អ្នកការទូតរុស្ស៊ីហោះហើរទៅកាន់ទីក្រុងប៉េកាំងដើម្បីពិភាក្សាមួយថ្ងៃបន្ទាប់ពីការបះបោរនៅក្នុងប្រទេសរុស្ស៊ី
ប៉េកាំង៖ អ្នកការទូតកំពូលរុស្ស៊ីម្នាក់បានហោះហើរទៅកាន់ទីក្រុងប៉េកាំងដើម្បីពិភាក្សាជាមួយរដ្ឋាភិបាលចិនកាលពីថ្ងៃអាទិត្យតែមួយថ្ងៃបន្ទាប់ពីការបះបោរដោយមេបញ្ជាការទាហានស៊ីឈ្នួលរុស្ស៊ីបានផ្ទុះឡើង។
ក្រសួងការបរទេសចិនបានឲ្យដឹងនៅក្នុងសេចក្តីថ្លែងការណ៍មួយបន្ទាត់នៅលើគេហទំព័ររបស់ខ្លួនថា អនុរដ្ឋមន្ត្រីការបរទេសរុស្ស៊ីលោក Andrei Rudenko បានជួបជាមួយរដ្ឋមន្ត្រីការបរទេសចិនលោក Qin Gang ដើម្បីពិភាក្សាអំពី បញ្ហាអន្តរជាតិ និងតំបន់ដែលមានការព្រួយបារម្ភរួមគ្នា។
រុស្ស៊ី និងចិន ខណៈពេលដែលមិនមែនជាសម្ព័ន្ធមិត្តផ្លូវការ បានរក្សាទំនាក់ទំនងជិតស្និទ្ធ ជុំវិញការលុកលុយរបស់ទីក្រុងមូស្គូមកលើអ៊ុយក្រែន ដែលចិនបានបដិសេធមិនថ្កោលទោស។
ដំណើរទស្សនកិច្ចរបស់លោក Andrei Rudenko ធ្វើឡើងបន្ទាប់ពីលោក Yevgeny Prigozhin ប្រធានកងទាហានស៊ីឈ្នួលឯកជន Wagner Group បានបញ្ជាឱ្យកងទ័ពរបស់លោកដើរក្បួនទៅកាន់ទីក្រុងមូស្គូក្នុងការប្រកួតប្រជែងដ៏ធំបំផុតចំពោះលោកប្រធានាធិបតីរុស្សុី Vladimir Putin ក្នុងអំណាចជាងពីរទសវត្សរ៍របស់គាត់។ លោក Yevgeny Prigozhin ក្រោយមកនៅថ្ងៃសៅរ៍បានឈានដល់កិច្ចព្រមព្រៀងជាមួយវិមានក្រឹមឡាំងដើម្បីនិរទេសខ្លួនហើយបានបន្លឺសំឡេងដកថយ។
ចិនមិនបានធ្វើអត្ថាធិប្បាយជាផ្លូវការអំពីវិបត្តិនៅរុស្ស៊ីទេ។
សហរដ្ឋអាមេរិក និងមហាអំណាចលោកខាងលិចផ្សេងទៀតបានជំរុញឱ្យចិនកុំផ្គត់ផ្គង់អាវុធឱ្យរុស្ស៊ី ដែលអាចប្រើក្នុងជម្លោះអ៊ុយក្រែន។ ប្រទេសចិនកាលពីខែឧសភាបានបញ្ជូនបេសកជនទៅអ៊ុយក្រែននិងរុស្ស៊ីក្នុងការប៉ុនប៉ងសម្របសម្រួលការចរចាដើម្បីបញ្ចប់សង្គ្រាម។
ប្រភព៖ Arab News
ប្រែសម្រួលដោយ៖ [ឡាយ លីហួ]
