ឯកឧត្តម ឱម យ៉ិនទៀង៖ ជាសមាជិកគណបក្សប្រជាជនកម្ពុជា គឺត្រូវបោះឆ្នោតជូនគណបក្សប្រជាជនកម្ពុជា លេខរៀងទី១៨
ភ្នំពេញ៖ ឯកឧត្តម កិត្តិនីតិកោសលបណ្ឌិត ឱម យ៉ិនទៀង សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាប្រធានក្រុមការងារថ្នាក់ជាតិចុះជួយមូលដ្ឋានខណ្ឌទួលគោក នាព្រឹកថ្ងៃទី២៥ ខែមិថុនា ឆ្នាំ២០២៣ បានអញ្ជើញជាអធិបតីក្នុងពិធីប្រកាសបញ្ចូល និងទទួលស្គាល់សមាជិកថ្មី គណបក្សប្រជាជនកម្ពុជាសង្កាត់បឹងសាឡាង ចំនួន ២,១១៤នាក់ នៅមជ្ឈមណ្ឌលម៉ុងឌីយ៉ាល់។
ក្នុងពិធីនេះក៏មានការចូលរួមពីសំណាក់ ឯកឧត្តម ខូយ លឹមហុង ប្រធានក្រុមការងារចុះជួយមូលដ្ឋានសង្កាត់បឹងសាឡាង និងវត្តមាន ឯកឧត្តម លោកជំទាវ លោក លោកស្រី ជាថ្នាក់ដឹកនាំក្រុមកាងារចុះមូលដ្ឋានខណ្ឌ និងបណ្តាសង្កាត់ក្នុងខណ្ឌទួលគោកផងដែរ។
ជាកិច្ចចាប់ផ្តើម ឯកឧត្តម កិត្តិនីតិកោសលបណ្ឌិត ឱម យ៉ិនទៀង បានគូសបញ្ជាក់ថា ពិធីប្រកាសទទួលស្គាល់ និងបញ្ចូលសមាជិកថ្មីគណបក្សប្រជាជនកម្ពុជានាថ្ងែនេះ ប្រៀបដូចជាបុណ្យប្រចាំជីវិតរបស់យើង ក្រោមម្លប់សន្តិភាព និងការអភិវឌ្ឍដែលយើងទាំងអស់គ្នាពិតជាមានសំណាងដ៏ធំធេងដែលមានសម្តេចអគ្គមហាសេនាបតីតេជោ ហ៊ុន សែន ជាប្រធានគណបក្សប្រជាជនកម្ពុជា។
ក្នុងឱកាសនោះ ឯកឧត្តម កិត្តិនីតិកោសលបណ្ឌិត បានថ្លែងនូវសារដឹងគុណដ៏ជ្រាលជ្រៅបំផុតចំពោះស្ថាបនិកមគ្គទេសក៍ឯកគឺ សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ដែលបានជួយសង្រ្គោះអាយុជីវិតប្រជាជនឱ្យរួចផុតពីរបបប្រល័យពូជសាសន៍ ប៉ុល ពត ដ៏យង់ឃ្នង និងបានដឹកនាំប្រទេសពីគំនរផេះផង់រហូតមានការរីកចម្រើនលើគ្រប់វិស័យដូចសព្វថ្ងៃនេះ។
ឯកឧត្តម កិត្តិនីតិកោសលបណ្ឌិត បានបន្ថែមទៀតថា សម្តេចតេជោ ហ៊ុន សែន ប្រធានគណបក្សប្រជាជនកម្ពុជា ជាប្រតិបត្តិករ នយោបាយ ឈ្នះ ឈ្នះ ដែលបាននាំមកនូវសន្តិភាព ឯកភាពជាតិពេញលេញគ្របដណ្តប់ទូទាំងព្រះរាជាណាចក្រកម្ពុជា។ ជាពិសេស ថ្មីៗនេះ សម្តេចតេជោ ហ៊ុន សែន បានជួយសង្រ្គោះអាយុជីវិតប្រជាជនកម្ពុជាពីគ្រោះភ័យជាលើកទី២ ដោយអនុលោមតាមអភិក្រមផ្ការីកក្នុងយុទ្ធនាការចាក់វ៉ាក់សាំងទូទាំងប្រទេស មិនគិតថ្លៃ ដោយមិនប្រកាន់ពណ៌សម្បុរ បក្សនយោបាយ សាសនា និងមិនបែងចែកតំបន់ឡើយ ដែលឆ្លុះបញ្ចាំងពីគុណធម៌ដ៏ធំធេងរបស់សម្តេចតេជោជូនប្រជាជនកម្ពុជានៅទូទាំងប្រទេសផងដែរ។
ឯកឧត្តម កិត្តិនីតិកោសលបណ្ឌិត ឱម យ៉ិនទៀង បានបន្តថ្លែងថា មានតែគណបក្សប្រជានជនកម្ពុជាតែមួយគត់ ដែលជាទីពឹងដ៏ប្រសើរឧត្តុងឧត្តម ហើយក្នុងនាមជាសមាជិកថ្មីត្រូវគោរពតាមលក្ខន្តិកៈ និងបទបញ្ជាផ្ទៃក្នុងបក្ស ហើយត្រូវមានភាពស្មោះត្រង់ និងមិនមានបក្សផ្សេងនៅក្នុងបេះដូងឡើយ។ ឯកឧត្តម កិត្តិនីតិកោសលបណ្ឌិត បានបញ្ជាក់បន្ថែមថា ជាសមាជិកគណបក្សប្រជាជនកម្ពុជា ត្រូវរៀបចំត្រៀមខ្លួនសម្រាប់ការបោះឆ្នោត ដោយត្រូវមានឈ្មោះក្នុងបញ្ជីបោះឆ្នោត មានឯកសារអត្តសញ្ញាណប័ណ្ណ និងទៅបោះឆ្នោត ព្រមទាំងគៀរគរបងប្អួន និងក្រុមគ្រួសារបោះឆ្នោតជូនគណបក្សប្រជាជនកម្ពុជា។
ឯកឧត្តម កិត្តិនីតិកោសលបណ្ឌិត បានកោតសរសើរ និងវាយតម្លៃខ្ពស់ ចំពោះការប្តេជ្ញាចិត្តរបស់តំណាងសមាជិកថ្មីគណបក្សប្រជាជនកម្ពុជាដែរ ដែលបានគាំទ្របេក្ខភាព សម្តេចអគ្គមហាសេនាបតីតេជោ ហ៊ុន សែន ជាបេក្ខភាពនាយករដ្ឋមន្រ្តី និងគាំទ្រ ឯកឧត្តម ហ៊ុន ម៉ាណែត ជាបេក្ខភាព នាយករដ្ឋមន្រ្តី នាពេលអនាគត។
ជាចុងបញ្ចប់ ឯកឧត្តម កិត្តិនីតិកោសលបណ្ឌិត ឱម យ៉ិនទៀង បានអំពាវនាវដល់សមាជិកអង្គពិធីទាំងមូល ឱ្យចូលរួមទប់ស្កាត់រាល់ល្បិចកលទុច្ចរិតរបស់ក្រុមប្រឆាំងក្រៅច្បាប់ទាំងក្នុង និងក្រៅប្រទេស ដែលបំផ្លើសពីការពិតនៅកម្ពុជា និងបានអំពាវនាវឱ្យសមាជិកគណបក្សប្រជាជនកម្ពុជា ទៅចូលរួមបោះឆ្នោតឱ្យបានគ្រប់ៗគ្នា និងបោះឆ្នោតជូនគណបក្សប្រជាជនកម្ពុជា បានទទួលលេខរៀងទី១៨ សម្រាប់ការប្រកួតប្រជែង ក្នុងការបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣ នៅថ្ងៃទី២៣ ខែកក្កដា ឆ្នាំ២០២៣ ខាងមុខនេះ ៕
