក្សមរតកប្រពៃណីទំនៀមទម្លាប់ វប្បធម៌ អរិយធម៌ ជាតិដ៏យូរលង់របស់ ដូនតាខ្មែរយើង។ សម្បត្តិធនធាន និងកេរមរតកទាំងអស់នេះ គឺជាសម្បត្តិសង្គមដ៏ចាំបាច់ និងមានតម្លៃមិន អាចកាត់ថ្លៃបានសម្រាប់ការកសាងសង្គមកម្ពុជា ដែលមានកោសិកាផ្សារភ្ជាប់គ្នាយ៉ាងរ៉ឹងមាំ។
តាមរយៈវគ្គបណ្តុះបណ្តាលនេះ ឯកឧត្តម សេង សុមុនី សង្ឃឹមថា សិក្ខាកាមរបស់យើងនឹងទទួលបាននូវចំណេះដឹង និងចំណេះធ្វើពិតប្រាកដ ហើយយកទៅអនុវត្តដើម្បីបានជាប្រយោជន៍ដល់សង្គម ក្នុងនោះរួមទាំងការអប់រំ ឬ ការប្រៀនប្រដៅកូនចៅថើម្បីពត់ចិត្តគំនិត មនោសញ្ចេតនា ឱ្យស្គាល់ពីតម្លៃនៃសីលធម៌ ចរិយាធម៌ដ៏ខ្ពង់ខ្ពស់ ដែលជាកេរមរតកដូនតា និងការប្រព្រឹត្តទៅតាមគន្លងធម៌ នៃព្រះពុទ្ធសាសនារបស់យើងផងដែរ។
