ឯកឧត្តម ហ៊ុន ម៉ានី អំពាវនាវឱ្យភាគីវៀតណាមបន្តលើកទឹកចិត្តដល់វិនិយោគិនឱ្យមកធ្វើការបណ្តាក់ទុនកាន់តែច្រើននៅកម្ពុជា
ភ្នំពេញ៖ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានអំពាវនាវឱ្យភាគីវៀតណាមបន្តលើកទឹកចិត្តដល់វិនិយោគិនឱ្យមកធ្វើការបណ្តាក់ទុនកាន់តែច្រើននៅកម្ពុជា។
នារសៀលថ្ងៃទី២៤ ខែឧសភា ឆ្នាំ២០២៣ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានទទួលជួបពិភាក្សាការងារទ្វេភាគី ជាមួយគណៈប្រតិភូគណៈកម្មាធិការជាតិសម្រាប់យុវជនវៀតណាម ដឹកនាំដោយ ឯកឧត្តម Bui Quang Huy ប្រធានគណៈកម្មាធិការជាតិសម្រាប់យុវជនវៀតណាម នៅទីស្នាក់ការកណ្តាល ស.ស.យ.ក. ។
ក្នុងជំនួបនាឱកាសនោះ ភាគីទាំង២ បានធ្វើការផ្លាស់ប្តូរនូវការអបអរសាទរទៅវិញទៅមកចំពោះសមិទ្ធផលដែលស្ថាប័នទាំង២បានសម្រេចបានក្នុងរយៈពេលកន្លងទៅ ជាពិសេសភាគីវៀតណាមបានចូលរួមអបអរសាទរជោគជ័យនៃការរៀបចំព្រឹត្តិការណ៍កីឡាស៊ីហ្គេមលើកទី៣២ ដែលក្នុងនោះក៏មានការចូលរួមចំណែករបស់ ស.ស.យ.ក. ក៏ដូចជាការសម្រេចបានឯតទគ្គកម្មពិភពលោកចំនួន ២ ក្នុងព្រឹត្តិការណ៍អង្គរសង្រ្កាន្តកាលពីពេលកន្លងទៅ។
ឯកឧត្តម ហ៊ុន ម៉ានី ក៏បានថ្លែងអំណរគុណចំពោះភាគីវៀតណាមដែលបានចូលរួមអបអរសាទរនូវសមិទ្ធផលដែលកម្ពុជាសម្រេចបាន។
ឯកឧត្តមក៏បានអំពាវនាវឱ្យភាគីវៀតណាមបន្តលើកទឹកចិត្តដល់វិនិយោគិនឱ្យមកធ្វើការបណ្តាក់ទុនកាន់តែច្រើនដើម្បីជំរុញការអភិវឌ្ឍសេដ្ឋកិច្ចរបស់ប្រទេសទាំង២។
ភាគីទាំង២បានប្តេជ្ញាចិត្តក្នុងការរិតចំណងសហប្រតិបត្តិការឱ្យកាន់តែរឹងមាំ តាមរយៈការផ្លាស់ប្តូរទស្សនកិច្ចគណៈប្រតិភូយុវជនទៅវិញទៅមក និងការស្វែងរកកាលានុវត្តភាពសម្រាប់គម្រោងរួមគ្នាបន្ថែមទៀត៕
