អភិបាលខេត្តតាកែវ ណែនាំទៅដល់លោកគ្រូ អ្នកគ្រូ ត្រូវបណ្តុះគំនិតដល់សិស្សានុសិស្សទាំងអស់ ឱ្យបង្កើនទម្លាប់អានសៀវភៅឱ្យបានច្រើន
ភ្នំពេញ៖ ឯកឧត្តម អ៊ូច ភា អភិបាល នៃគណៈអភិបាលខេត្តតាកែវ នៅថ្ងៃទី២៨ ខែមិថុនា ឆ្នាំ២០២៣ បានអញ្ជើញជួបសំណេះសំណាលជាមួយ លោកគ្រូ-អ្នកគ្រូ និងនាំយកសៀវភៅចំណេះដឹងទូទៅជាង ២០០ក្បាល សម្រាប់ដាក់ក្នុងបណ្ណាល័យ នៃសាលាវិទ្យាល័យសុខភាពដូងខ្ពស់ សម្រាប់សិស្សានុសិស្សបានអាន ក្រោយទំនេរពីការសិក្សា។
ក្នុងឱកាសនោះដែរ ឯកឧត្តម អ៊ូច ភា អភិបាលខេត្ត បានមានប្រសាសន៍ដោយបានណែនាំបន្ថែមទៅដល់លោកគ្រូ- អ្នកគ្រូ ត្រូវបណ្តុះគំនិតដល់សិស្សានុសិស្សទាំងអស់ ឱ្យបង្កើនទម្លាប់អានសៀវភៅឱ្យបានច្រើន ព្រោះការអានសៀវភៅនេះហើយវានឹងបង្កើនចំណេះដឹងដល់សិស្សរបស់យើង ពិសេសគឺផ្តល់ដល់ពួកគាត់ឱ្យមានការយល់ដឹងកាន់តែច្បាស់អំពីសង្គម និងបច្ចេកវិទ្យាបច្ចុប្បន្នយើងនេះ។
ឯកឧត្តមអភិបាលខេត្ត ក៏បានបន្ថែមទៀតថា ទន្ទឹមនឹងការបណ្តុះទម្លាប់ដល់ពួកគាត់ឱ្យអានសៀវភៅហើយ សូមលោក-គ្រូអ្នកគ្រូទាំងអស់ ធ្វើការអប់រំណែនាំបន្ថែមទៀតដល់សិស្សានុសិស្សឱ្យក្លាយជាកូនល្អ សិស្សល្អ និងមិត្តល្អ ដោយមិនត្រូវធ្វើខ្លួនទៅជាក្មេងទំនើងនៅក្នុងសាលា ឬក្រៅសាលាជាដាច់ខាត ពោលគឺត្រូវតែខិតខំប្រឹងប្រែងរៀនសូត្រឱ្យបានខ្លាំងពូកែ ដើម្បីក្លាយជាសរសរទ្រូងប្រទេសជាតិនាថ្ងៃអនាគត ៕
