មជ្ឈមណ្ឌលសហគមន៍ទេសចរណ៍ធម្មជាតិរលាក់កងជើង នឹងចូលរួមផ្ដល់នូវបរិយាកាសការងារ ដ៏ល្អជូនសហគមន៍ក្នុងដំណើរការងារប្រចាំថ្ងៃ       

ភ្នំពេញ៖ កាលពីថ្ងៃទី២៥ ខែឧសភា ឆ្នាំ២០២៣ ឯកឧត្តម សៅ សុភាព រដ្ឋលេខាធិការនិងជាប្រធានអង្គភាពអនុវត្តគម្រោង «និរន្តរភាពតំបន់ទេសភាព និងទេសចរណ៍ធម្មជាតិកម្ពុជា» បានអញ្ជើញជាអធិបតីក្នុងពិធីបញ្ចុះបឋមសិលាសាងសង់ស្នាក់ការមជ្ឈមណ្ឌលសហគមន៍ទេសចរណ៍ធម្មជាតិរលាក់កងជើង ស្ថិតក្នុងឧទ្យានជាតិជួរភ្នំក្រវាញកណ្ដាល ភូមិសាស្រ្តភូមិតាំងបំពង់ ឃុំតាសាល ស្រុកឱរ៉ាល់ ខេត្តកំពង់ស្ពឺ។

ពិធីនេះមានការអញ្ជើញចូលរួមពីលោក លោក ឃិន ម៉េងឃាង ប្រធាននាយកដ្ឋានទេសចរណ៍ធម្មជាតិ និងជាប្រធានគ្រប់គ្រងគម្រោង លោក ហុង តរ៉ាវុធ ប្រធាននាយកដ្ឋានអភិរក្សធម្មជាតិដីគោកខាងត្បូងបឹងទន្លេសាប លោក ឱម ម៉ាក់ធារី ប្រធានមន្ទីរបរិស្ថានកំពង់ស្ពឺ តំណាងរដ្ឋបាលខេត្តកំពង់ស្ពឺ តំណាងរដ្ឋបាលស្រុកឱរ៉ាល់ ក្រុមការងារអនុវត្តគម្រោង អាជ្ញាធរមូលដ្ឋាន និងប្រជាសហគមន៍ សរុបចំនួន ៤៣នាក់។

មជ្ឈមណ្ឌសហគមន៍ទេសចរណ៍ ដែលត្រូវសាងសង់នេះ នឹងចូលរួមផ្ដល់នូវបរិយាកាសការងារ ដ៏ល្អ ជូនសហគមន៍ក្នុងដំណើរការងារប្រចាំថ្ងៃ ជាមជ្ឈមណ្ឌផ្តល់និងផ្លាស់ប្ដូរព័ត៌មាន ទីតាំងសម្រាប់រៀបចំកិច្ចប្រជុំ និងផ្តល់ការបណ្តុះបណ្តាលនានា និងធ្វើជាទីកន្លែងប្រកបដោយសុវត្ថិភាពសម្រាប់រក្សាទុកសម្ភារៈ។

មជ្ឈមណ្ឌសហគមន៍ទេសចរណ៍ ប្រើប្រាស់ជាអាគាររដ្ឋបាល ដោយត្រូវរៀបចំឱ្យមានជាការិយាល័យ មួយចំនួន និងបន្ទប់ទឹកភ្ញៀវទេសចរណ៍៕