ឯកឧត្តម អ៊ុំ រាត្រី៖ ភាពខ្លាំងនៃខេត្តបន្ទាយមានជ័យ មានផ្ទៃដីបង្កបង្កើនផល សរុបរហូតទៅដល់ ៣៦៣,៦៥៧ហិតា

ភ្នំពេញ៖ ភាពខ្លាំងនៃខេត្តបន្ទាយមានជ័យមានផ្ទៃដីបង្កបង្កើនផលសរុបរហូតទៅដល់ ៣៦៣,៦៥៧ហិតា ស្មើរហ្នឹង ៥៤.៤% នៃផ្ទៃដីសរុបមានលក្ខណៈអំណោយផលដល់វិស័យកសិកម្ម។ មានតំបន់ទេសចរណ៍សំបូរបែប ដោយសម្បត្តិធម្មជាតិ និងសម្បត្តិវប្បធម៌ប្រវត្តិសាស្ត្រ ដែលជារមណីយដ្ឋានទេសចរណ៍ ដូចជាប្រាសាទបុរាណ ភ្នំ ស្ទឹង ដងអូរ មានខ្យល់អាកាសបរិសុទ្ធល្អ សកម្មភាព សេវាកម្ម ពាណិជ្ជកម្ម សេដ្ឋកិច្ច ក្រុងប៉ោយប៉ែត បានបង្កភាពងាយស្រួលសម្រាប់សកម្មភាពពាណិជ្ជកម្មរវាងភាគីកម្ពុជា-ថៃ ក្នុងការដឹកជញ្ជូននាំចេញ នាំចូល នូវទំនិញ ផលិតផលដំណាំកសិកម្ម ដើម្បីបំពេញតម្រូវការរវាងប្រទេសទាំង០២។ ចំណុចខ្លាំងមួយទៀតសម្រាប់ខេត្តបន្ទាយមានជ័យគឺ ការវិនិយោគិនជាច្រើនបានវិនិយោគនៅតំបន់ក្រុងប៉ោយប៉ែត ព្រមទាំងការរីកដុះដាលផ្សារទំនើប សណ្ឋាគារ កាស៊ីណូ អាគារធំៗ ដែលធ្វើឱ្យខេត្តបន្ទាយមានជ័យ មានប្រាក់ចំណូលកើនឡើងជាលំដាប់ និងជាខេត្តមានសក្តានុពលផ្នែកសេដ្ឋកិច្ចខ្ពស់ផងដែរ។

នេះគឺជាការលើកឡើងរបស់ឯកឧត្តម អ៊ុំ រាត្រី អភិបាលខេត្តបន្ទាយមានជ័យបានមានប្រសាសន៍ នៅថ្ងៃទី០១ ខែមិថុនាឆ្នាំ២០២៣ ក្នុងកិច្ចប្រជុំពីគ្រោះយោបល់លើសេចក្តីព្រាងរបាយការណ៍វិភាគចំណុចខ្លាំង ចំណុចខ្សោយ កាលានុវត្តភាពនិងការគំរាម ស្វត (SWOT) នៃខេត្តបន្ទាយមានជ័យ ដែលរៀបចំធ្វើនៅមន្ទីរសេដ្ឋកិច្ច និងហិរញ្ញវត្ថុខេត្ត និងដោយមានការអញ្ជើញចូលរួមពីថ្នាក់ដឹកនាំមន្ទីរអង្គភាពជុំវិញខេត្ត។

លោក បឹង គឹមស៊ឹង ប្រធានមន្ទីរសេដ្ឋកិច្ច និងហិរញ្ញវត្ថុខេត្ត បានមានប្រសាសន៍ថា៖ កិច្ចប្រជុំនាថ្ងៃនេះមានសារៈសំខាន់ណាស់ចំពោះលោក លោកស្រី ប្រធានមន្ទីរ អង្គភាព ជំនាញដែលត្រូវធ្វើការវិភាគចំណុចខ្លាំង ចំណុចខ្សោយ ដែលហៅកាត់ថាស្វត Swot ។

លោក បឹង គឹមស៊ឹង បន្តថា ស្វត (Swot ) ត្រូវបានគេបង្កើត និងធ្វើការណែនាំឲ្យប្រើប្រាស់ក្នុងឆ្នាំ ១៩៦០ មកម្ល៉េះហើយស្វត Swot ជាវិធីសម្រាប់វិភាគនូវសក្តានុពល និងកត្តាប្រឈម ក្នុងស្ថាប័ន អង្គភាព ហើយជាជំហ៊ានដំបូងដែលអាចជួយឲ្យយើងបង្កើតផែនការសកម្មភាព ដោយប្រសិទ្ធភាពនិងជួយជំរុញការយល់ដឹង អំពីភាពខ្លាំង (ចំណុចវិជ្ជមាន) ភាពខ្សោយ(ចំណុចអវិជ្ជមាន) កាលានុវត្តភាព(ចំណុចសក្តានុពល) និងការគំរាម (ជាចំណុចប្រឈម)។

ជាមួយគ្នានោះដែរ ឯកឧត្តម អ៊ុំ រាត្រី បានបញ្ជាក់ដែរថា៖ ក្រៅពីចំណុចខ្លាំងក៏នៅមានចំណុចខ្សោយ និងការគំរាមផងដែរ រួមមានអត្រាភាពក្រីក្រ របស់ប្រជាពលរដ្ឋខេត្តបន្ទាយមានជ័យនៅមានកម្រិតខ្ពស់ ដែលភាពក្រីក្រនេះត្រូវបានចាត់ទុកជាបន្ទុកមួយ ត្រូវដោះស្រាយ ហេដ្ឋារចនាសម្ព័ន្ធមួយចំនួន ត្រូវបានខូចខាតវិញដោយសារការបំផ្លាញពីកត្តាធម្មជាតិ ប្រព័ន្ធធារាសាស្ត្រ ប្រឡាយមេនិងអាងស្តុបទឹក ពុំទាន់មានគ្រប់គ្រាន់ អត្រាគ្រោះថ្នាក់ចរាចរណ៍នៅមានកម្រិតខ្ពស់នៅឡើយ និងអត្រាគ្រោះថ្នាក់ដោយសារគ្រប់យុទ្ធភ័ណ្ឌមិនទាន់ផ្ទុះ នៅតែមានបញ្ហាគួរឲ្យកត់សម្គាល់ មូលហេតុសកម្មភាពបោសសំអាតមីន មិនទាន់បានគ្រប់ជ្រុងជ្រោយហើយថវិកាគាំទ្រ ក្នុងវិស័យនេះមានការធ្លាក់ចុះ ៕