ឧត្តមសេនីយ៍ឯក ជា ពៅ អញ្ជើញបើកវគ្គបណ្តុះបណ្តាលស្តីអំពី “ភស្តុតាងឌីជីថល”

ភ្នំពេញ៖ ឯកឧត្តម ឧត្តមសេនីយ៍ឯក ជា ពៅ អគ្គស្នងការរងនគរបាលជាតិ តំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ សន្តិបណ្ឌិត អគ្គស្នងការនគរបាលជាតិ នាព្រឹកថ្ងៃច័ន្ទ ២កើត ខែបឋមាសាឍ ឆ្នាំថោះ បញ្ចស័ក ព.ស២៥៦៧ ត្រូវនឹងថ្ងៃទី១៩ ខែមិថុនា ឆ្នាំ២០២៣ បានអញ្ជើញជាអធិបតីភាពក្នុងពិធីបើកវគ្គបណ្តុះបណ្តាលស្តីអំពី “ភស្តុតាងឌីជីថល” នៅសណ្ឋាគារកាំប៉ូឌីយ៉ាណា។ ដោយមានការចូលរួមពីលោកបណ្ឌិត Jonshua James តំណាងរបស់អង្គការ UNODC, លោក Himal Ojha មន្រ្តីទទួលបន្ទុកកម្មវិធីប្រឆាំងបទល្មើសបច្ចេកវិទ្យា ប្រចាំតំបន់អាស៊ីអាគ្នេយ៍ និងប៉ាស៊ីហ្វិក របស់អង្គការ UNODC, លោក Taninai Ichitomo តំណាងរបស់ស្ថានទូតជប៉ុន ព្រមទាំងសិក្ខាកាមមកពីបណ្តានាយកដ្ឋានជំនាញ នៃអគ្គស្នងការដ្ឋាននគរបាលជាតិ, ចៅក្រម-ព្រះរាជអាជ្ញា នៃក្រសួងយុត្តិធម៌ និងអង្គភាពស៊ើបការណ៍ហិរញ្ញវត្ថុកម្ពុជា FIU។

ថ្លែងនៅក្នុងពិធីបើក ឯកឧត្តម ឧត្តមសេនីយ៍ឯក ជា ពៅ អគ្គស្នងការរង បានបង្ហាញនូវមតិសំណេះសំណាលសួរសុខទុក្ខទៅដល់សិក្ខាកាមដែលបានចូលរួម។ ក្នុងនោះ ឯកឧត្តម ឧត្តមសនីយ៍ឯក បានបង្ហាញអំពីចំណាប់អារម្មណ៍ចំពោះវគ្គសិក្សានេះ ដោយបានបញ្ជាក់ថា វគ្គសិក្សានេះគឺពិតជាមានសារៈសំខាន់ណាស់ព្រោះបច្ចុប្បន្ននេះមិនថានៅក្នុងប្រទេសកម្ពុជា ឬបណ្តាប្រទេសផ្សេងៗនោះទេ មនុស្សគ្រប់រូបសុទ្ធតែប្រើប្រាស់បច្ចេកវិទ្យា ស្មានហ្វូត កុំព្យូទ័រយួរដៃ ឬឧបករណ៍ផ្សេងៗ ដើម្បីសម្រួលការងារប្រចាំថ្ងៃ ជាហេតុធ្វើឲ្យបទល្មើសបច្ចេកវិទ្យា មានការកើតឡើងយ៉ាងគួរឲ្យកត់សំគាល់ ដូច្នេះរាល់ភស្តុតាងទាក់ទិននឹងបទល្មើសគឺត្រូវបានរក្សាទុកនៅក្នុង ស្មានហ្វូត កុំព្យូទ័រយួរដៃ ឬឧបករណ៍បច្ចេកវិទ្យាផ្សេងៗ។ ដោយសារតែបែបនេះ ទើបវគ្គបណ្តុះបណ្តាលនេះមានសារៈសំខាន់ និងគុណប្រយោជន៍ ចំពោះមន្រ្តីនគរបាលយុត្តិធម៌ ក្នុងការជួយបង្កើនសមត្ថភាព បច្ចេកទេសក្នុងការរក្សា-ប្រមូលវត្ថុតាងឌីជីថល ដើម្បីជាជំនួយក្នុងការបង្ហាញទៅកាន់តុលាការ ដើម្បីដាក់បន្ទុកបន្ថែមដល់ជនល្មើស និងបង្រ្កាបបទល្មើសបច្ចេកវិទ្យាឲ្យកាន់តែទទួលបានជោគជ័យ។

ឯកឧត្តម ឧត្តមសេនីយ៍ឯក បានសំណូមពរទៅដល់សិក្ខាកាមទាំងអស់ ឲ្យប្រឹងប្រែងយកចិត្តទុកដាក់សិក្សា និងព្យាយាមស្វែងយល់អំពីមេរៀនដែលត្រូវលើកយកមកបង្ហាញអំឡុងវគ្គបណ្តុះបណ្តាល។

ជាចុងបញ្ចប់ ឯកឧត្តម ឧត្តមសេនីយ៍ឯក ជា ពៅ បានថ្លែងអំណរគុណទៅដល់រាជរដ្ឋាភិបាលជប៉ុន ដែលបានចូលរួមចំណែកជាមួយរាជរដ្ឋាភិបាលកម្ពុជា ក្នុងការបង្រ្កាបបទល្មើសបច្ចេកវិទ្យា ក៏ដូចជាផ្តល់ជំនួយ និងជាបង្អែកឆ្អឹងខ្នងក្នុងការរៀបចំវគ្គបណ្តុះបណ្តាលនេះឲ្យកើតមានឡើង រួមទាំងអង្គការ UNODC ក្នុងនាមជាអ្នកសម្របសម្រួល។ ឯកឧត្តម ឧត្តមសេនីយ៍ឯក សង្ឃឹមយ៉ាងមុតមាំថាវគ្គបណ្តុះបណ្តាលប្រភេទនេះ នឹងត្រូវបានរៀបចំបន្ថែមទៀត ដើម្បីជាការពង្រឹងសមត្ថភាពដល់មន្រ្តីនគរបាលយុត្តិធម៌ ក៏ដូចជាស្ថាប័នផ្សេងៗទៀតនាពេលខាងមុខ ៕