សម្ដេច មែន សំអន រំលឹកអំពីប្រវត្តិ សមិទ្ធផល និងស្នាដៃរបស់គណបក្សប្រជាជន ផ្ដើមចេញពីការរំដោះជាតិ បញ្ចប់សង្រ្គាម និងស្វែងរកសុខសន្តិភាពរហូតដល់ការកសាង និងអភិវឌ្ឍន៍ប្រទេស

ភ្នំពេញ៖ អគ្គលេខាធិការដ្ឋានគណៈចលនាមហាជននៃគណៈកម្មាធិការកណ្ដាលគណបក្សប្រជាជនកម្ពុជា នារសៀលថ្ងៃទី២៦ ខែមិថុនា ឆ្នាំ២០២៣ បានរៀបចំពិធីសំណេះសំណាលជាមួយ សមាជិក សមាជិកា គណបក្សប្រជាជនកម្ពុជានៃក្រុមការងាររួមគ្នាដើម្បីអភិវឌ្ឍន៍កម្ពុជា ក្រោមអធិបតីភាពសម្ដេចកិត្តិសង្គហបណ្ឌិត មែន សំអន អនុប្រធានគណបក្សប្រជាជនកម្ពុជា និងជាប្រធានគណៈចលនាមហាជន។ ដោយមានការចូលរួមពី ឯកឧត្តម ហ៊ុន ម៉ានី អគ្គលេខាធិការនៃអគ្គលេខាធិការដ្ឋានគណៈចលនាមហាជន រួមទាំងថ្នាក់ដឹកនាំ សមាជិក សមាជិកា គណបក្សប្រជាជនកម្ពុជាប្រមាណ ៣,៦០០រូប នៅវិមាន៧មករា។

ជាកិច្ចចាប់ផ្តើម ឯកឧត្តម ហ៊ុន ម៉ានី បានឡើងថ្លែងសុន្ទរកថាស្វាគមន៍ ដោយផ្តើមចេញពីការថ្លែងអំណរគុណចំពោះវត្តមានយ៉ាងកក់ក្ដៅរបស់សម្ដេចកត្តិសង្គហបណ្ឌិត ដែលបានអញ្ជើញជាអធិបតីក្នុងពិធីដ៏មានសារៈសំខាន់ ព្រមទាំងសម្ដែងនូវការកោតសរសើរនិងវាយតម្លៃខ្ពស់ចំពោះលទ្ធផលនិងស្នាដៃការងារនានារបស់ ក្រុមការងាររួមគ្នាដើម្បីអភិវឌ្ឍន៍កម្ពុជា ដែលបានរួមចំណែកជាមួយគណបក្ស ចាប់តាំងពីពេលបង្កើតនៅឆ្នាំ២០១១ រហូតមកទល់ពេលនេះ។

ទន្ទឹមនេះ ឯកឧត្តម ហ៊ុន ម៉ានី បានរាយការណ៍ជូនគណៈអធិបតី និងអង្គពិធី ដោយគូសបញ្ជាក់ពីការយកចិត្តទុកដាក់ខ្ពស់របស់រាជរដ្ឋាភិបាលដែលដឹកនាំដោយគណបក្សប្រជាជនកម្ពុជា ទាំងផ្នែកសេដ្ឋកិច្ចក្នុងប្រព័ន្ធ និងផ្នែកសេដ្ឋកិច្ចក្រៅប្រព័ន្ធ ដើម្បីលើកកម្ពស់សុខុមាលភាព សម្រួលការលំបាក ដោះស្រាយបញ្ហាប្រឈម និងកែលម្អជីវភាពរស់នៅ។

សូមជម្រាបជូនថា ពិធីសំណេះសំណាលជាមួយសមាជិកគណបក្សប្រជាជនកម្ពុជា នៃក្រុមការងាររួមគ្នាដើម្បីអភិវឌ្ឍន៍កម្ពុជា គឺរៀបចំឡើងស្របតាមស្មារតីរបស់មហាសន្និបាតវិសាមញ្ញទូទាំងប្រទេសរបស់គណបក្សប្រជាជនកម្ពុជា នាថ្ងៃទី២៨-២៩ ខែមករា ឆ្នាំ២០២៣ ដោយសម្តេចបានលើកឡើងថា ថ្នាក់ដឹកនាំ សមាជិក សមាជិកាបក្សទាំងអស់ ត្រូវយកចិត្តទុកដាក់ ផ្សារភ្ជាប់ គិតគូរ ជួយដោះស្រាយបញ្ហាប្រឈមនានា ជូនបងប្អូននៃសេដ្ឋកិច្ចក្រៅប្រព័ន្ធ ដើម្បីជួយលើកកម្ពស់ជីវភាពពួកគាត់ ជាពិសេស បុគ្គលក្នុងវិស័យសេវាកម្សាន្ត ដោយត្រូវរៀបចំផ្តល់បណ្ណសមធម៌ជូនពួកគាត់ ដើម្បីទទួលបានសេវាថែទាំជំងឺដោយឥតគិតថ្លៃ។

ថ្លែងប្រសាសន៍ទៅកាន់ សមាជិក សមជិកា គណបក្សប្រជាជនកម្ពុជា បម្រើការក្នុងសេដ្ឋកិច្ចក្រៅប្រព័ន្ធ សម្ដេចកិត្តិសង្គហបណ្ឌិត ម៉ែន សំអន បានលើកឡើងថា «ការជួបជុំនាពេលនេះ បានបង្ហាញពីកម្លាំងរឹងមាំរបស់គណបក្សប្រជាជនកម្ពុជាក្នុងវិស័យសេដ្ឋកិច្ចក្រៅប្រព័ន្ធក្នុងរាជធានីភ្នំពេញ ដែលបានចងក្រង ពង្រឹង ពង្រីក រចនាសម្ព័ន្ធសមាជិក សមាជិកា របស់ខ្លួនរហូតមានសមាជិកសរុបចំនួនជាង ១,២០០០នាក់»។

ទន្ទឹមនឹងការលើកឡើងខាងលើ សម្ដេចកិត្តិសង្គហបណ្ឌិត បានយកឱកាសនៃជំនួបនេះ រំលឹកអំពីប្រវត្តិ សមិទ្ធផល និងស្នាដៃរបស់គណបក្សប្រជាជនកម្ពុជា ផ្ដើមចេញពីការរំដោះជាតិ បញ្ចប់សង្រ្គាម និងស្វែងរកសុខសន្តិភាពរហូតដល់ការកសាង និងអភិវឌ្ឍន៍ប្រទេស ពីមួយដំណាក់កាលទៅមួយដំណាក់កាល ជាពិសេសក្នុងដំណាក់កាលចុងក្រោយនៃការគ្រប់គ្រងការរីករាលដាលជំងឺកូវីដ១៩ និងភាពជោគជ័យក្នុងនាមជាម្ចាស់ផ្ទះព្រឹត្តិការណ៍ថ្នាក់តំបន់ និងអន្តរជាតិនានា។

សម្ដេចកិត្តិសង្គហបណ្ឌិត ក៏បានគូសបញ្ជាក់បន្ថែមអំពីការដឹកនាំប្រកបដោយភាពឈ្លាសវៃ គិតគូរគ្រប់ជ្រុងជ្រោយ និងចក្ខុវិស័យច្បាស់លាស់របស់គណៈបក្សប្រជាជន ព្រមទាំងការយកចិត្តទុកដាក់របស់សម្តេចតេជោនាយករដ្ឋមន្ត្រី ក្នុងការឆ្លើយតបនឹងតម្រូវការចាំបាច់នានាក្នុងវិស័យសេដ្ឋកិច្ចក្រៅប្រព័ន្ធផងដែរ។

ជាចុងបញ្ចប់ សម្តេចកិត្តិសង្គហបណ្ឌិត បានលើកទឹកចិត្តអោយសមាជិក សមាជិកាទាំងអស់ ត្រៀមខ្លួនចូលរួមបោះឆ្នោតនាពេលដ៏ខ្លីខាងមុខឱ្យបានគ្រប់ៗគ្នា ដោយបោះឆ្នោតជូនគណបក្សប្រជាជនកម្ពុជា ដើម្បីបន្តដឹកនាំប្រទេសជាតិ ឱ្យបានកាន់តែរីកចម្រើន ៕