ឯកឧត្តម ឆាយ ថន រួមជាមួយឯកឧត្តម ហ៊ុន ម៉ានី បានបើកយុទ្ធនាការឃោសនាបោះឆ្នោតនៃការជ្រើសតាំងតំណាងរាស្រ្តនិតិកាលទី៧ ឆ្នាំ២០២៣ ជាមួយសមាជិកសមាជិកាគណបក្ស ប្រមាណ ៥ពាន់នាក់ នៅទីលានវិមានឯករាជ្យខេត្តកំពង់ស្ពឺ
ភ្នំពេញ៖ ឯកឧត្តមកិត្តិសេដ្ឋាបណ្ឌិត ឆាយ ថន សមាជិកអចិន្រ្តៃយ៍ និងជាប្រធានក្រុមការងារគណបក្សចុះជួយខេត្តកំពង់ស្ពឺ រួមជាមួយឯកឧត្តម ហ៊ុន ម៉ានី អនុប្រធានទី១ និងឯកឧត្តម លោកជំទាវអនុប្រធាន សមាជិក សមាជិកាក្រុមការងារចុះជួយខេត្ត ក្រុង-ស្រុក នៅថ្ងៃទី០១ ខែកក្កដា ឆ្នាំ២០២៣ បានអញ្ជើញអបអរសាទរខួបលើកទី ៧២ នៃបង្កើតគណបក្សប្រជាជនកម្ពុជា និងពិធីបើកយុទ្ធនាការឃោសនាបោះឆ្នោតនៃការជ្រើសតាំងតំណាងរាស្រ្តនិតិកាលទី៧ ឆ្នាំ២០២៣ ជាមួយសមាជិកសមាជិកាគណបក្ស ប្រមាណ ៥ពាន់នាក់ នៅទីលានវិមានឯករាជ្យខេត្តកំពង់ស្ពឺ។
មានប្រសាសន៍នាឱកាសនោះ ឯកឧត្តម ហ៊ុន ម៉ានី អនុប្រធានក្រុមការងារគណបក្សចុះជួយខេត្តកំពង់ស្ពឺ បានលើកឡើងថា បេសសកម្មរបស់គណបក្សប្រជាជន គឺដើម្បីបម្រើប្រជាជន និងតម្កល់ផលប្រយោជន៍ជាតិ។ ឯកឧត្តមបានមានប្រសាសន៍ថា គណបក្សប្រជាជន គឺជាគណបក្សដែលមានបទពិសោធន៏ ក្នុងការដឹកនាំប្រទេសដែលបច្ចុប្បន្នមានអាយុ ៧២ឆ្នាំហើយ។ ការចាប់ផ្តើមពីបាតដៃទទេរ រហូតមកយើងមានសមត្ថភាពដឹកនាំកិច្ចប្រជុំកំពូលធំៗ រៀបចំព្រឹត្តិការណ៍ប្រកួតកីឡាអាស៊ីអាគ្នេយ៍ គឺបានបង្ហាញអោយមិត្តបរទេសដឹងពីសក្តានុពល ស្នាមញញឹម ភាពកក់ក្តៅរបស់ប្រជាជនកម្ពុជា ដែលសមិទ្ធផលទាំងនេះស្ថិតក្រោមការដឹកនាំរបស់គណបក្សប្រជាជនរយៈពេល ៤៤ ឆ្នាំចុងក្រោយ។
ឯកឧត្តមក៏បានមានប្រសាសន៍សង្កត់ធ្ងន់ផងដែរថា គ្មានដំណាក់កាលណាមួយដែល គណបក្សប្រជាជនមិននៅជាមួយប្រជាជនឡើយ។
នាឱកាសនោះ ឯកឧត្តម បានអំពាវនាវអោយសមាជិក សមាជិកា ចូលរួមធ្វើយុទ្ធនាការនេះអោយបានផុលផុស ប្រកបដោយ សីលធម៌ ទំនួសខុសត្រូវ វិជ្ជាជីវៈ និងគោរពគោលការណ៍គ.ជ.ប. ដើម្បីធានាការឆ្ពោះទៅរកជ័យជន្នះ។
ឯកឧត្តមបានគូសបញ្ជាក់ផងដែរថា ការធ្វើយុទ្ធនាការបោះឆ្នោតនាថ្ងៃនេះគឺជាការអនុវត្តស្របតាមប្រតិទិននៃគណៈកម្មការបុណ្យជាតិ។ ក្នុងនាមជាគណបក្សប្រជាជនកម្ពុជា ក្នុងចំណោមគណបក្សផ្សេងៗទៀត គឺយើងគោរពលទ្ធិប្រជាធិបតេយ្យចូលរួមប្រកួតប្រជែងដើម្បីស្វែងរកប្រយោជន៍ជូនប្រទេសជាតិ និងប្រជាជនកម្ពុជា។
