ក្រសួងសាធារណការ ផ្ដល់ថវិកា ៨០០លានរៀល ដល់មន្ទីរពេទ្យគន្ធបុប្ផា និងមន្ទីរពេទ្យកុមារជាតិ
ភ្នំពេញ៖ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន នាថ្ងៃទី២១ ខែមិថុនា ឆ្នាំ២០២៣ បានអញ្ជើញជាអធិបតីក្នុងកម្មពិធីបរិច្ចាគថវិកាដែលទទួលបានពីកម្មវិធី “អបអរសាទរ ខួប៣ឆ្នាំ លេខពិសេសផ្ទាល់ខ្លួន” ជូនដល់មូលនិធិគន្ធបុប្ផាកម្ពុជា និងមន្ទីរពេទ្យកុមារជាតិ ដោយក្នុងពិធីនេះក៏មានការចូលរួមពីថ្នាក់ដឹកនាំក្រសួង ឯកឧត្តមវេជ្ជបណ្ឌិត ញឹប អង្គាបុស្ស នាយកមន្ទីរពេទ្យកុមារជាតិ លោកសាស្ត្រាចារ្យ គី សង់ទី ប្រធានមន្ទីរពេទ្យគន្ធបុប្ផាភ្នំពេញ តំណាងមូលនិធិគន្ធបុប្ផាកម្ពុជា និងមន្ត្រីពាក់ព័ន្ធជាច្រើនរូបផងដែរ។
ឆ្លៀតក្នុងពិធីនេះ ឯកឧត្តមទេសរដ្ឋមន្ត្រី បានជម្រាបជូនអំពីវឌ្ឍនភាពការងារនៃវិស័យសាធារណការ និងដឹកជញ្ជូនជាសង្ខេបដែលក្នុងនោះមានជាអាទិ៍ គម្រោងសាងសង់ផ្លូវល្បឿនលឿន គម្រោងផ្លូវរថភ្លើង គម្រោងពង្រីកកំពង់ផែទឹកជ្រៅក្រុងព្រះសីហនុ និងគម្រោងផ្លូវនាវាចរណ៍ និងភស្ដុភារកម្មទន្លេបាសាក់ “ព្រែកជីកហ្វូណនតេជោ” ជាដើម។ ឯកឧត្តមទេសរដ្ឋមន្ត្រី ក៏បានជម្រាបជូនអង្គពិធីបន្ថែមផងដែរ ពីលទ្ធផលការងារចុះបញ្ជីយានយន្ត បើគិតក្នុងឆ្នាំ១៩៩៨ កម្ពុជាមានទោចក្រយានយន្តចំនួនប្រមាណ ២០ម៉ឺនគ្រឿង និងរថយន្តប្រមាណ ៦ម៉ឺនគ្រឿង ប៉ុន្តែបច្ចុប្បន្ន គិតត្រឹម២០២៣ កម្ពុជាកើនឡើងទោចក្រយានយន្តរហូតដល់ចំនួនប្រមាណ ៦លានគ្រឿង និងរថយន្តចំនួនប្រមាណ ១លានគ្រឿងដែលបានចុះក្នុងបញ្ជីរួចរាល់។
ដូចនឹងគោលបំណងកម្មវិធីនាឱកាសនេះ ឯកឧត្តមទេសរដ្ឋមន្ត្រី ក៏បានជម្រាបជូនព័ត៌មានអំពី “លេខពិសេសផ្ទាល់ខ្លួន” ដែលជាសេវាសាធារណៈថ្មីមួយ ស្ថិតនៅក្នុងទិសដៅកំណែទម្រង់តាមប្រព័ន្ធបច្ចេកវិទ្យាឌីជីថល ក្នុងការផ្តល់សេវាសាធារណៈប្រកបដោយតម្លាភាព ប្រសិទ្ធភាព និងគណនេយ្យភាព របស់ក្រសួងសាធារណការ និងដឹកជញ្ជូន ដែលត្រូវបានសម្ពោធដាក់ឱ្យដំណើរការកាលពីថ្ងៃទី០៧ ខែមករា ឆ្នាំ២០២០ កន្លងទៅ។
ក្រសួងសាធារណការ និងដឹកជញ្ជូន កាលពីថ្ងៃទី៧-៨ ខែមីនា ឆ្នាំ២០២៣ បានរៀបចំព្រឹត្តិការណ៍អបអរសារទរ ខួប៣ឆ្នាំ លេខពិសេសផ្ទាល់ខ្លួន ដែលក្នុងកម្មវិធីនោះមានការដាក់តាំងនូវផ្លាកលេខពិសេស ពិសេសផ្ទាល់ខ្លួន ព្រមទាំងមានការចូលរួមពី ឯកឧត្តមទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន ថ្នាក់ដឹកនាំក្រសួង គណៈកម្មការអន្តរក្រសួងគ្រប់គ្រងការលក់លេខចុះបញ្ជីរថយន្ត គណៈកម្មាធិកាជាតិសុវត្ថិភាពចរាចរណ៍ផ្លូវគោក ក្រសួងស្ថាប័នពាក់ព័ន្ធ មន្ទីរពេទ្យគន្ធបុប្ផា មន្ទីរពេទ្យកុមារជាតិ ក្រុមសិល្បករ សិល្បការិនី ក្រុមហ៊ុនលក់យានយន្ត គ្រឹះស្ថានធនាគារ និងហិរញ្ញវត្ថុ និងក្រុមហ៊ុនធានារ៉ាប់រងផងដែរ។ ព្រឹត្តិការណ៍នេះក៏មានគោលបំណងចូលរួមគាំពារសង្គមក្នុងវិស័យសុខាភិបាល ដើម្បីជាប្រយោជន៍ដល់ការព្យាបាល និងលើកកម្ពស់ការថែទាំសុខភាពដល់កុមារនៅកម្ពុជាផងដែរ។
ដោយទទួលបានគោលការណ៍ដ៏ខ្ពង់ខ្ពស់ពី សម្តេចតេជោនាយករដ្ឋមន្ត្រី បានសម្រេចអនុញ្ញាតឱ្យក្រសួងសាធារណការ និងដឹកជញ្ជូន បង្វែរថវិកាចំណូលដែលប្រមូលបានពីការរៀបចំកម្មវិធី “អបអរសាទរ ខួប៣ឆ្នាំ លេខពិសេសផ្ទាល់ខ្លួន” ដើម្បីបរិច្ចាគជូនដល់មូលនិធិគន្ធបុប្ផាចំនួន ៤០០លានរៀល និងបរិច្ចាគជូនដល់មន្ទីរពេទ្យកុមារជាតិចំនួន ៤០០លានរៀល។
ថ្លែងក្នុងកម្មវិធីនេះ ឯកឧត្តមវេជ្ជបណ្ឌិតនាយកមន្ទីរពេទ្យកុមារជាតិ បានធ្វើការកោតសរសើរ និងថ្លែងអំណរគុណយ៉ាងជ្រាលជ្រៅជូនចំពោះក្រសួងសាធារណការ និងដឹកជញ្ជូន ដែលបានបរិច្ចាគថវិកាជូនដល់មន្ទីរពេទ្យកុមារជាតិនាឱកាសនេះ។ ចំពោះថវិកាដែលទទួលបាន មន្ទីរពេទ្យនឹងប្រើប្រាស់ដើម្បីពង្រឹង និងលើកកម្ពស់នូវគុណភាពនៃការផ្ដល់សេវាសុខាភិបាល និងការព្យាបាលជំងឺផ្សេងៗឱ្យបានកាន់តែប្រសើរឡើងជូនប្រជាពលរដ្ឋ ដែលទាំងនេះនឹងជាទឡ្ហីករណជំរុញឱ្យប្រជាពលរដ្ឋចូលរួមប្រើប្រាស់សេវាសុខាភិបាលក្នុងប្រទេស ជាជាងការចំណាកស្រុកទៅទទួលសេវាសុខាភិបាលនៅក្រៅប្រទេស។
ស្រដៀងគ្នានេះដែរ លោកសាស្ត្រាចារ្យប្រធានមន្ទីរពេទ្យគន្ធបុប្ផាភ្នំពេញ បានកោតសរសើរពីភាពរីកចម្រើននៃហេដ្ឋារចនាសម្ព័ន្ធផ្លូវថ្នល់-ស្ពាន ដែលទាំងអស់នេះបានជួយសម្រួលឱ្យការដឹកជញ្ជូនកាន់តែមានភាពលឿនរហ័ស ព្រមទាំងបានជួយសម្រួលដល់ការធ្វើដំណើររបស់អ្នកជំងឺដែលត្រូវការព្យាបាលផងដែរ។ ជាមួយគ្នានេះ លោកក៏បានថ្លែងអំណរគុណយ៉ាងជ្រាលជ្រៅ ដែលក្រសួងសាធារណការ និងដឹកជញ្ជូន តែងតែគិតគូរជួយមន្ទីរពេទ្យគន្ធបុប្ផាជាច្រើនលើកកន្លងមកនេះ ។
បន្ថែមពីនេះ ឯកឧត្តមទេសរដ្ឋមន្ត្រី ក៏បានជម្រាបជូនអំពីការងារសាងសង់មន្ទីរពេទ្យក្នុងស្រុកកោះធំ ខេត្តកណ្ដាលនោះគឺ “មន្ទីរពេទ្យតេជោសែនកោះធំ” ដែលជាមន្ទីរពេទ្យទំនើបថ្មីមួយ មានទំហំសរុបស្មើនឹង ១២ ៥៤៤,៤ម៉ែត្រក្រឡា និងអាចទទួលអ្នកជំងឺបាន ១៥០គ្រែ។បច្ចុប្បន្នអគារមន្ទីរពេទ្យនេះបានសាងសង់រួចរាល់ហើយ ប៉ុន្តែនៅរងចាំការបំពាក់គ្រឿងសម្ភារបរិក្ខាមន្ទីរពេទ្យសម្រាប់សម្ពោធដាក់ឱ្យប្រើប្រាស់ជាផ្លូវការនាពេលខាងមុខ។ ឯកឧត្តមទេសរដ្ឋមន្ត្រី ក៏បានឆ្លៀតយកឱកាសនេះស្នើសុំការចូលរួមសម្របសម្រួលពីមន្ទីរពេទ្យគន្ធបុប្ផា និងមន្ទីរពេទ្យកុមារជាតិ ក្នុងការស្វែងរកវិជ្ជបណ្ឌិត គ្រូពេទ្យជំនាញ គិលានុបដ្ឋាក គិលានុបដ្ឋាយិកា ដែលមានបំណងចង់បម្រើការងារនៅក្នុងមន្ទីរពេទ្យថ្មីនេះ អាចចូលរួមដើម្បីបម្រើប្រជាពលរដ្ឋជាង ៣០០ពាន់នាក់ក្នុងស្រុកកោះធំ និងស្រុកផ្សេងៗទៀតជុំវិញស្រុកកោះធំផងដែរ។
សូមជម្រាបជូនថា ជាលើកដំបូងក្នុងឆ្នាំ២០២០ បន្ទាប់បានសម្ពោធដាក់ឱ្យដំណើរការជាផ្លូវការ “លេខពិសេសផ្ទាល់ខ្លួន” ក្រសួងសាធារណការ និងដឹកជញ្ជូនបានដាក់ឱ្យដេញថ្លៃលេខពិសេសផ្ទាល់ខ្លួនមួយគឺ “កម្ពុជា SAMNANG9”។ បន្ទាប់មកក្នុងឆ្នាំដដែល ក្រសួងបានបរិច្ចាគថវិកាជូនកម្មវិធីរាត្រីស្រមោលសរមូលនិធិគន្ធបុប្ផាចំនួនប្រមាណ ៨០០ លានរៀល ដែលបានមកពីការលក់លេខចុះបញ្ជីរថយន្ត “លេខ កម្ពុជា 5” និងក្នុងឆ្នាំ២០២១ ក្រសួងបានបរិច្ចាគថវិកាជូនមូលនិធិកាត់បន្ថយភាពក្រីក្រចំនួនប្រមាណ ៨០០លានរៀល មកពីការលក់លេខចុះបញ្ជីរថយន្ត “លេខ កម្ពុជា 2” សម្រាប់សាងសង់ផ្ទះជូនអតីតយុទ្ធជន៕
