ឯកឧត្តម នេត្រ ភក្ត្រា អំពាវនាវដល់បងប្អូនប្រជាពលរដ្ឋអញ្ជើញ ទៅបោះឆ្នោតឱ្យបានច្រើនដើម្បីអនុវត្តសិទ្ធិនិងគាំទ្រដំណើរការលទ្ធិប្រជាធិបតេយ្យនៅកម្ពុជាតាមរយៈការបោះឆ្នោត
ភ្នំពេញ៖ ឯកឧត្តម នេត្រ ភក្ត្រា អនុប្រធានក្រុមការងារគណបក្សចុះមូលដ្ឋានក្រុងបូកគោនិងស្រុកទឹកឈូ ខេត្តកំពត បានអំពាវនាវដល់បងប្អូនប្រជាពលរដ្ឋអញ្ជើញ ទៅបោះឆ្នោតឱ្យបានច្រើនដើម្បីអនុវត្តសិទ្ធិនិងគាំទ្រដំណើរការលទ្ធិប្រជាធិបតេយ្យនៅកម្ពុជាតាមរយៈការបោះឆ្នោត និងកុំជឿតាមការញុះញង់របស់ក្រុមជនអគតិនិងក្រុមជនក្បត់ជាតិ ៣ ជំនាន់ដែលមានចេតនាទុច្ចរិតបំផ្លាញលទ្ធិប្រជាធិបតេយ្យ បំផ្លាញសុខសន្តិភាពនៅកម្ពុជា។
នេះគឺជាការអំពាវនាវរបស់ឯកឧត្តម នេត្រ ភក្ត្រា នាព្រឹកថ្ងៃទី១១ ខែមិថុនា ឆ្នាំ២០២៣ ក្នុងកិច្ចប្រជុំត្រួតពិនិត្យការងារបក្សនៅសង្កាត់កោះតូច ក្រុងបូកគោ និងការត្រៀមលក្ខណៈសម្រាប់ការបោះឆ្នោតជ្រើសតាំងតំណាង រាស្ត្រនីតិកាលទី៧ ដែលនឹងប្រព្រឹត្តទៅនៅថ្ងៃទី២៣ ខែកក្កដា ឆ្នាំ២០២៣ ខាងមុខនេះ។
ឯកឧត្តមអនុប្រធានក្រុមការងារ បានលើកឡើងបន្តថា យុទ្ធនាការរបស់ក្រុមជនអគតិមួយចំនួននាពេលកន្លងមក មិនឱ្យពលរដ្ឋទៅបោះឆ្នោតគឺជាដំណើរការប្រឆាំងនឹងលទ្ធិប្រជាធិបតេយ្យ និងជាការរំលោភបំពានលើច្បាប់ស្តីពីការបោះឆ្នោតជ្រើសតាំងតំណាងរាស្ត្រដែលត្រូវផាកពិន័យជាប្រាក់ពី ៥លានរៀលទៅ ២០លានរៀលដោយ គណៈកម្មាធិការជាតិរៀបចំការបោះឆ្នោត ដោយពុំទាន់គិតដល់ទោសព្រហ្មទណ្ឌផ្សេងទៀតចំពោះជនណាដែលតាមមធ្យោបាយទុច្ចរិតដូចជា រារាំងប្រជាពលរដ្ឋដែលមានសិទ្ធិបោះឆ្នោតមិនឱ្យទៅបោះឆ្នោត, ធ្វើឱ្យភាន់ច្រឡំនាំឱ្យបាត់ទំនុកចិត្តលើការបោះឆ្នោត, បង្កការរំខានមិនឱ្យដំណើរការបោះឆ្នោតបាន ៕
