នាយឧត្តមសេនីយ៍ ប៉ោ ភក្តិ បន្ដដឹកនាំគណៈប្រតិភូកម្ពុជា ចូលរួមកិច្ចប្រជុំ SOMTC បូកជាមួយដៃគូសន្ទនា (SOMTC + Dialogue Partners)

ភ្នំពេញ៖ នៅថ្ងៃទី២២-២៣ ខែមិថុនា ឆ្នាំ២០២៣ ឯកឧត្តម នាយឧត្តមសេនីយ៍ ប៉ោ ភក្តិ អគ្គលេខាធិការ នៃអគ្គលេខាធិការដ្ឋាន ក្រសួងមហាផ្ទៃ និងជាប្រធានក្រុមការងារទទួលបន្ទុកឧក្រិដ្ឋកម្មឆ្លងដែនកម្ពុជា (SOMTC-កម្ពុជា) បានបន្ដដឹកនាំគណៈប្រតិភូ SOMTC-កម្ពុជា ចូលរួមកិច្ចប្រជុំបូកជាមួយដៃគូសន្ទនារបស់អាស៊ាន ។

ក្រៅពីកិច្ចប្រជុំជាមួយដៃគូសន្ទនារបស់អាស៊ាន ឯកឧត្តម នាយឧត្តមសេនីយ៍ ប្រធានក្រុមការងារ SOMTC-កម្ពុជា ក៏បានទទួលជួបពិភាក្សាការងារទ្វេភាគីជាមួយ សមភាគីឥណ្ឌូនេស៊ី និងជាមួយប្រតិភូ នៃសហរដ្ឋអាមេរិក ដើម្បីបន្ដពង្រឹង និងពង្រីកនូវទំនាក់ទំនង និងកិច្ចសហប្រតិបត្តិការរវាងកម្លាំងអនុវត្តច្បាប់ នៃប្រទេសទាំងពីររវាង កម្ពុជា-ឥណ្ឌូនេស៊ី និងកម្ពុជា-សហរដ្ឋអាមេរិក ក្នុងការងារប្រយុទ្ធប្រឆាំងឧក្រិដ្ឋកម្មឆ្លងដែន។

សូមជម្រាបជូនដែរថា កិច្ចប្រជុំមន្ដ្រីជាន់ខ្ពស់អាស៊ានទទួលបន្ទុកឧក្រិដ្ឋកម្មឆ្លងដែន លើកទី២៣ និងកិច្ចប្រជុំពាក់ព័ន្ធ បានប្រារព្ធធ្វើឡើង ចាប់ពីថ្ងៃទី ២០-២៣ ខែមិថុនា ឆ្នាំ២០២៣ នាទីក្រុង Yogyakarta ប្រទេសឥណ្ឌូនេស៊ី៕