ប.ស.ស. នឹងធ្វើការអភិវឌ្ឍប្រព័ន្ធបច្ចេកវិទ្យាគមនាគមន៍ និងព័ត៌មាន (ICT) របស់ខ្លួនឱ្យកាន់តែមានលក្ខណៈល្អប្រសើរ ស្របទៅតាមភាពរីកចម្រើននៃបច្ចេកវិទ្យាទំនើប

ភ្នំពេញ៖ ក្នុងជំនួបពិភាក្សាជាមួយក្រុមហ៊ុន HITACHI នារសៀលថ្ងៃទី១៤ ខែមិថុនា ឆ្នាំ២០២៣ ឯកឧត្តមបណ្ឌិត ហេង សុផាន់ណារិទ្ធ អគ្គនាយករងបេឡាជាតិសន្តិសុខសង្គម តំណាងដ៏ខ្ពង់ខ្ពស់ ឯកឧត្តម អ៊ុក សមវិទ្យា ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. បានថ្លែងថា ប.ស.ស. នឹងធ្វើការអភិវឌ្ឍប្រព័ន្ធបច្ចេកវិទ្យាគមនាគមន៍ និងព័ត៌មាន (ICT) របស់ខ្លួនឱ្យកាន់តែមានលក្ខណៈល្អប្រសើរ ស្របទៅតាមភាពរីកចម្រើននៃបច្ចេកវិទ្យាទំនើប។

ក្នុងជំនួបពិភាក្សា ស្តីពីប្រព័ន្ធបច្ចេកវិទ្យាគមនាគមន៍ និងព័ត៌មាន (ICT) ខាងលើនេះ ឯកឧត្តមបណ្ឌិតអគ្គនាយករង និងសហការីតំណាង ប.ស.ស. បានពិភាក្សាយ៉ាងលម្អិតជាមួយតំណាងក្រុមហ៊ុន HITACHI អំពីគម្រោងជំនួយអភិវឌ្ឍន៍ផ្លូវការ (ODA) របស់ទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) សម្រាប់អភិវឌ្ឍប្រព័ន្ធបច្ចេកវិទ្យាគមនាគមន៍ និងព័ត៌មាន (ICT) របស់ ប.ស.ស. ដើម្បីរកចំណុចល្អប្រសើរ សម្រាប់ការអភិវឌ្ឍ ប្រព័ន្ធបច្ចេកវិទ្យាគមនាគមន៍ និងព័ត៌មាន (ICT) ប្រកបដោយប្រសិទ្ធភាពខ្ពស់។

គួរឱ្យដឹងផងដែរថា ជំនួបពិភាក្សាខាងលើនេះ បានធ្វើការពិភាក្សាលើចំណុចសំខាន់ៗរួមមាន ៖

-ចែករំលែកអំពី ស្ថានភាពនៃគម្រោង HAPPINESS (platform) នៃប្រព័ន្ធបច្ចេកវិទ្យាគមនាគមន៍ និងព័ត៌មាន នៃរបបសន្តិសុខសង្គម

-លទ្ធផលនៃការចុះមកសិក្សាស្រាវជ្រាវអំពីលទ្ធភាព និងលទ្ធផលនៃភាពជាន់គ្នារវាងជំនួយឧបត្ថម្ភរបស់អង្គការនានា ជាមួយនឹងគម្រោង ODA សម្រាប់ប្រព័ន្ធ ICT របស់ទីភ្នាក់ងារ JICA

-ពិភាក្សាអំពីផែនការសកម្មភាពក្នុងគោលបំណងដើម្បីអភិវឌ្ឍគម្រោង HAPPINESS នៅឆ្នាំ២០២៥​ និង
– កិច្ចពិភាក្សាបញ្ហាប្រឈមនានាផងដែរ។

សូមបញ្ជាក់ថា ជំនួបប្រជុំពិភាក្សាខាងលើប្រព្រឹត្តទៅនៅស្នាក់ការកណ្តាល ប.ស.ស. រាជធានីភ្នំពេញ ដោយមានវត្តមានចូលរួមពីថ្នាក់ដឹកនាំបេឡាជាតិសន្តិសុខសង្គម រួមទាំងមានការចូលរួមពីថ្នាក់ដឹកនាំ ដែលជាតំណាងទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (HITACHI ) ជាច្រើនរូបផងដែរ៕