នាយឧត្តមសេនីយ៍ ខៀវ សុភ័គ៖ ពន្ធនាគារទាំងអស់បើកទ្វាររង់ចាំមេដឹកនាំអតីតបក្សសង្រ្គោះជាតិដែលរឹងក្បាល ក្នុងនោះមានទាំង រ៉ុង ឈុន ដែលព្រមានធ្វើបាតុកម្ម

ភ្នំពេញ៖ រដ្ឋលេខាធិការ និងជាអ្នកនាំពាក្យក្រសួងមហាផ្ទៃ  នាយឧត្តមសេនីយ៍ ខៀវ សុភ័គ បញ្ជាក់ឱ្យដឹងថា ពន្ធនាគារទាំងអស់បើកទ្វាររង់ចាំពួកមេដឹកនាំអតីតបក្សសង្រ្គោះជាតិដែលរឹងក្បាល ក្នុងនោះមានទាំង រ៉ុង ឈុន អនុប្រធានគណបក្សភ្លើងទៀន ដែលព្រមានធ្វើបាតុកម្ម។

នាយឧត្តមសេនីយ៍ បានបញ្ជាក់យ៉ាងដូច្នេះថា “យើងត្រៀមអនុវត្តវិធានការរបស់រាជរដ្ឋាភិបាល ដែលសេចក្តីណែនាំរបស់សម្តេចតេជោ នៅជាធរមាននៅឡើយ នរណាដែលដឹកនាំប្រជាពលរដ្ឋ បះបោរធ្វើបាតុកម្ម អ្នកនោះនឹងទទួលខុសត្រូវចំពោះមុខច្បាប់”។

នាយឧត្តមសេនីយ៍ បន្តថា “ពន្ធនាគារទាំងអស់បើកទ្វាររង់ចាំពួកមេដឹកនាំអតីតបក្សសង្រ្គោះជាតិដែលរឹងក្បាល ក្នុងនោះមានទាំង រ៉ុង ឈុន ផងដែរ»។ លោកបន្តថា៖ «នៅក្នុងគណបក្សគាត់ក៏មិនមានការឯកភាពគ្នាដែរទេ គឺមានតែ រ៉ុង ឈុន មួយប៉ុណ្ណោះ ដែលទាមទារធ្វើបាតុកម្ម ដែលធ្វើទៅតាមការញុះញង់ពីទណ្ឌិតនៅក្រៅប្រទេស បើធ្វើតាមនោះគណបក្សនឹងត្រូវរំលាយ ដែលពួកគេបាត់បង់ទាំងសមាជិកក្រុមប្រឹក្សាឃុំសង្កាត់ និងការបោះឆ្នោតខាងមុខទៀត”។

កាលពីថ្ងៃទី២៩ ខែឧសភា ឆ្នាំ២០២៣ លោក រ៉ុង ឈុន អនុប្រធានគណបក្សភ្លើងទៀន បានប្រកាសថា គណបក្សនេះគ្រោងប្រមូលផ្តុំសមាជិក និងអ្នកគាំទ្រប្រមាណ១ម៉ឺននាក់ នៅទីលានប្រជាធិបតេយ្យ ដើម្បីតស៊ូមតិទាមទារឱ្យគ.ជ.ប អនុញ្ញាតឱ្យគណបក្សនេះចូលរួមការបោះឆ្នោតជាតិជ្រើសតាំងតំណាងរាស្រ្ត អាណត្តិទី៧ នាខែកក្កដាខាងមុខនេះឡើងវិញ។
ទោះជាយ៉ាងនេះក្តី សម្តេចតេជោ ហ៊ុន សែន កាលពីថ្ងៃទី១៣ ខែឧសភា ឆ្នាំ២០២៣ បានអំពាវនាវឲ្យអ្នកគាំទ្រគណបក្សភ្លើងទៀន ត្រូវរក្សាភាពស្ងៀមស្ងាត់ និងកុំធ្វើតាមការអំពាវនាវ ព្រមទាំងសកម្មភាពរបស់មេដឹកនាំគណបក្សភ្លើងទៀនឲ្យសោះ។

ជាមួយគ្នានេះ សម្តេចតេជោ ហ៊ុន សែន បានចេញបទបញ្ជាឲ្យអាជ្ញាធរ និងកងកម្លាំងប្រដាប់អាវុធត្រូវចាត់វិធានការជាបន្ទាន់ មិនឲ្យប្រមូលផ្តុំតវ៉ានោះឡើយ ដោយត្រូវចាប់ខ្លួនភ្លាមៗចំពោះមេដឹកនាំគណបក្សភ្លើងទៀន ទាំងថ្នាក់ដឹកនាំជាតិ និងថ្នាក់ក្រោមជាតិ៕