ប្រធានាធិបតីកូរ៉េខាងត្បូង នឹងរៀបចំកិច្ចប្រជុំកំពូលជាមួយមេដឹកនាំបារាំង និងវៀតណាម នៅសប្តាហ៍ក្រោយ

សេអ៊ូល៖ ការិយាល័យរបស់លោក Yoon Suk Yeol បានឲ្យដឹងកាលពីថ្ងៃអង្គារថា ប្រធានាធិបតីកូរ៉េខាងត្បូង លោក Yoon Suk Yeol នឹងធ្វើទស្សនកិច្ចនៅប្រទេសបារាំង និងវៀតណាមនៅសប្តាហ៍ក្រោយ ហើយនឹងជួបជាមួយមេដឹកនាំនៃប្រទេសទាំងពីរ។

លោក Kim Tae-hyo អនុទីប្រឹក្សាសន្តិសុខជាតិរបស់លោក Yoon Suk Yeol បានឲ្យដឹងថា លោក Yoon Suk Yeol នឹងរៀបចំកិច្ចប្រជុំកំពូលជាមួយលោកប្រធានាធិបតីបារាំង Emmanuel Macron ក្នុងអំឡុងពេលដំណើរទស្សនកិច្ចរបស់គាត់ទៅកាន់ទីក្រុងប៉ារីសរវាងថ្ងៃទី ២០ និង ២១ ខែមិថុនា។

លោកក៏នឹងចូលរួមកិច្ចប្រជុំរបស់ការិយាល័យពិព័រណ៍អន្តរជាតិ (BIE) ដែលជាអ្នករៀបចំពិព័រណ៍ឆ្នាំ ២០៣០ ផងដែរ។

ដំណើរ​ទស្សន​កិច្ច​នេះ​មាន​គោល​បំណង​លើក​កម្ពស់​ការ​ដេញ​ថ្លៃ​របស់​កូរ៉េ​ខាង​ត្បូង​ក្នុង​ការ​ធ្វើ​ជា​ម្ចាស់​ផ្ទះ​ពិព័រណ៍​នេះ។ ប្រទេសម្ចាស់ផ្ទះសម្រាប់ពិព័រណ៍ឆ្នាំ ២០៣០ ត្រូវបានគេរំពឹងថានឹងត្រូវបានជ្រើសរើសនៅក្នុងខែវិច្ឆិកា។

លោក Yoon Suk Yeol ក៏នឹងទៅបំពេញទស្សនកិច្ចផ្លូវរដ្ឋនៅវៀតណាមនៅថ្ងៃទី ២២ ខែមិថុនា តបតាមការអញ្ជើញរបស់លោក Vo Van Thuong ដែលជាប្រធានាធិបតីរបស់ប្រទេសវៀតណាម។

យោងតាមទីភ្នាក់ងារសារព័ត៌មានយ៉ុនហាប់បានឱ្យដឹងថា ប្រធានាធិបតីកូរ៉េខាងត្បូងនឹងអមដំណើរដោយគណៈប្រតិភូធុរកិច្ចចំនួន ២០៥ នាក់ក្នុងដំណើរទស្សនកិច្ចផ្លូវរដ្ឋរបស់លោកទៅកាន់ប្រទេសវៀតណាម។

ប្រភព៖ Reuters

ប្រែសម្រួលដោយ៖ [ឡាយ លីហួ]