ក្រសួងមហាផ្ទៃ សហការជាមួយរដ្ឋបាលខេត្តបន្ទាយមានជ័យ រៀបចំកិច្ចប្រជុំបើកសវនកម្មផ្ទៃក្នុង ការិយបិរច្ឆេទ២០២២ និងបណ្តាឆ្នាំពាក់ព័ន្ធសម្រាប់ភូមិភាគ៣

បន្ទាយមានជ័យ៖ ក្រសួងមហាផ្ទៃ សហការជាមួយរដ្ឋបាលខេត្តបន្ទាយមានជ័យ នៅថ្ងៃទី១២ ខែមិថុនា ឆ្នាំ២០២៣បានរៀបចំកិច្ចប្រជុំ បើកសវនកម្មផ្ទៃក្នុង ការិយបិរច្ឆេទ២០២២ និងបណ្តាឆ្នាំពាក់ព័ន្ធសម្រាប់ភូមិភាគ៣ (ខេត្តបន្ទាយមានជ័យ, ពោធិ៍សាត់, បាត់ដំបង, ប៉ៃលិន) ប្រារព្ធធ្វើឡើងក្រោអធិបតីភាព ឯកឧត្តម ម៉ក់ សម្បត្តិ អនុរដ្ឋលេខាធិការក្រសួងមហាផ្ទៃ រួមនឹងប្រតិភូអម ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ ព្រមទាំងមានការចូលរួមពីសំណាក់ ឯកឧត្តម លោកជំទាវ តំណាងគណៈអភិបាលខេត្តទាំង៤ លោកឧត្តមសេនីយ៍ស្នងការ ស្នងការរង និងប្រធានពន្ធនាគារខេត្ត លោកអភិបាលក្រុង ស្រុក នៃរដ្ឋបាលខេត្តបានចូលរួម ធ្វើឡើងនៅសាល ធំ សាលាខេត្តបន្ទាយមានជ័យ។

ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ បានថ្លែងអំណរគុណយ៉ាងជ្រាលជ្រៅបំផុតចំពោះថ្នាក់ដឹកនាំក្រសួងមហាផ្ទៃ ដែលបានផ្តល់កិត្តិយសដល់ រដ្ឋបាលខេត្តបន្ទាយមានជ័យ ធ្វើជាម្ចាស់ផ្ទះក្នុងការរៀបចំប្រជុំបើកការងារសវនកម្មសម្រាប់ការិយបរិច្ឆេទ២០២២ និងបណ្តាឆ្នាំពាក់ព័ន្ធ ក្នុងភូមិភាគ៣ រួមមានខេត្ត បន្ទាយមានជ័យ ពោធិសាត់ បាត់ដំបង និងខេត្តប៉ៃលិន។

ឯកឧត្តម អភិបាលខេត្ត លើកឡើងថា ការផ្សារភ្ជាប់រដ្ឋបាលថ្នាក់កណ្តាលជាមួយ រដ្ឋបាលដែនដី (ដែលរួមមានរដ្ឋបាលថ្នាក់មូលដ្ឋាននិងរដ្ឋបាលថ្នាក់ក្រោមជាតិ) គឺជាការងារដ៏មានសារៈសំខាន់ណាស់ដើម្បីអនុវត្តគោលនយោបាយ របស់រាជរដ្ឋាភិបាលប្រកបដោយប្រសិទ្ធភាព ជាពិសេសការអនុវត្ត យុទ្ធសាស្ត្រចតុកោណ ដំណាក់កាលទី៥ ដើម្បីកំណើនការងារ សមធម៌ និងប្រសិទ្ធភាព។

ថ្លែងនាពេលនោះ ឯកឧត្តម ម៉ក់ សម្បត្តិ អនុរដ្ឋលេខាធិការក្រសួងមហាផ្ទៃបានលើកឡើងថា នៅក្នុងបរិបទនៃដំណើរការផ្លាស់ប្ដូរបន្ដិចម្ដងៗ ឬទំនើបកម្មរដ្ឋបាលសាធារណៈនេះ ការចូលរួមរបស់រដ្ឋបាលថ្នាក់ក្រោមជាតិ ទៅក្នុងការរៀបចំតាក់តែង និងការអនុវត្តជាប្រព័ន្ធ នូវកម្មវិធីកែទម្រង់របស់រាជរដ្ឋាភិបាល ពិតជាមានភាពចាំបាច់ណាស់ នៅក្នុងខណៈដែលរដ្ឋបាលថ្នាក់ក្រោមជាតិ កាន់តែត្រូវបានផ្តល់នូវ សិទ្ធិអំណាចច្រើនឡើងៗ តាមរយៈការផ្ទេរមុខងារនិង ការទទួលខុសត្រូវ ពីថ្នាក់ជាតិ ជាក់ស្ដែងសិទ្ធិអំណាចនៅក្នុង ក្របខ័ណ្ឌនៃការអនុវត្តថវិកា កម្មវិធីដែលកំពុងត្រូវបាន អនុវត្ត ជាជំហានៗ។

ឯកឧត្តមបន្តថា ស្ថិតក្នុងឱកាសដ៏មានសារៈសំខាន់នេះ ឯកឧត្តម ស្នើឱ្យរដ្ឋបាលគ្រប់ថ្នាក់ គ្រប់អង្គភាព ចូលរួមផ្តល់កិច្ចសហការល្អជាមួយក្រុមការងារអគ្គនាយកដ្ឋាន សវនកម្មផ្ទៃក្នុងនៃក្រសួងមហាផ្ទៃ ដើម្បីឲ្យដំណើរការនៃការ ធ្វើសវនកម្មនេះប្រព្រឹត្តិទៅទទួលបានលទ្ធផលល្អប្រសើរ និងទទួលយកនូវអនុសាសន៍នានាដើម្បីកែលម្អ ដល់គ្រប់គ្រងដឹកនាំរបស់អង្គភាពនីមួយៗកាន់តែមានភាពល្អប្រសើរ ប្រកបដោយប្រសិទ្ធភាពខ្ពស់៕