ឯកឧត្តម ឧបនាយករដ្ឋមន្ត្រី កែ គឹមយ៉ាន សម្ពោធផ្លូវបេតុងប្រវែង៧គីឡូម៉ែត្រ មានតម្លៃ៣លាន៣៨៤ពាន់៧២៩ ដុល្លាអាមេរិក ចំណងដៃថ្មីសម្តេចតេជោ ជូនអ្នកបន្ទាយមានជ័យ
ខេត្តបន្ទាយមានជ័យ៖ នៅថ្ងៃទី២៥ ខែមិថុនា ឆ្នាំ២០២៣ ឯកឧត្តម ឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យនិងលោកជំទាវ ម៉ៅ ម៉ាល័យ បានអញ្ជើញជាអធិបតីក្នុងពិធីសម្ពោធដាក់ឱ្យប្រើប្រាស់ផ្លូវបេតុងប្រវែង៧គ.មតភ្ជាប់ពីផ្លូវជាតិលេខ៦ ឃុំឈ្មួរមានជ័យដល់វត្តប្រាសាទស្រះកណ្តាល(ខ្ចាស់) ឃុំបុស្បូវ ស្រុកព្រះនេត្រព្រះ ខេត្តបន្ទាយមានជ័យដែលជាចំណងដៃថ្មីរបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិតជូនអ្នកបន្ទាយមានជ័យ។
ក្នុងឱកាសនោះ ឯកឧត្តម ឧបនាយករដ្ឋមន្ត្រី កែគឹមយ៉ាន បានពាំនាំការផ្តាំផ្ញើសួរសុខទុក្ខ ជូនពរជ័យពីសម្ដេចតេជោ ហ៊ុន សែន និងថ្នាក់ដឹកនាំកំពូលជាតិកោតសរសើរ និងវាយតម្លៃខ្ពស់ចំពោះអាជ្ញាធរដែនដីគ្រប់លំដាប់ថ្នាក់ បងប្អូនអតីតយុទ្ធជន និវត្តន៍ជន និងប្រជាពលរដ្ឋមហាគ្រួសារអ្នកបន្ទាយមានជ័យ ពិសេសអ្នកស្រុកព្រះនេត្រព្រះដែលបានចូលរួមរក្សាបាននូវសន្តិសុខ សណ្តាប់ធ្នាប់សង្គមអនុវត្តគោលនយោបាយភូមិ ឃុំ មានសុវត្ថិភាព ការទប់ស្កាត់ជំងឺកូវីដ-១៩ អភិវឌ្ឍស្តារហេដ្ឋារចនាសម្ព័ន្ធរូបវ័ន្ត លើកកម្ពស់បានជីវភាពសមរម្យជូនប្រជាពលរដ្ឋ និងសូមស្វាគមន៍ចំពោះបងប្អូនដែលធ្លាប់មាននិន្នាការគណបក្សនយោបាយផ្សេងៗទៀត ដែលបានមកចូលរួមគាំទ្រ និងរួមរស់ជីវភាពនយោបាយជាមួយគណបក្សប្រជាជនដើម្បីរួមគ្នាកសាងជាតិនិងសូមអញ្ជើញប្រជាពលរដ្ឋទៅបោះឆ្នោតនៅថ្ងៃទី២៣ ខែកក្កដា ឆ្នាំ២០២៣ បោះឆ្នោតជូនគណបក្សប្រជាជនកម្ពុជាទាំងអស់គ្នាដើម្បីបន្តមានសន្តិភាពនិងការអភិវឌ្ឍ។
ក្នុងឱកាសដ៏មហារីករាយនោះ ដែលមានអ្នកចូលរួមចំនួន២៣០០នាក់នោះ ឯកឧត្តម ឧបនាយករដ្ឋមន្ត្រី កែ គឹមយ៉ាន និងលោកជំទាវ ម៉ៅ ម៉ាល័យបានអំណោយឧបត្ថម្ភដល់ ៖ ១.ថវិកាឧបត្ថម្ភដល់នគរបាល កងរាជអាវុធហត្ថ ប្រជាការពារ សឹករង ពេទ្យប្រចាំការ មណ្ឌលកុមារកំព្រាវិសាខា កងវិស្វកម្ម សាលាបឋមសិក្សាខ្ចាស់ ប្រគេនបច្ច័យវត្តខ្ចាស់ មេគុណខេត្តបន្ទាយមានជ័យ ២.ឧបត្ថម្ភថវិកា និងសម្ភារប្រើប្រាស់ដល់អតីតយុទ្ធជន ប្រជាពលរដ្ឋ ៣.ឧបត្ថម្ភជាថវិកា គ្រឿងឧបភោគ បរិភោគ ដល់មនុស្សវ័យចាស់សរុបជាថវិកាចំនួន ៩០លាន៤០០ពាន់រៀល ៕
