ឧត្តមសេនីយ៍ទោ សោម ស៊ុន ដឹកនាំកិច្ចប្រជុំត្រួតពិនិត្យឡើងវិញ ផែនការសហប្រតិបត្តិការក្នុងកិច្ចការពារសន្តិសុខ សុវត្ថិភាពជូនបក្សនយោបាយ និងពលរដ្ឋក្នុងដំណើរការបោះឆ្នោត

ភ្នំពេញ៖ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ នៅថ្ងៃទី២៦ ខែមិថុនា ឆ្នាំ២០២៣ បានដឹកនាំកិច្ចប្រជុំត្រួតពិនិត្យឡើងវិញ ការត្រៀមចូលរួមអនុវត្តផែនការសហប្រតិបត្តិការការពារសន្តិសុខ សុវត្ថិភាព ជូនប្រជាពលរដ្ឋ និងគណបក្សនយោបាយនានា ដែលមានឈ្មោះក្នុងបញ្ជីបោះឆ្នោត ចូលរួមប្រកួតប្រជែងក្នុងការបោះឆ្នោតជ្រើសតាំងតំណាងរាស្ត្រនីតិកាលទី៧ ឆ្នាំ២០២៣ ដែលកិច្ចប្រជុំនេះប្រព្រឹត្តទៅនៅទីបញ្ជាការតំបន់ប្រតិបត្តិការសឹករងកំពង់ធំ ស្ថិតនៅភូមិថ្នល់បែក ឃុំត្រពាំងឬស្សី ស្រុកកំពង់ស្វាយ ខេត្តកំពង់ធំ ។

ឧត្តមសេនីយ៍ទោ សោម ស៊ុន បានបញ្ជាក់ថា យុទ្ធនាការឃោសនាបោះឆ្នោត ជ្រើសតាំងតំណាងរាស្រ្តនីតិកាលទី៧ នឹងត្រូវចាប់ផ្ដើមដំណើរការចាប់ពីថ្ងៃទី១ ខែកក្កដា ឆ្នាំ២០២៣ខាងមុខនេះ តទៅរហូតដល់ថ្ងៃថ្ងៃទី២១ ខែកក្កដា ឆ្នាំ២០២៣ ហើយនៅខេត្តកំពង់ធំ មានគណបក្សនយោបាយចូលរួមប្រកួតប្រជែងតាមលទ្ធិប្រជាធិបតេយ្យ ក្នុងការបោះឆ្នោតឆ្នាំជ្រើសតាំងតំណាងរាស្ត្រនីតិកាលទី៧ ឆ្នាំ២០២៣ មានចំនួន១៥ គណបក្សនយោបាយ លើចំនួនដែលមានឈ្មោះក្នុងប្រកួតប្រជែងនៅទូទាំងព្រះរាជាណាចក្រកម្ពុជា ដែលមានចំនួន ១៨ គណបក្សនយោបាយ ។ ហើយខេត្តកំពង់ធំមានចំនួន ១,១៥២ ការិយាល័យបោះឆ្នោត នៅតាមមូលដ្ឋាននានាទូទាំង៨១ឃុំ.សង្កាត់នៅក្នុងភូមិសាស្ត្រខេត្តកំពង់ធំ។

ឧត្តមសេនីយ៍ទោ សោម ស៊ុន បានណែនាំដល់មេបញ្ជាការគ្រប់កងឯកភាព និងគ្រប់ស្ថាប័នចំណុះ ត្រូវយកចិត្តទុកដាក់អនុវត្តឲ្យបានជោគជ័យ តាមផែនការសហប្រតិបត្តិការការពារសន្តិសុខ សុវត្ថិភាព និងអនុវត្តឱ្យបានម៉ឺងម៉ាត់តាមក្រមសីលធម៌សម្រាប់យោធិននៃកងយោធពលខេមរភូមិន្ទ និងនគរបាលជាតិ ព្រមទាំងភ្នាក់ងារសន្តិសុខក្នុងដំណើរការបោះឆ្នោត ដែលគណៈកម្មាធិការជាតិរៀបចំការបោះឆ្នោតបានកំណត់ ។

នៅក្នុងឱកាសនេះផងដែរ ឧត្តមសេនីយ៍ទោ សោម ស៊ុន ក៏បានអំពាវនាវដល់យោធិនគ្រប់រូប និងក្រុមគ្រួសារ ដែលមានឈ្មោះក្នុងបញ្ជីបោះឆ្នោត ត្រូវប្រុងប្រៀបឯកសារគ្រប់គ្រាន់ និងអញ្ជើញទៅបោះឆ្នោត នៅថ្ងៃទី២៣ ខែកក្កដា ឆ្នាំ២០២៣ ខាងមុខនេះឲ្យបានគ្រប់ៗគ្នាផងដែរ ។