ព្រះប្រធានគណបក្សហ៊្វុនស៊ិនប៉ិច យាងជាព្រះអធិបតីភាព បើកយុទ្ធនាការឃោសនាបោះឆ្នោតជ្រើសរើសតំណាងរាស្ត្រនីតិកាលទី៧ ឆ្នាំ២០២៣
ភ្នំពេញ៖ ព្រះអង្គម្ចាស់ នរោត្តម ចក្រាវុធ ព្រះប្រធានគណបក្សហ៊្វុនស៊ិនប៉ិច យាងជាព្រះអធិបតីភាពនៅក្នុងឱកាសបើកយុទ្ធនាការឃោសនាបោះឆ្នោតជ្រើសរើសតំណាងរាស្ត្រនីតិកាលទី៧ ឆ្នាំ២០២៣។
ពិធីនេះប្រព្រឹត្តទៅនាព្រឹកថ្ងៃអាទិត្យ ថ្ងៃទី២ ខែកក្កដា ឆ្នាំ២០២៣ នៅទីស្នាក់ការកណ្តាលគណបក្សហ៊្វុនស៊ិនប៉ិច ក្នុងសង្កាត់បឹងរាំង ខណ្ឌដូនពេញ រាជធានីភ្នំពេញ ដោយមានការចូលរួមពីសំណាក់ថ្នាក់ដឹកនាំ សមាជិក សមាជិកា យុវជន យុវនារី ព្រមទាំងសកម្មជនគណបក្សមកពីរាជធានីភ្នំពេញ ដែលមានអ្នកចូលរួមប្រមាណជាង ៥ ០០០នាក់។
បន្ទាប់ពីព្រះអង្គម្ចាស់ ព្រះប្រធាន បានមានព្រះបន្ទូលប្រកាសបើកពិធីយុទ្ធនាការឃោសនាបោះឆ្នោត អាណត្តិទី៧ នេះរួចមក ក្បួនដង្ហែបានចាប់ផ្តើមឡើងដោយរំលេចនូវ ទង់ជាតិ ទង់បក្សបក់រវិចៗជាមួយឯកសណ្ឋានព័ណ៌លឿងមាស យ៉ាងស្រស់ឆើតឆាយ អមជាមួយយានជំនិះដង្ហែ និងបដា ពាក្យស្លោក ព្រះឆាយាលក្ខណ៍ ព្រះអង្គម្ចាស់ នរោត្តម ចក្រាវុធ ព្រមបដាដែលមានគោលនយោបាយគណបក្សហ៊្វុនស៊ិនប៉ិច សម្រាប់នីតិកាលទី៧៕
ក្បួនដង្ហែរនេះដែរបានចាប់ផ្តើមចេញពីទីស្នាក់ការគណបក្ស ឆ្ពោះទៅកាន់បណ្តោយមហាវិថីព្រះសីហនុ បន្តតាមតីរវិថីព្រះស៊ីសុវត្ថិ មកក្រោមគល់ជ្រោយចង្វារ ឆ្ពោះទៅផ្លូវជាតិលេខ៥ រង្វល់គល់ស្ពានព្រែកភ្នៅ ឆ្ពោះមកស្ពានអាកាសផ្សារដីហុយ៕
