សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ឧបត្ថម្ភថវិការចូលរួមរំលែកទុក្ខគ្រួសារសពកុមារដែលលង់ទឹកស្លាប់ចំនួន ២នាក់ នៅស្រុកថាឡាបរិវ៉ាត់ ខេត្តស្ទឹងត្រែង

ភ្នំពេញ៖ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា នៅរសៀលថ្ងៃទី២២ ខែឧសភា ឆ្នាំ២០២៣ បានចាត់ឱ្យគណៈប្រតិភូ សាខាកាកបាទក្រហមកម្ពុជា ខេត្តស្ទឹងត្រែង ដឹកនាំដោយ លោកស្រី សន សុខា អនុអចិន្ត្រៃយ៍ តំណាង ឯកឧត្តម ស្វាយ សំអ៊ាង ប្រធានគណៈកម្មាធិការសាខាកាកបាទក្រហមកម្ពុជា ខេត្តស្ទឹងត្រែង និងសហការី នាំយកថវិកាសម្តេចកិត្តិព្រឹទ្ធបណ្ឌិតប្រធាន ចូលរួមរំលែកទុក្ខគ្រួសារនៃសពកុមារលង់ទឹកស្លាប់ចំនួន ២នាក់ នៅភូមិស្រែឫស្សី ឃុំស្រែឫស្សី ស្រុកថាឡាបរិវ៉ាត់ ខេត្តស្ទឹងត្រែង កាលពីថ្ងៃទី ២០ ខែ ឧសភា ឆ្នាំ ២០២៣។

កុមាររងគ្រោះទាំង២នាក់នោះរួមមាន៖
១- ឈ្មោះ សុត ផានេត ភេទស្រី អាយុ ១២ឆ្នាំ
២- ឈ្មោះ សុត ផានឿន ភេទស្រី អាយុ ៦ឆ្នាំ ។

ស្ថិតក្នុងសមានទុក្ខដ៏ក្រៀមក្រំនោះ លោកស្រី សន សុខា បានពាំនាំប្រសាសន៍សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងឯកឧត្តម ស្វាយ សំអ៊ាង ប្រធានគណៈកម្មាធិការសាខា ដែលមានខ្លឹមសារថា «ខ្ញុំ និងសហការី នៃកាកបាទក្រហមកម្ពុជា សូមចូលរួមរំលែកទុក្ខយ៉ាងក្រៀមក្រំបំផុត ជាមួយក្រុមគ្រួសារនៃសព ចំពោះមរណភាពដ៏សែនរន្ធត់ នៃកុមារទាំង២ នាក់ និងសូមឧទ្ទិសបួងសួងជូនដួងវិញ្ញាណក្ខន្ធកុមារទាំង២នាក់ បានទៅកាន់សុគតិភព កុំបីឃ្លៀងឃ្លាតឡើយ។

ជាមួយគ្នានេះលោកស្រី ក៏បានផ្តាំផ្ញើបន្ថែមថា សូមបងប្អូនដែលមានកូនតូចៗ សូមមានការប្រុងប្រយ័ត្នចំពោះកូនចៅ កុំឲ្យទៅលេងទឹកស្រះ ទន្លេ ឬត្រពាំង ក្រែងមានករណីលង់ទឹកដូចជាពេលនេះ ដែលបន្សល់នៅការសោកស្តាយ និងក្តីឈឹចាប់ដោយសារការបាត់បង់សមាជិកក្នុងគ្រួសារជាទីស្រលាញ់របស់យើង។

សម្ភារ និងថវិកា ដែលបានចូលរួមជាមួយគ្រួសារសព រួមមាន៖ថវិកាសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ចំនួន ៥ លានរៀល ក្នុង១សព៕