ឯកឧត្តម ស្វាយ សំអ៊ាង អញ្ជើញសម្ពោធដាក់ឲ្យប្រើប្រាស់នូវគម្រោងជួសជុលផ្លូវក្រាលក្រួសក្រហម ស្ថិតនៅភូមិច្រប់ ឃុំក្បាលរមាស ស្រុកសេសាន

ភ្នំពេញ៖ ឯកឧត្តម ស្វាយ សំអ៊ាង អភិបាល នៃគណៈអភិបាលខេត្តស្ទឹងត្រែង នាព្រឹកថ្ងៃទី២៩ ខែមិថុនា ឆ្នាំ២០២៣ បានអញ្ជើញជាអធិបតីក្នុងពិធីសម្ពោធដាក់ឲ្យប្រើប្រាស់នូវគម្រោងជួសជុលផ្លូវក្រាលក្រួសក្រហមប្រវែង ៦,៥៨០ម៉ែត្រ ទទឹង ៦ម៉ែត្រ (ដែលជាផ្លូវជាតិលេខ ៧៨ ចាស់) ដោយប្រើប្រាស់មូលនិធិស្រុក ឆ្នាំ២០២៣ ស្ថិតនៅភូមិច្រប់ ឃុំក្បាលរមាស ស្រុកសេសាន ខេត្តស្ទឹងត្រែង។ ដោយមានការអញ្ជើញចូលរួមពី ឯកឧត្តម លោកជំទាវ លោក លោកស្រី អភិបាលរងខេត្ត អភិបាលស្រុកសេសាន នឹងមន្ទីរអង្គភាពដែលពាក់ព័ន្ធជុំវិញខេត្តជាច្រើនរូបទៀត។

បន្ទាប់ពីសម្ពោធដាក់ឲ្យប្រើប្រាស់នូវគម្រោងជួសជុលផ្លូវក្រាលក្រួសក្រហមរួចមក ឯកឧត្តម ស្វាយ សំអ៊ាង បានបន្តដំណើរចុះត្រួតពិនិត្យលទ្ធភាពជាក់ស្ដែង ក្នុងការសាងសង់ស្ពានមួយកន្លែង ដើម្បីសម្រួលដល់ការធ្វើដំណើររបស់បងប្អូនប្រជាពលរដ្ឋដែលអាស្រ័យផលលើផ្លូវមួយខ្សែនេះ ក្នុងការដឹកជញ្ជូនកសិផលរបស់ពួកគាត់ទៅកាន់ទីផ្សារ ៕