ឯកឧត្តម នេត្រ ភក្ត្រា៖ ដើម្បីថែរក្សាសុខសន្តិភាពឱ្យបានគង់វង្ស យើងចាំបាច់ត្រូវរួមគ្នាគាំទ្រការដឹកនាំរបស់សម្តេចតេជោ ហ៊ុន សែន និងគណបក្សប្រជាជន
ភ្នំពេញ៖ ឯកឧត្តម នេត្រ ភក្ត្រា អនុប្រធានក្រុមការងារគណបក្សចុះមូលដ្ឋានក្រុងបូកគោនិងស្រុកទឹកឈូ ខេត្តកំពត បានលើកឡើងថា ដើម្បីថែរក្សាសុខសន្តិភាពឱ្យបានគង់វង្ស យើងចាំបាច់ត្រូវរួមគ្នាគាំទ្រការដឹកនាំរបស់សម្តេចតេជោ ហ៊ុន សែន និងគណបក្សប្រជាជនកម្ពុជា ហើយការអញ្ជើញទៅបោះឆ្នោត នៅថ្ងៃទី២៣ ខែកក្កដា ឆ្នាំ២០២៣ បោះជូនគណបក្សប្រជាជនកម្ពុជានៅលេខរៀងទី១៨ នៃសន្លឹកឆ្នោតសញ្ញាទេវតាបាចផ្កា គឺជាការចូលរួមពង្រឹងការអនុវត្តលទ្ធិប្រជាធិបតេយ្យនៅកម្ពុជានិងជាពិសេសគឺបោះឆ្នោតដើម្បីការពារសន្តិភាព និងការអភិវឌ្ឍរីកចម្រើនរបស់កម្ពុជា ហើយប្រឆាំងដាច់ខាតក្រុមជនក្បត់ជាតិដែលព្យាយាមបំផ្លាញសន្តិភាពដែលរកបានដោយលំបាកនេះ។
នេះគឺជាការអំពាវនាវរបស់ឯកឧត្តម នេត្រ ភក្ត្រា នាព្រឹកថ្ងៃទី១១ ខែមិថុនា ឆ្នាំ២០២៣ ក្នុងកិច្ចប្រជុំត្រួតពិនិត្យការងារបក្សនៅសង្កាត់កោះតូច ក្រុងបូកគោ និងការត្រៀមលក្ខណៈសម្រាប់ការបោះឆ្នោតជ្រើសតាំងតំណាង រាស្ត្រនីតិកាលទី៧ ដែលនឹងប្រព្រឹត្តទៅនៅថ្ងៃទី២៣ ខែកក្កដា ឆ្នាំ២០២៣ ខាងមុខនេះ។
ឯកឧត្តម នេត្រ ភក្ត្រា បានបញ្ជាក់ថា ក្រុមការងារគណបក្សចុះមូលដ្ឋានសង្កាត់កោះតូច និងសមាជិក សមាជិកា នៃគណៈកម្មាធិការបក្សសង្កាត់កោះតូចទាំងអស់បានប្រកាសប្តេជ្ញាចិត្ត ដណ្តើមជ័យជម្នះជូនគណបក្សប្រជាជនកម្ពុជា និងគាំទ្រសម្តេចតេជោ ហ៊ុន សែន ប្រធានគណបក្ស បន្តជានាយករដ្ឋមន្ត្រី និងឯកឧត្តមបណ្ឌិត ហ៊ុន ម៉ាណែត ជាបេក្ខជននាយករដ្ឋមន្ត្រីអនាគត ៕
