ឯកឧត្តម សុខ សូកេន ជួបសំណេះសំណាលជាមួយថ្នាក់ដឹកនាំ និងសមាជិកបក្សជិត ១ពាន់នាក់ នៅមូលដ្ឋានឃុំស្អាងភ្នំ ខេត្តកណ្តាល
ភ្នំពេញ៖ ឯកឧត្តម សុខ សូកេន អនុប្រធានក្រុមការងារគណបក្សចុះមូលដ្ឋានស្រុកស្អាង និងជាប្រធានក្រុមការងារគណបក្សចុះមូលដ្ឋានឃុំស្អាងភ្នំ ស្រុកស្អាង ខេត្តកណ្តាល នៅថ្ងៃទី១៨ ខែមិថុនា ឆ្នាំ២០២៣ បានជួបសំណេះសំណាលជាមួយសមាជិក សមាជិកាគណបក្សប្រជាជនកម្ពុជា ទាំងប្រធានក្រុមការងារគណបក្សចុះមូលដ្ឋានឃុំស្អាងភ្នំ ដោយមានការចូលរួមពីក្រុមការងារចុះមូលដ្ឋានឃុំស្អាងភ្នំ សមាជិកគណៈកម្មាធិការគណបក្សឃុំ ប្រធានក្រុមបក្សនៃភូមិទាំង០៩ ព្រមទាំងថ្នាក់ដឹកនាំភូមិទាំងអស់សរុបចំនួន ៩៣៥នាក់។
ក្នុងពិធីនេះ ឯកឧត្តម សុខ សូកេន បានពាំនាំសេចក្ដីសាកសួរសុខទុក្ខពីសំណាក់ ឯកឧត្តមឧបនាយករដ្ឋមន្រ្តី ប្រាក់ សុខុន ប្រធានក្រុមការងារគណបក្សចុះមូលដ្ឋានស្រុកស្អាងជូនដល់សមាជិកសមាជិកាគណបក្សឃុំស្អាងភ្នំទាំងអស់។
ឯកឧត្តម សុខ សូកេន បានលើកឡើងថា ក្រោមការដឹកនាំប្រកបដោយភាពឈ្លាសវៃ ច្នៃប្រឌិត បត់បែនប្រកបដោយយុទ្ធសាស្រ្ត និងមានគោលការណ៍ដឹកនាំត្រឹមត្រូវ ដោយឈរលើមូលដ្ឋានច្បាប់ លក្ខន្តិកៈ ស្របតាមរដ្ឋធម្មនុញ្ញ នៃព្រះរាជាណាចក្រកម្ពុជា របស់សម្ដេចតេជោ ហ៊ុន សែន គណបក្សប្រជាជនកម្ពុជា បានកសាង និងបន្សល់ទុកនូវសមិទ្ធផលធំៗជាច្រើនមិនអាចកាត់ថ្លៃបានដោយបានចាប់ផ្តើមតាំងពីបាតដៃទទេហូតមកដល់ពេលបច្ចុប្បន្ន ជាពិសេស សុខសន្តិភាព ស្ថេរភាពនយោបាយទូទាំងផ្ទៃប្រទេស ព្រមទាំងការអភិវឌ្ឍលើគ្រប់វិស័យ។ ដូចនេះ សមាជិកគណបក្សប្រជាជនកម្ពុជាគ្រប់រូប ត្រូវបន្តការប្តេជ្ញាចិត្តខ្ពស់ក្នុងការថែរក្សាសមិទ្ធផលវិជ្ជមានរបស់អ្នកជំនាន់មុន និងបង្កើននូវសមិទ្ធផលវិជ្ជមានថ្មីៗបន្ថែមទៀត ព្រមទាំងរួមគ្នាកសាងមូលដ្ឋានរបស់យើងឱ្យកាន់តែរឹងមាំ។
ឯកឧត្តមបានបន្ថែមថា ការគ្រប់គ្រងសមាជិកគណបក្សបានល្អ គឺជាកិច្ចការចាំបាច់របស់យើង ដើម្បីធានាឱ្យបាននូវជ័យជម្នះក្នុងការបោះឆ្នោតជ្រើសតាំងតំណាងរាស្រ្តនីតិកាលទី៧ នៃរដ្ឋសភា ឆ្នាំ២០២៣ នេះ តាមរយៈគោលការណ៍របស់គណបក្សគឺ «សមាជិកម្នាក់សន្លឹកឆ្នោតមួយសន្លឹក»។
ឆ្លៀតក្នុងឱកាសនេះដែរ ឯកឧត្តមបានប្រកាសគាំទ្រទាំងស្រុងនូវប្រសាសន៍ដ៏ខ្ពង់ខ្ពស់បំផុតរបស់សម្ដេចតេជោ ហ៊ុន សែន ក្នុងការផ្តួចផ្តើមស្នើធ្វើវិសោធនកម្មច្បាប់បោះឆ្នោតស្តីពី «ដកសិទ្ធិបោះឆ្នោត និងសិទ្ធិឈរឈ្មោះឱ្យគេបោះឆ្នោត» សម្រាប់បុគ្គលណាដែលមិនបានបំពេញកាតព្វកិច្ចទៅបោះឆ្នោត។
ឯកឧត្តម សុខ សូកេន បានសង្កត់ធ្ងន់ថា ការស្នើធ្វើវិសោធនកម្មច្បាប់នេះ មិនបានធ្វើឱ្យប៉ះពាល់ទៅដល់សិទ្ធិពលរដ្ឋក្នុងការសម្រេចចិត្តទៅបោះឆ្នោត ឬមិនបោះឆ្នោតនោះទេ ពោលគឺដើម្បីពង្រឹងទៅដល់ការទទួលខុសត្រូវសម្រាប់អ្នកគ្រប់គ្រងដឹកនាំ ទាំងនៅថ្នាក់ជាតិ និងថ្នាក់ក្រោមជាតិ ចាប់ពីថ្នាក់ឃុំ-សង្កាត់ឡើងទៅ។ ម្យ៉ាងទៀតច្បាប់បោះឆ្នោតរបស់ប្រទេសមួយចំនួនក៏មានលក្ខណៈប្រហាក់ប្រហែលគ្នានេះដែរ ជាក់ស្ដែងប្រទេសថៃ ហើយលើសពីនេះទៀតនោះ ច្បាប់បោះឆ្នោតនៃបណ្ដាប្រទេសមួយចំនួនទៀតមានភាពតឹងរឹងរហូតដល់ធ្វើការផាកពិន័យចំពោះអ្នកដែលមិនបានទៅបោះឆ្នោតទៀតផង។
លើសពីនេះទៀត ឯកឧត្តមបានសំណូមពរ ឱ្យសមាជិកគណបក្សគ្រប់រូបធ្វើការភ្ជាប់ប្រព័ន្ធតេឡេក្រាមរបស់ សម្ដេចតេជោ ហ៊ុន សែន និងលោកបណ្ឌិត ហ៊ុន ម៉ាណែត ដើម្បីទទួលបានព័ត៌មានពិតទាន់សភាពការណ៍។
មុនបញ្ចប់ការសំណេះសំណាល ឯកឧត្តមក៏បានដាក់ចេញជាអនុសាសន៍ និងសកម្មភាពការងារសំខាន់ៗ ចំពោះមុខ ដើម្បីត្រៀមឆ្ពោះទៅកាន់ការបោះឆ្នោតជ្រើសតាំងតំណាងរាស្រ្តនីតិកាលទី៧ នៃរដ្ឋសភា ឆ្នាំ២០២៣ នាពេលដ៏ខ្លីខាងមុខនេះ និងបានផ្ដាំផ្ញើដល់សមាជិកគណបក្សឃុំស្អាងភ្នំទាំងអស់ត្រូវ៖
ទី១.តម្កល់ផលប្រយោជន៍មូលដ្ឋាន និងប្រជាជនជាធំ
ទី២.ត្រូវជម្រុញការអភិវឌ្ឍន៍មូលដ្ឋានឃុំស្អាងភ្នំរបស់យើងអោយបានកាន់តែប្រសើរ
ទី៣.ត្រូវប្តេជ្ញាគាំទ្រ និងអនុវត្តតាមគោលនយោបាយរបស់គណបក្សប្រជាជនកម្ពុជាជារៀងរហូត
ទី៤.ត្រូវរក្សាសាមគ្គីភាពផ្ទៃក្នុងគណបក្សឱ្យបានរឹងមាំជានិច្ច
ទី៥.ត្រូវចលនាសាច់ញាតិបងប្អូន និងសមាជិកគណបក្សទាំងអស់ឱ្យចូលរួមគាំទ្រគណបក្សប្រជាជនកម្ពុជា និងបោះឆ្នោតជូនគណបក្សប្រជាជនកម្ពុជាដែលមានលេខរៀងទី១៨ ៕
