ក្រសួងការពារជាតិរុស្សុី៖ កងកម្លាំងរុស្ស៊ីបានស្ទាក់ចាប់មីស៊ីល Storm Shadow របស់អង់គ្លេសបានចំនួនពីរគ្រាប់
ម៉ូស្គូ៖ ក្រសួងការពារជាតិរុស្ស៊ីបានឲ្យដឹងកាលពីថ្ងៃសៅរ៍ថា កងកម្លាំងរុស្ស៊ីបានស្ទាក់ចាប់កាំជ្រួចមីស៊ីលរយៈចម្ងាយឆ្ងាយរបស់ Storm Shadow បានចំនួនពីរដែលផ្គត់ផ្គង់ដល់ប្រទេសអ៊ុយក្រែនដោយចក្រភពអង់គ្លេស។
ក្រសួងក្រសួងការពារជាតិរុស្ស៊ីក៏បានបន្តផងដែរថា ខ្លួនបានស្ទាក់ចាប់បានកាំជ្រួច HIMARS ដែលផលិតដោយសហរដ្ឋអាមេរិក និង HARM ហើយបានបាញ់ទម្លាក់យន្តហោះគ្មានមនុស្សបើកចំនួន ១២ គ្រឿងក្នុងរយៈពេល ២៤ ម៉ោងចុងក្រោយនេះ។
ប្រទេសរុស្ស៊ីមិនបានបញ្ជាក់ពីកន្លែងដែលការស្ទាក់ចាប់បានកើតឡើងនោះទេ ប៉ុន្តែបានធ្វើសេចក្តីប្រកាសនៅក្នុងសន្និសីទសារព័ត៌មានប្រចាំថ្ងៃរបស់ក្រសួងការពារជាតិរបស់ខ្លួន ដែលជាកន្លែងដែលវាផ្តល់ព័ត៌មានថ្មីៗអំពីអ្វីដែលខ្លួនហៅថា “ប្រតិបត្តិការយោធាពិសេស” របស់ខ្លួននៅអ៊ុយក្រែន។
ក្រសួងការពារជាតិអ៊ុយក្រែនមិនបានឆ្លើយតបភ្លាមៗចំពោះសំណើសុំការអត្ថាធិប្បាយទេ។ មន្ត្រីក្រុង Kyiv ធ្លាប់បានបញ្ជាក់ថា សព្វាវុធដែលផ្គត់ផ្គង់ដោយលោកខាងលិច នឹងត្រូវប្រើប្រាស់ទាំងស្រុង ប្រឆាំងនឹងកងកម្លាំងរុស្ស៊ី នៅក្នុងប្រទេសអ៊ុយក្រែន។
ការវាយប្រហារដោយយន្តហោះគ្មានមនុស្សបើកត្រូវបានកត់ត្រាយ៉ាងជ្រៅនៅក្នុងទឹកដីរុស្ស៊ីកាលពីថ្ងៃសៅរ៍ ដោយវាយប្រហារទៅលើការដំឡើងបំពង់បង្ហូរប្រេង។ រុស្ស៊ីមានទំនោរស្តីបន្ទោសការវាយប្រហារបែបនេះទៅលើទីក្រុង Kyiv ទោះបីជាអ៊ុយក្រែនមិនបានទទួលស្គាល់ជាសាធារណៈនូវការវាយប្រហារប្រឆាំងនឹងគោលដៅនៅក្នុងប្រទេសរុស្ស៊ីក៏ដោយ។
ប្រភព៖ News yahoo
ប្រែសម្រួលដោយ៖ [ឡាយ លីហួ]
