ឯកឧត្តមរដ្ឋមន្រ្តី ឌិត ទីណា ចុះទស្សនកិច្ចកសិដ្ឋានចិញ្ចឹមគោយកសាច់ នៅខេត្តត្បូងឃ្មុំ

ភ្នំពេញ៖ ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី០២ ខែកក្កដា ឆ្នាំ២០២៣ បានដឹកនាំគណប្រតិភូ ចុះធ្វើទស្សនកិច្ចកសិដ្ឋានចិញ្ចឹមគោយកសាច់ និងគោយកកូន ហ៊ត លាង ស្ថិតនៅភូមិរាម ឃុំចុងជាច ស្រុកតំបែរ ខេត្តត្បូងឃ្មុំ។

ក្នុងដំណើរទស្សនកិច្ចនេះ ឯកឧត្តមរដ្ឋមន្រ្តីក៏បានជួបសំណេះសំណាលជាមួយប្រជាពលរដ្ឋប្រមាណជិត ១០០នាក់ និងផ្តល់អនុសាសន៍ឲ្យបងប្អូន គិតគូរពីនិរន្តរភាពសេដ្ឋកិច្ច និងផែនការច្បាស់លាស់ក្នុងការពង្រីកការចិញ្ចឹមគោរបស់បងប្អូន បូករួមទាំងយុទ្ធសាស្ត្រ និងសមត្ថភាពដាំស្មៅជាចំណីគោ ពិនិត្យមេីលតម្រូវការទីផ្សារ ព្រមទាំងការកាត់បន្ថយចំណាយមិនចាំបាច់។ បន្ថែមពីនេះទៅទៀត ត្រូវមានការសហការ និងធ្វេីការរួមគ្នា និងប្រេីប្រាស់កិច្ចសន្យាកសិកម្ម ក្នុងការទិញលក់ជាដេីម។

ក្នុងឱកាសនេះដែរ ឯកឧត្តមរដ្ឋមន្ត្រី បានណែនាំឱ្យបង្កេីនទំនុកចិត្ត និងការជឿជាក់រវាងអ្នកលក់ និងអ្នកទិញ ដោយគិតគូរពីសុខភាព និងគុណភាពគោ ដោយមិនជំរុញការពង្រីកដែលគ្មានទីបញ្ចប់ឡេីយ។

សូមជម្រាបជូនថា លោក ហ៊ត លាង ជាអ្នកចិញ្ចឹមគោយកសាច់ និងគោយកកូន ដែលភាគច្រេីនជាគោពូជប្រាម៉ាន់ស និងក្រហម ហេីយបច្ចុប្បន្ននេះមានចំនួន ៧៨០ក្បាល បូករួមទាំងការដាំស្មៅចំនួន ១៣ហិចតា ៕