សហគមន៍ខ្មែរឥស្លាម ជាគោលដៅទេសចរណ៍ដ៏ទាក់ទាញមួយ ដែលបម្រើដល់វិស័យទេសចរណ៍ ពិសេសប្រភេទនៃទេសចរណ៍មូស្លីម
ភ្នំពេញ៖ ឯកឧត្ដម កាទើ មហាំម៉ាត់ណោសស្រ៊ី អនុរដ្ឋលេខាធិការ និងជាតំណាងដ៏ខ្ពង់ខ្ពស់ ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ នៅថ្ងៃទី២ ខែមិថុនា ឆ្នាំ២០២៣ បានចូលរួមជាអធិបតីក្នុងពិធីដាំកូនដើមឈើចំនួន 5000ដើម ក្រោមប្រធានបទ “យើងរួមគ្នាបង្កើតភូមិបៃតង” ដែលស្ថិតក្នុងនៅភូមិខ្ពប២ ឃុំស្វាយឃ្លាំង ស្រុកក្រូចឆ្មារ ខេត្តត្បូងឃ្មុំ ។ កម្មវិធីនេះក៏មានការចូលរួមពី លោក សយ ទូច អភិបាលនៃគណៈអភិបាលស្រុកក្រូចឆ្មារ និងលោក អឿន រិទ្ធ ប្រធានមន្ទីរទេសចរណ៍ខេត្តត្បូងឃ្មុំផងដែរ។
គោលបំណងសំខាន់នៃកម្មវិធីនេះ គឺប្រជាសហគមន៍ភូមិខ្ពប២ ចង់ដាំដើមឈើដើម្បីរៀបចំសោភ័ណភាពសហគមន៍របស់ពួកគាត់ ឱ្យប្រែក្លាយជាសហគមន៍បៃតងគំរូ និងជាពិសេសឱ្យទៅជាសហគមន៍ទេសចរណ៍មូស្លីម (Muslim Community Tourism) ដែលជាគោលដៅទេសចរណ៍មួយ ជាពិសេសទេសចរមូស្លីម ។ ខេត្តត្បូងឃ្មុំជាខេត្តដែលមានសក្តានុពលទេសចរណ៍ជាច្រើន ក្នុងនោះ ផលិតផលទេសចរណ៍នៅតាមសហគមន៍ខ្មែរឥស្លាម ក៏ចាត់ទុក និងអាចរៀបចំ ដើម្បីបម្រើដល់វិស័យទេសចរណ៍ ជាពិសេសទេសចរណ៍មូស្លីម ដោយសារមានផលិតផលជាច្រើនទាំងនោះមានប្រវត្តិ និងអាយុកាលយូរឆ្នាំមកម្ល៉េះ។
ឯកឧត្ដម កាទើ មហាំម៉ាត់ណោសស្រ៊ី បានគូសបញ្ជាក់អំពីកត្តាគន្លឹះសំខាន់នៃវិស័យទេសចរណ៍គឺ សុខសន្តិភាព ស្ថេរភាពនយោបាយ ព្រោះបើគ្មានសន្តិភាពទេ ក៏គ្មានទេសចរនោះដែរ ។ ក្នុងឱកាសនោះ ឯកឧត្ដម បានជម្រាបជូនអំពីស្ថានភាពទេសចរណ៍ក្នុងតំបន់ និងអន្តរជាតិផងដែរ និងជាពិសេសគោលនយោបាយថ្មីៗរបស់ក្រសួងទេសចរណ៍ក្នុងការទាក់ទាញទេសចរណ៍មូស្លីម មកកាន់គោលដៅកម្ពុជាបន្ថែមទៀត ។
ឯកឧត្ដម ក៏បានផ្តាំផ្ញើរធ្វើយ៉ាងណារៀបចំសហគមន៍ទេសចរណ៍មូស្លីម អោយមានភាពស្អាត និងបៃតង បដិសណ្ឋារកិច្ចល្អដើម្បីទទួលបាននូវភ្ញៀវទេសចរមកកាន់គោលដៅសហគមន៍ខ្ពប២ ឱ្យកាន់តែច្រើន និងជំរុញអោយមានយុទ្ធនាការ “ទេសចរម្នាក់ ដើមឈើមួយដើម” ៕
