ការវាយប្រហារដោយយន្តហោះគ្មានមនុស្សបើកលើទីក្រុងម៉ូស្គូ ជាសញ្ញាច្បាស់លាស់នៃសកម្មភាពភេរវករ
ម៉ូស្គូ៖ទីភ្នាក់ងារព័ត៌មានចិនស៊ិនហួ បានចុះផ្សាយនៅថ្ងៃទី៣០ ខែឧសភាថា ការវាយប្រហារដោយយន្តហោះគ្មានមនុស្សបើក ប្រឆាំងនឹងហេដ្ឋារចនាសម្ព័ន្ធស៊ីវិលនៅទីនេះ គឺជា “សញ្ញាច្បាស់លាស់នៃសកម្មភាពភេរវកម្ម” ប្រធានាធិបតីរុស្ស៊ី លោក វ្ល៉ាឌីមៀ ពូទីន បាននិយាយកាលពីថ្ងៃអង្គារ។យោងតាមសេចក្តីប្រកាសព័ត៌មានដែលចេញផ្សាយដោយវិមានក្រឹមឡាំង លោក ពូទីន បាននិយាយថា ក្រុងគៀវបានជ្រើសរើសផ្លូវផ្សេង ពោលគឺព្យាយាមបំភិតបំភ័យរុស្ស៊ី និងពលរដ្ឋរបស់ខ្លួន និងវាយប្រហារអគារលំនៅដ្ឋានក្នុងស្រុក។លោកបានបន្តថា៖ «ពួកគេញុះញង់ឲ្យយើងឆ្លុះបញ្ចាំងសកម្មភាព។ ចាំមើលថាតើត្រូវធ្វើដូចម្តេចចំពោះវា»។
រដ្ឋមន្ត្រីក្រសួងការពារជាតិរុស្ស៊ី លោក Sergei Shoigu បាននិយាយនៅមុននេះបន្តិចថា កងកម្លាំងប្រដាប់អាវុធរុស្ស៊ីកំពុងមានប្រតិកម្ម “យ៉ាងខ្លាំងក្លាតាមដែលអាចធ្វើទៅបាន ចំពោះការវាយប្រហារភេរវកម្មរបស់ពួកសកម្មប្រយុទ្ធអ៊ុយក្រែន”។ភាគីអ៊ុយក្រែនបានបដិសេធការជាប់ពាក់ព័ន្ធផ្ទាល់ក្នុងការវាយប្រហារលើក្រុងម៉ូស្គូ។អភិបាលក្រុងមូស្គូលោក Sergei Sobyanin បាននិយាយថា អគារជាច្រើនក្នុងទីក្រុងមូស្គូបានរងការខូចខាតបន្តិចបន្តួចដោយសារការវាយប្រហារដោយយន្តហោះគ្មានមនុស្សបើកនៅពេលព្រឹកព្រលឹម ដោយបន្ថែមថា មិនមានរបាយការណ៍ភ្លាមៗអំពីរបួសធ្ងន់ធ្ងរនោះទេ។
ប្រភពព័ត៌មានៈXinhua
ប្រែសំរួលដោយៈកញ្ញា យ៉េន សុវណ្ណារ៉ា
