រដ្ឋមន្ត្រីការបរទេសចិនបានជួបជាមួយមន្ត្រីយោធាប៉ាគីស្ថាន
ប៉េកាំង៖កាលពីថ្ងៃទី២០ ខែមិថុនា ទីប្រឹក្សារដ្ឋ និងជារដ្ឋមន្ត្រីការបរទេសចិន លោក Qin Gang បានជួបជាមួយប្រធានគណៈកម្មាធិការអគ្គសេនាធិការចម្រុះនៃកងទ័ពប៉ាគីស្ថាន លោក Sahir Shamshad Mirza ក្នុងទីក្រុងប៉េកាំង កាលពីថ្ងៃអង្គារ។
លោក Qin បានអោយដឹងថា កងទ័ពប៉ាគីស្ថានជាអ្នកការពារដ៏រឹងមាំ និងជាអ្នកលើកកម្ពស់មិត្តភាពចិន-ប៉ាគីស្ថាន។លោកបានសម្តែងក្តីសង្ឃឹមថា យោធាប៉ាគីស្ថាននឹងបន្តដើរតួនាទីរបស់ខ្លួនជាយុថ្កានៃស្ថិរភាព ដោយការពារស្ថិរភាពក្នុងស្រុក និងរួមចំណែកក្នុងការកសាងសហគមន៍ចិន-ប៉ាគីស្ថាននៃអនាគតរួមគ្នា។
លោកក៏បានថ្លែងអំណរគុណដល់កងទ័ពប៉ាគីស្ថានសម្រាប់កិច្ចខិតខំប្រឹងប្រែងរយៈពេលវែងរបស់ខ្លួនក្នុងការធានាសុវត្ថិភាពបុគ្គលិក និងគម្រោងរបស់ចិននៅក្នុងប្រទេសប៉ាគីស្ថាន។លោក Sahir Shamshad Mirza បាននិយាយថា យោធាប៉ាគីស្ថាននឹងបន្តខិតខំប្រឹងប្រែងដើម្បីធានាកិច្ចសហប្រតិបត្តិការទ្វេភាគី រួមទាំងការសាងសង់ច្រករបៀងសេដ្ឋកិច្ចចិន-ប៉ាគីស្ថាន និងការពារកិច្ចសហប្រតិបត្តិការខ្សែក្រវ៉ាត់ និងផ្លូវ។
ប្រភពព័ត៌មានៈXinhua
ប្រែសំរួលដោយៈយ៉េន សុវណ្ណារ៉ា
