កម្ពុជា-វៀតណាម ធ្វើពិធីផ្ទេរ ប្រគល់ ធ្វើមាតុភូមិនិវត្តន៍អដ្ឋិធាតុកងទ័ពស្ម័គ្រចិត្ត និងជំនាញការវៀតណាម ដែលលីជីវិតនាសម័យសង្គ្រាម ក្នុងភូមិសាស្ត្រខេត្តបាត់ដំបង
ភ្នំពេញ៖ លោកវរសេនីយ៍ឯក ភើយ លំអង មេបញ្ជាការស្តីទី តំបន់ប្រតិបត្តិការសឹករងបាត់ដំបង នៃព្រះរាជាណាចក្រកម្ពុជា និងលោកវរសេនីយ៍ឯក បំរ៉ុង ត្រឹង ជីកុង ប្រធានក្រុមការងាររុករក ជីកគាស់ K73 ខេត្តឡុងអាន នៃសាធារណរដ្ឋសង្គមនិយមវៀតណាម នៅថ្ងៃទី២៨ ខែមិថុនា ឆ្នាំ២០២៣ បានអញ្ជើញជាអធិបតីក្នុងពិធីបង្សុកូល ផ្ទេរ ប្រគល់ ធ្វើមាតុភូមិនិវត្តន៍អដ្ឋិធាតុកងទ័ពស្ម័គ្រចិត្ត និងជំនាញការវៀតណាម ដែលបានពលីជីវិត នាសម័យសង្រ្គាម ក្នុងភូមិសាស្រ្តខេត្តបាត់ដំបង នៅសាលប្រជុំទីបញ្ជាការ តំបន់ប្រតិបត្តិការសឹករង បាត់ដំបង អញ្ជើញចូលរួមមានលោក លោកស្រី មេបញ្ជាការរង លោកនាយសេនាធិការរង លោកនាយ នាយរង ការិយាយល័យ ផ្នែក និងក្រុមការងារ K73 ផងដែរ។
លោកវរសេនីយ៍ឯក ភើយ លំអង មេបញ្ជាការស្តីទី តំបន់ប្រតិបត្តិការសឹករង បាត់ដំបង បានថ្លែងថាចាប់ពីឆ្នាំ២០០៣រហូតមកដល់ជំហាន១ ដំណាក់កាលទី២២ ឆ្នាំ២០២៣ ក្រុមការងាររុករក ជីកគាស់អដ្ឋិធាតុកងទ័ពស្ម័គ្រចិត្ត និងជំនាញការវៀតណាម ក្នុងភូមិសាស្រ្តខេត្តបាត់ដំបង ទទួលបានលទ្ធផលចំនួន ៤៣៩អដ្ឋិធាតុ ព្រមទាំងបានធ្វើពិធីផ្ទេរប្រគល់ ធ្វើមាតុភូមិនិវត្តន៍យ៉ាងសមរម្យ និងរយៈពេលកន្លងមកថ្មីៗនេះ កិច្ចសហប្រតិបត្តិការរុករក ជីកគាស់ ជំហាន២ ដំណាក់កាលទី២២ រវាងក្រុមការងារ K73 និងតំបន់ប្រតិបត្តិការសឹករងបាត់ដំបង ចាប់ពីថ្ងៃទី២១ ខែកុម្ភៈ រហូតដល់ថ្ងៃទី២៨ ខែមិថុនា ឆ្នាំ២០២៣ ក្រុមការងារ K73 បានបន្តការងាររុករកយ៉ាងសកម្មច្រើនកន្លែង ទទួលបានលទ្ធផលចំនួន ៤១អដ្ឋិធាតុ។
លោកវរសេនីយ៍ឯក បំរ៉ុង ត្រឹង ជីកុង ប្រធានក្រុមការងារK73 បានថ្លែងអំណរគុណចំពោះរាជរដ្ឋាភិបាលកម្ពុជា អាជ្ញាធរដែនដីគ្រប់លំដាប់ថ្នាក់ កងកម្លាំងប្រដាប់អាវុធគ្រប់ប្រភេទ និងប្រជាពលរដ្ឋ ដែលបានសហការល្អក្នុងការជីករុករកអដ្ឋិធាតុកងទ័ពស្ម័គ្រចិត្តវៀតណាម ដើម្បីធ្វើមាតុភូមិនិវត្តន៍ទៅកាន់មាតុប្រទេសវិញ និងអរគុណដល់ក្រុមការងារ តំបន់ប្រតិបត្តិការសឹករងបាត់ដំបង ដែលបានជួយបង្កលក្ខណៈងាយស្រួលគ្រប់បែបយ៉ាងដល់ក្រុមការងាររុករកអដ្ឋិធាតុកងទ័ពស្ម័គ្រចិត្តវៀតណាមលើទឹកដីខេត្តបាត់ដំបង។
នៅក្នុងឱកាសនេះដែរ ភាគីទាំងពីរបានប្រគល់ជូននូវវត្ថុអនុស្សាវរីយ៍ ជូនគ្នាទៅវិញទៅមក និងបានជូនពរឱ្យចំណងសាមគ្គីភាព មិត្តភាពសហប្រតិបត្តិការរវាងកងទ័ពប្រជាជនទាំងពីរ កម្ពុជា-វៀតណាម ស្ថិតស្ថេរជានិច្ចនិរន្ត៕
