លោកជំទាវ មិថុនា ភូថង អញ្ជើញចូលរួមពិធីពិព័រណ៍ទេសចរណ៍ផ្លែឈើ និងផលិតផលភូមិ១ ផលិតផល១ ក្នុងខេត្តកោះកុង
ភ្នំពេញ៖ លោកជំទាវ មិថុនា ភូថង អភិបាល នៃគណៈអភិបាលខេត្តកោះកុង នាល្ងាចថ្ងៃសៅរ៍ ១៤រោច ខែជេស្ឋ ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី១៧ ខែមិថុនា ឆ្នាំ២០២៣ បានអញ្ជើញចូលរួមក្នុងពិធីពិព័រណ៍ទេសចរណ៍ផ្លែឈើ និងផលិតផលភូមិ១ ផលិតផល១ ក្នុងខេត្តកោះកុង ក្រោមអធិបតីភាពឯកឧត្តម ប៉ាក់ សុខុម រដ្ឋលេខាធិការក្រសួងទេសចរណ៍។
លោកជំទាវអភិបាលខេត្ត បានលើកឡើងថា ថ្ងៃនេះក្នុងនាមក្រុមប្រឹក្សាខេត្ត គណៈអភិបាលខេត្ត និងក្នុងនាមនាងខ្ញុំផ្ទាល់ នាងខ្ញុំពិតជាមានសេចក្តីសោមន្សរីករាយយ៉ាងក្រៃលែង ដោយបានមកចូលរួមជាមួយ ឯកឧត្តម លោក លោកសី មន្ត្រីរាជការ អាជីករ បងប្អូនប្រជាពលរដ្ឋទាំងអស់ ក្នុងពិធីការរៀបចំពិព័រណ៍ទេសចរណ៍ផ្លែយើង និងផលិតផលភូមិ១ ផលិតផល១ ក្នុងខេត្តកោះកុង នាពេលនេះ។
លោកជំទាវអភិបាលខេត្ត ក៏បានសម្តែងនូវការកោតសរសើរ និងវាយតម្លៃខ្ពស់ចំពោះ លោក លោកស្រី សមាជិក សមាជិកា នៃគណៈកម្មាធិការផលិតផលភូមិ១ ផលិតផល១ ខេត្តកោះកុង កងកម្លាំងស្នងការដ្ឋាននគរបាលខេត្ត កងរាជអាវុធហត្ថខេត្ត រដ្ឋបាលក្រុង ស្រុក អាជីវករ ដែលបានសហការគ្នាបានយ៉ាងល្អប្រសើរក្នុងការរៀបចំពិធីពិព័រណ៍ទេសចរណ៏ផ្លែឈើ និងផលិតផលភូមិ១ ផលិតផល បានយ៉ាងល្អប្រសើរគួរជាទីមោទនៈ។
ជាមួយគ្នានេះ លោកជំទាវអភិបាលខេត្ត ក៏សូមថ្លែងអំណរគុណចំពោះក្រុមហ៊ុន ស្រាបៀរគ្រុឌ ដែលសហការចូលរួមប្រគុំតន្ត្រី ដើម្បីញ៉ាំងកម្មវិធីនេះឱ្យកាន់តែមានភាពអធិកអធម និងសប្បាយរីករាយ។
ផ្អែកតាមសេចក្តីរាយការណ៍ របស់លោក អន សុធារិទ្ធ អភិបាលរងខេត្ត ដែលបានជម្រាបជូន គណៈអធិបតី និងអង្គពិធីទាំងមូលបានជ្រាបអំពី ដំណើរការនៃការរៀបចំពិព័រណ៍ទេសចរណ៍ ផ្លែឈើ និងផលិតផលភូមិ១ ផលិតផល១ ចាប់តាំងពីការរៀបចំដំបូង រហូតដល់សម្រេចបានចេញជាលទ្ធផលនាពេលនេះ ហើយនាងខ្ញុំសូមថ្លែងអំណរគុណ និងកោតសរសើរចំពោះ រដ្ឋបាលក្រុង ស្រុក រដ្ឋបាលឃុំ សង្កាត់ សហគមន៍ និងអាជីវករទាំងអស់ ដែលបានចូលរួមឧបត្ថម្ភ នូវ ផ្លែឈើជាច្រើនមុខ ដែលជាផលិតផលកសិកម្មក្នុងស្រុករបស់យើង ដោយក្រុមការងារបានរៀបចំផ្លែឈើ ចំនួន០២ស្តង់ សម្រាប់ដាក់ជូន ប្រជាពលរដ្ឋរបស់យើង បានភ្លក់ ពិសា ដោយឥតគិតថ្លៃ នាពេលបន្តិចទៀតនេះ ហើយនាងខ្ញុំសង្ឃឹមថា យើងនឹងសហការគ្នារៀបចំពិព័រណ៍ទេសចរណ៍ផ្លែឈើ និងផលិតផលភូមិ១ ផលិតផល១ ឱ្យបានកាន់តែល្អប្រសើរឡើងៗនៅឆ្នាំបន្តបន្ទាប់ទៀត។មុននឹងបញ្ចប់ លោកជំទាវអភិបាលខេត្ត សូមយកឱកាសនេះ ស្នើដល់លោកអ៊ំ លោកពូ លោកមីង ក្មួយៗយុវជន បងប្អូនប្រជាពលរដ្ឋទាំងអស់ ត្រូវបន្តខិតខំសម្អាតអនាម័យ បរិស្ថាន នៅជុំវិញផ្ទះសំបែងឱ្យស្អាត ជាប្រចាំ និងត្រូវបន្តអនុវត្តវិធានការ ៣កុំ ៣ការពារ របស់ប្រមុខរាជរដ្ឋាភិបាល និងវិធានការ សុខាភិបាលនានា របស់ក្រសួងសុខាភិបាល ឱ្យបានខ្ជាប់ខ្ជួន ដើម្បីចូលរួមទប់ស្កាត់ការឆ្លងរាលដាលជំងឺកូវីដ-១៩ ព្រោះថាជំងឺកូវីដ-១៩នេះមិនទាន់រលត់បាត់ទាំងស្រុងនោះទេ ជាមួយគ្នានេះ នាងខ្ញុំក៏សូមស្នើដល់អាជ្ញាធរពាក់ព័ន្ធ ជួយជំរុញឱ្យបងប្អូនប្រជាពលរដ្ឋរបស់យើងទាំងអស់បន្តចាក់វ៉ាក់សាំងការពារ(ដូសជំរុញ) ជំងឺកូវីដ-១៩ឱ្យបានគ្រប់ៗគ្នា និងលើកទឹកចិត្ត ដល់លោកអ៊ំ លោកពូ លោកមីង បងប្អូនប្រជាពលរដ្ឋទាំងអស់អញ្ជើញទៅបោះឆ្នោត និងសូមជួយជម្រុញដល់បងប្អូន កូនចៅ សាច់ញាតិទាំងអស់ ដែលមានឈ្មោះក្នុងបញ្ជីបោះឆ្នោតជ្រើសតាំងតំណាងរាស្ត្រ នីតិកាលទី៧ ឱ្យទៅបោះឆ្នោតឱ្យបានគ្រប់ៗគ្នា នៅថ្ងៃអាទិត្យ ទី២៣ ខែកក្កដា ឆ្នាំ២០២៣។
ជាទីបញ្ចប់ លោកជំទាវអភិបាលខេត្ត សូមគោរពថ្លែងអំណរគុណជាថ្មីម្ដងទៀតចំពោះ ឯកឧត្តមរដ្ឋលេខាធិការ ដែលបានឆ្លៀតឱកាសដ៏មមាញឹកអញ្ជើញជាអធិបតី ក្នុងការរៀបចំពិព័រណ៏ទេសចរណ៍ផ្លែឈើ និងផលិតផលភូមិ១ ផលិតផល១ នៅខេត្តកោះកុង នាពេលនេះ និងសូមជូនពរ ឯកឧត្តមរដ្ឋលេខាធិការ សូមមានសុខភាពល្អបរិបូរណ៍ និងសូមទទួលបានជោគជ័យគ្រប់ភារកិច្ច និងសូមជូនពរ លោក លោកស្រី គណៈអធិបតី ភ្ញៀវកិត្តិយស និងអង្គពិធីទាំងអស់ សូមបានសមប្រកប ទៅដោយពុទ្ធពរជ័យទាំងឡាយបួនប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ៕
