ឯកឧត្តមឧត្តមសេនីយ៍ឯក ម៉ៅ សុផាន់ ប្រគល់រថយន្តសង្គ្រោះបន្ទាន់ និងបំពាក់ម៉ាស៊ីនរាវមីន ជូនកងបោសសម្អាតមីនកងទ័ពជើងគោក
ភ្នំពេញ៖ នៅបញ្ជាការដ្ឋានកងទ័ពជើងគោក ព្រឹកថ្ងៃទី៥ ខែមិថុនា ឆ្នាំ២០២៣ ឯកឧត្តម ឧត្តមសេនីយ៍ឯក ម៉ៅ សុផាន់ មេបញ្ជាការ-ស្តីទី កងទ័ពជើងគោក បានប្រគល់រថយន្តសង្គ្រោះបន្ទាន់ អំណោយដ៏ថ្លៃថ្លារបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត តាមរយៈឯកឧត្តមបណ្ឌិត ហ៊ុន ម៉ាណែត និងបំពាក់ម៉ាស៊ីនរាវមីន អំណោយរបស់ ឯកឧត្តមបណ្ឌិត ហ៊ុន ម៉ាណែត ជូនដល់កងបោសសម្អាតមីនកងទ័ពជើងគោក។
ថ្លែងក្នុងពិធីប្រគល់ រថយន្តសង្គ្រោះបន្ទាន់ និងម៉ាស៊ីនរាវមីន ដល់ក្រុមប្រតិបត្តិករបោសសម្អាតមីន កងទ័ពជើងគោក ឧត្តមសេនីយ៍ឯក ម៉ៅ សុផាន់ បានសម្តែងនូវការកោតសរសើរដល់ គណៈកម្មការគ្រប់គ្រងសកម្មភាពបោសសម្អាតមីន កាកសំណល់សង្គ្រាម និងយុទ្ធភណ្ឌមិនទាន់ផ្ទុះកងទ័ពជើងគោក និង បានកោតសរសើរ ចំពោះបណ្តាកងឯកភាពដែលមានកម្លាំងចូលរួម បោសសម្អាតមីនក្នុងទូទាំងបញ្ជាការដ្ឋាន កងទ័ពជើងគោក ដែលរយៈកាលកន្លងមក បានឈានទៅសម្រេចភារកិច្ចស្នូលរបស់ខ្លួន ពិសេសការបោសសម្អាតមីនមនុស្សធម៌ ក្រោមមូលបទ * ផ្តល់ដីសុវត្ថិភាព បង្កើតស្នាមញញឹម «ឆ្នាំ២០២៥ អស់គ្រាប់មីននៅកម្ពុជា» ។
ឧត្តមសេនីយ៍ឯក ម៉ៅ សុផាន់ បានបញ្ជាក់ថា៖ ដោយបានការយកចិត្តទុកដាក់ពីប្រមុខរាជរដ្ឋាភិបាល ដឹកនាំដោយ សម្តេច តេជោ ហ៊ុន សែន ជានិច្ចកាល សម្តេចមានចក្ខុវិស័យដើម្បីដឹកនាំ និងការអភិវឌ្ឍន៍ប្រទេសជាតិជារួម និងដោយឡែកលើវិស័យបោសម្អាតមីន ដើម្បីរំដោះផ្ទៃដី និងលុបបំបាត់ភាពក្រីកជូនប្រជាពលរដ្ឋ ។
ឧត្តមសេនីយ៍ឯក ម៉ៅ សុផាន់ បានបញ្ជាក់បន្ថែមថា៖ គណៈកម្មការគ្រប់គ្រងសកម្មភាពបោសសម្អាតមីន កាកសំណល់សង្គ្រាម និងយុទ្ធភណ្ឌមិនទាន់ផ្ទុះកងទ័ពជើងគោក (គ.ប.ម.គ) បានបង្កើតឡើងនៅថ្ងៃទី០២ ខែកុម្ភៈ ឆ្នាំ២០២២ ដែលមាន ឯកឧត្តម នាយឧត្តមសេនីយ៍ បណ្ឌិត ហ៊ុន ម៉ាណែត ជាប្រធាន និង មាន០៤ ក្រុមការងារធ្វើជាសេនាធិការ។
ឧត្តមសេនីយ៍ឯក ម៉ៅ សុផាន់ បានសង្កត់ធ្ងន់ថា៖ តាមរយៈលទ្ធផល នៃការបោសសម្អាតមីន មនុស្សធម៌ ក្រោមមូលបទ “ ផ្តល់ដីសុវត្ថិភាពបង្កើតស្នាមញញឹម ” កន្លងមក គណៈកម្មការគ្រប់គ្រងសកម្មភាពបោសសម្អាតមីន កាកសំណល់សង្គ្រាម និងយុទ្ធភណ្ឌមិនទាន់ផ្ទុះ កងទ័ពជើងគោក បានសម្រេចនូវជោគជ័យយ៉ាងត្រចះត្រចង់ ដោយបានផ្តល់សុវត្ថិភាពដល់មនុស្ស សត្វបានល្អ សន្សំសំចៃថវិកា ធ្វើឱ្យប្រជាពលរដ្ឋមានទឹកចិត្តរីករាយ ក្នុងការបង្កបង្កើនផល។ នេះជាមោទភាព ដែលកងទ័ពជើងគោក បានចូលរួមការអនុវត្តន៍លើវិស័យបោសសម្អាតមីន ដើម្បីមនុស្សធម៌ ។
ជាចុងក្រោយ ឧត្តមសេនីយ៍ឯក ម៉ៅ សុផាន់ បានប្រកាស ប្រគល់ជូននូវ រថយន្តសង្គ្រោះ ចំនួន ០៩គ្រឿង និងម៉ាស៊ីនរាវមីនធំ ចំនួន០៩ គ្រឿង ដល់កងប្រតិបត្តិករបោសសម្អាតមីន កងទ័ពជោងគោក ។
សូមបញ្ជាក់ថា៖ ចាប់តាំងពីបានបង្កើតមក គណៈកម្មការ បានចាត់តាំងហ្វឹកហ្វឺន ជំនាញបោសសម្អាតមីន បានចំនួន ០៣លើក រួចមកហើយ ក្នុងនោះនៅឆ្នាំ២០២២ បានចាត់តាំងហ្វឹកហ្វឺនចំនួន ០២លើក៖ លើកទី០១ : ហ្វឹកហ្វឺននៅ បញ្ជាការដ្ឋានវិស្វកម្ម កងទ័ពជើងគោក លើកទី០២ : ហ្វឹកហ្វឺន នៅសាលាពហុសាសន៍តេជោសែន កងកម្លាំងរក្សាសន្តិភាព និងកាកសំណល់សង្គ្រាម និងលើកទី៣ ក្នុងឆ្នាំ២០២៣ នៅសាលាពលទាហានទី៥ និងសាលាមរតកតេជោ ភ្នំវាលចាប់ (យោធភូមិភាគទី៥) ៕
