ឯកឧត្តម ហ៊ុន ម៉ានី អញ្ជើញចូលរួមក្នុងពិធីអាហារសាមគ្គីជាមួយប្រតិភូកីឡាកម្ពុជាក្នុងព្រឹឹត្តិការណ៍ប្រកួតកីឡាអាស៊ានប៉ារ៉ាហ្គេមលើកទី១២                        

ភ្នំពេញ៖ កាលពីថ្ងៃទី២៧ ខែមិថុនា ឆ្នាំ២០២៣ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា និងជាប្រធានប្រតិភូកីឡាកម្ពុជា បានអញ្ជើញចូលរួមក្នុងពិធីអាហារសាមគ្គីជាមួយប្រតិភូកីឡាកម្ពុជាក្នុងព្រឹឹត្តិការណ៍ប្រកួតកីឡាអាស៊ានប៉ារ៉ាហ្គេមលើកទី១២ ឆ្នាំ២០២៣ នៅ ដឺព្រីមៀ សេនធ័រ សែនសុខ។

ពិធីនេះមានការអញ្ជើញចូលរួមពីសំណាក់ថ្នាក់ដឹកនាំ សិល្បៈករសិល្បៈការិនី និងក្រុមការងារពាក់ព័ន្ធនៃព្រឹត្តិការណ៍អាស៊ានប៉ារ៉ាហ្គេមលើកទី១២ ជាច្រើនរូបទៀត។

ក្រោមបរិយាកាសប្រកបដោយភាពរីករាយ ឯកឧត្តម ហ៊ុន ម៉ានី បានសម្តែងនូវសេចក្តីសោមនស្សរីករាយ ដែលបានចូលរួមក្នុងពិធីពិសារអាហារសាមគ្គីជាមួយអត្តពលិកនារសៀលនេះ ជាពិសេសឯកឧត្តមបានបង្ហាញនូវមោទនភាពចំពោះកម្ពុជា ក្នុងនាមជាម្ចាស់ផ្ទះនៃព្រឹត្តិការណ៍អាស៊ីអាគ្នេយ៍ តាមរយៈភាពជោគជ័យក្នុងការរៀបចំព្រឹត្តិការណ៍នេះ។ ភាពជោគជ័យនេះ បានសរបញ្ជាក់យ៉ាងច្បាស់ថា កម្ពុជាមានសមត្ថភាពក្នុងការទទួលស្វាគមន៍មិត្តភក្តិបរទេស និងមានលទ្ធភាពគ្រាប់គ្រាន់ក្នុងការរៀបចំការប្រកួតកីឡាថ្នាក់តំបន់ ថ្នាក់អាស៊ីអាគ្នេយ៍ និងព្រឹត្តិករណ៍សំខាន់ៗផ្សេងៗទៀតនាពេលខាងមុខផងដែរ។

ទន្ទឹមនឹងនេះ ឯកឧត្តម បានធ្វើការថ្លែងអំណរគុណដល់រាជរដ្ឋាភិបាលដែលបានសម្រេចចិត្តរៀបចំព្រឹត្តិការណ៍ដ៏មានអត្ថន័យមួយនេះ។

ឯកឧត្តមបានបន្តថ្លែងអំណរគុណដល់ អត្តពលិក និងគ្រូបង្វឹករបស់យើងដែលបានខិតខំប្រឹងប្រែងអស់ពីលទ្ធភាព ធ្វើយ៉ាងណាចូលរួមអោយបានគ្រប់វិញ្ញាសារដើម្បីតំណាងប្រទេស។

ឯកឧត្តមក៏បានថ្លែងអរគុណចំពោះភាគីពាក់ព័ន្ធ និងក្រុមការងារទាំងអស់ដែលបានចូលរួមក្នុងការធ្វើឱ្យព្រឹត្តិការណ៍នេះបញ្ចប់ទៅដោយរលូន ជាពិសេសបានបង្ហាញឱ្យមិត្តភក្តិបរទេសឃើញថា កម្ពុជាលើសពីមេដាយ និងលើសពីការប្រកួត ប៉ុន្តែជាការបង្ហាញពីមោទនភាព និងកិត្តិនាមជូនកម្ពុជា។

សូមជម្រាបដែរថា ពិធីអាហារសាមគ្គីនេះរៀបចំឡើងក្នុងគោលបំណងថ្លែងអំណរគុណដល់អត្តពលិក គ្រូបង្វឹក និងក្រុមការងារពាក់ព័ន្ធទាំងអស់ដែលបានខិតខំប្រឹងប្រែង លះបង់អស់ពីកម្លាំងកាយចិត្ត ដើម្បីចូលរួមធ្វើអោយព្រឹត្តិការណ៍ថ្នាក់តំបន់នេះប្រព្រឹត្តទៅដោយរលូន និងជោគជ័យ ជាពិសេសការថ្លែងអំណរដល់អត្តពលិកទាំងអស់ដែលបានខិតខំប្រឹងប្រែង ហ្វឹកហាត់ និងប្រកួតយ៉ាងស្វិតស្វាញដើម្បីទទួលបានជោគជ័យក្នុងការប្រកួតក្នុងនាមកីឡាកតំណាងជាតិ៕