លោកជំទាវ មិថុនា ភូថង ដឹកនាំកិច្ចប្រជុំរបស់គណៈកម្មាធិការសម្របសម្រួលបច្ចេកទេសខេត្តកោះកុង ដើម្បីពិនិត្យ និងផ្តល់យោបល់ លើសេចក្តីព្រាងបញ្ជីគម្រោងអាទិភាពដោយប្រើប្រាស់ថវិកាខេត្តឆ្នាំ២០២៤-២០២៦

ភ្នំពេញ៖ លោកជំទាវ មិថុនា ភូថង អភិបាល នៃគណៈអភិបាលខេត្តកោះកុង នៅថ្ងៃទី៨ ខែមិថុនា ឆ្នាំ២០២៣ បានអញ្ជើញជាអធិបតីដឹកនាំកិច្ចប្រជុំរបស់គណៈកម្មាធិការសម្របសម្រួលបច្ចេកទេសខេត្ត ដើម្បីពិនិត្យ និងផ្តល់យោបល់ លើសេចក្តីព្រាងបញ្ជីគម្រោងអាទិភាពដោយប្រើប្រាស់ថវិកាខេត្តឆ្នាំ២០២៤-២០២៦។

លោកជំទាវអភិបាលខេត្ត បានលើកឡើងថា ក្នុងនាមរដ្ឋបាលខេត្ត និងក្នុងនាមខ្លួនខ្ញុំផ្ទាល់ សូមស្វាគមន៍ប្រកបដោយមនោសញ្ចេតនាយ៉ាងកក់ក្តៅ នូវវត្តមានរបស់ ឯកឧត្តម លោកជំទាវ លោកបណ្ឌិត លោក លោកស្រី ពិតជាមានក្តីសោមនស្សរីករាយជាទីបំផុតដែល បានមកចូលរួមជាអធិបតី ក្នុងឱកាសបើកកិច្ចប្រជុំនាពេលនេះ ក្នុងនាមគណៈកម្មាធិការសម្របសម្រួល បច្ចេកទេស។

លោកជំទាវអភិបាលខេត្ត បានថ្លែងអំណរអរគុណយ៉ាងជ្រាលជ្រៅបំផុតចំពោះ ឯកឧត្តម លោកជំទាវ លោក លោកស្រី ដែល បានអនុញ្ញាតឱ្យក្រុមការងារកសាងផែនការខេត្ត ដាក់សេចក្តីព្រាងបញ្ជីគម្រោងជាអាទិភាពដោយប្រើប្រាស់ថវិកាខេត្ត ឆ្នាំ២០២៤-២០២៦ ចូលក្នុងរបៀបវារៈនៃកិច្ចប្រជុំពេញអង្គរបស់គណៈកម្មាធិការសម្របសម្រួលបច្ចេកទេសខេត្ត នាពេលថ្ងៃនេះ ដើម្បីសុំការពិនិត្យ និងផ្ដល់យោយល់។

ដោយយោងទៅលើសេចក្តីសម្រេច ស្តីពីការរៀបចំគណៈកម្មាធិការសម្របសម្រួលបច្ចេកទេស លោកជំទាវ មិថុនា ភូថង បានបញ្ជាក់ជូនដោយសង្ខេបស្តីពី តួនាទី និងភារកិច្ច សំខាន់ៗដូចខាងក្រោម៖
-សម្របសម្រួល រៀបចំ ផែនការអភិវឌ្ឍន៍ និងថវិកា
-សម្របសម្រួលកិច្ចការរបស់ក្រុមប្រឹក្សាខេត្តជាមួយមន្ទីរ អង្គភាពជំនាញរបស់ក្រសួងស្ថាប័ននានា
-កិច្ចសហប្រតិបត្តិការ និងសម្របសម្រួលនៅក្នុងរដ្ឋបាលឯកភាពខេត្ត
-កិច្ចសហប្រតិបត្តិការនិងការសម្របសម្រួលរវាងក្រុមប្រឹក្សាខេត្តជាមួយក្រុមប្រឹក្សាក្រុង ក្រុមប្រឹក្សា ស្រុក ក្រុមប្រឹក្សាឃុំ និង ក្រុមប្រឹក្សាសង្កាត់នៅក្នុងខេត្ត
-កិច្ចសហប្រតិបត្តិការ និងការសម្របសម្រួលរវាងក្រុមប្រឹក្សាខេត្តជាមួយក្រុមប្រឹក្សាពាក់ព័ន្ធផ្សេងៗ
-ការងារទាក់ទងនឹងមុខងារ និងធនធាន។
ការរៀបចំសេចក្តីព្រាងបញ្ជីគម្រោងគ្រោងប្រើប្រាស់ថវិកាខេត្ត ២០២៤-២០២៦ ត្រូវបានរៀបចំឡើងតាមលំដាប់លំដោយ ស្របតាមប្រកាសអន្តរក្រសួងលេខ ១៤៩ ផក.ប្រក ស្តីពីការដាក់ឱ្យប្រើប្រាស់សេចក្តីណែនាំ បំពេញបន្ថែមលើសេចក្ដីណែនាំបច្ចេកទេសស្តីពីការរៀបចំនិងកសាងកម្មវិធីវិនិយោគបីឆ្នាំរំកិល រាជធានី ខេត្ត ក្រុង ស្រុក ឃុំ សង្កាត់ ដែលខ្លឹមសារសំខាន់ គឺការចាប់ផ្តើមរៀបចំកម្មវិធីវិនិយោគនៅថ្នាក់ក្រោមជាតិ ត្រូវដំណើរការទៅឱ្យស្របទៅនឹងដំណើរការរៀបចំថវិកា ហើយស្របទៅនឹងរចនាសម្ព័ន្ធថ្មីនៃការគ្រប់គ្រងនៅតាមបណ្តាក្រុង ស្រុក។

សេចក្តីព្រាងបញ្ជីគម្រោង ដែលបានលើកឡើង ឈ្មោះគម្រោងសំខាន់ៗ ដែលបានរំលេចឡើងក្នុងកម្មវិធីវិនិយោគបីឆ្នាំរំកិល គឺជាផែនទីចង្អុលប្រាប់ផ្លូវ ដើម្បីប្រើប្រាស់ជាមូលដ្ឋានដ៏សំខាន់ក្នុងការធ្វើសេចក្តីសម្រេចចិត្ត អំពីការអភិវឌ្ឍន៍ខេត្ត ក្របខ័ណ្ឌចំណាយរយៈពេលមធ្យម(បីឆ្នាំ) និងថវិកាប្រចាំឆ្នាំរបស់ខេត្ត និងអ្នកពាក់ព័ន្ធជុំវិញខេត្ត។

ក្នុងន័យនេះមានន័យថា រដ្ឋបាលខេត្ត និងអ្នកពាក់ព័ន្ធជុំវិញខេត្តអាចប្រើប្រាស់ជាមូលដ្ឋានក្នុងការរៀបចំប្រើប្រាស់ថវិកា ក៏ដូចជាស្នើសូមថវិកាទៅស្ថាប័ន ជំនាញ ដើម្បីបង្ហាញអំពីទំហំសូចនាករ ការកំណត់វាស់វែងធនធានថវិកា ក្នុង ការវិភាជន៍ថវិកាទៅតាមទំហំនៃសូចនាករនីមួយៗ។ ដូច្នេះក្នុងឱកាសដ៏ប្រពៃនេះ លោកជំទាវអភិបាលខេត្ត សូមឱ្យសមាជិក សមាជិកា នៃកិច្ចប្រជុំមេត្តារួមគ្នា ពិនិត្យ និងផ្តល់យោបល់ កំណត់នូវបញ្ហាប្រឈមនានា ដែលមានកន្លងមក ក្នុងការអនុវត្តតួនាទី ក៏ដូចជាបញ្ហាប្រឈមនៅមូលដ្ឋានផ្ដល់ជាធាតុចូលបន្ថែមទៀត ជូនដល់ក្រុមការងារកសាងផែនការ ដើម្បី ដាក់បញ្ចូលទៅក្នុងកម្មវិធីវិនិយោគ៣ឆ្នាំរំកិល ២០២៤-២០២៦ អនុវត្តប្រកបដោយប្រសិទ្ធភាពខ្ពស់។

លោកជំទាវអភិបាលខេត្ត សង្ឃឹមថាលទ្ធផលនៃ ការពិនិត្យ និងផ្ដល់យោបល់លើសេចក្តីព្រាងបញ្ជីគម្រោងគ្រោងប្រើប្រាស់ថវិកាខេត្ត នាឆ្នាំនេះ នឹងជាប្រយោជន៍សម្រាប់ការប្រើប្រាស់លើកិច្ចអភិវឌ្ឍន៍របស់ខេត្តឱ្យចំគោលដៅ ដើម្បីសម្រេច គោលបំណង និងចក្ខុវិស័យរបស់ខេត្ត ស្របតាមតម្រូវការអាទិភាពជាក់ស្ដែងរបស់ប្រជាជនទូទាំងខេត្ត និងចូលរួម គាំទ្រដល់កម្មវិធីវិនិយោគ របស់ឃុំ សង្កាត់ដែលជាគម្រោងអាទិភាព ដែលមានដាក់បង្ហាញជូនក្នុងវេទិកាពិគ្រោះយោបល់ និងសិក្ខាសាលាសមាហរណកម្មកម្មវិធីវិនិយោគបីឆ្នាំរំកិល ឃុំ សង្កាត់ ថ្នាក់ក្រុង ស្រុក នាពេលខាងមុខ ក្នុងការគៀគរធនធានថវិកា ការគាំទ្រពីមន្ទីរវិស័យ អង្គការជាតិ និងអន្តរជាតិ វិស័យឯកជន ក្នុងដែនសមត្ថកិច្ចរបស់ខ្លួន ដើម្បីការលើកកម្ពស់គុណភាពសេវាសាធារណៈ សំដៅរួមចំណែកកាត់បន្ថយភាពក្រីក្រនិងលើកកម្ពស់ជីវភាព រស់នៅ និងសុខុមាលភាពរបស់ប្រជាពលរដ្ឋក្នុងខេត្ត បានប្រសើរឡើង ៕