ឯកឧត្តម អ៊ាង សុផល្លែត៖ គោកទី ជាតំបន់មួយដែលរំលឹកពីវិរៈភាព និងប្រវត្តិតស៊ូរបស់សម្តេចថ្នាក់ដឹកនាំ ដែលជាគំរូ និងនិមិត្តរូប នៃចំណុចផ្តើមការកសាងសន្តិភាព និងការអភិវឌ្ឃ

ភ្នំពេញ៖ យើងត្រូវស្វែងយល់ច្បាស់ពីប្រវត្តិសាស្ត្រ ហើយប្រើប្រាស់សច្ចភាពប្រវត្តិសាស្ត្រ ជាមូលដ្ឋានក្នុងការសម្រេចចិត្តនាពេលបច្ចុប្បន្ន និងអនាគត។
ឯកឧត្តម អ៊ាង សុផល្លែត បានលើកឡើងបែបនេះ ក្នុងពិធីជួបសំណេះសំណាល ជាមួយប្រជាពលរដ្ឋ សមាជិក សមាជិកា គណបក្សប្រជាជនកម្ពុជាមកពីភូមិគោកទី និងភូមិស្រឡុង នាថ្ងៃទី០៨ ខែកក្កដា ឆ្នាំ២០២៣ នៅក្នុងភូមិគោកទី ឃុំចក ស្រុកអូររាំងឪ ខេត្តត្បូងឃ្មុំ។

លើសពីនេះទៀត ឯកឧត្តមក៏បានរំលឹកពីប្រវត្តិភូមិគោកទី ឬតំបន់ពោធិ៍កំបោរ កាលពីសម័យប៉ុលពត ជាតំបន់មួយដែលសម្តេចអគ្គមហាសេនាបតីតេជោ ហ៊ុន សែន , សម្តេចអគ្គមហាធម្មពោធិសាល ជា ស៊ីម, សម្តេចអគ្គមហាពញាចក្រី ហេង សំរិន, សម្តេចក្រឡាហោម ស ខេង ធ្លាប់មានអនុស្សាវរីយ៍ឆ្លងកាត់ និងប្រើប្រាស់ជាមូលដ្ឋានក្នុងការតស៊ូ ដើម្បីឈានទៅរកការផ្តួលរំលំរបបប្រល័យពូជសាសន៍ ប៉ុល ពត។ លើសពីនេះទៀតនៅតំបន់នេះមានទីតាំងមួយកន្លែង ដែលពួកខ្មែរក្រហមបានយកប្រជាជនមកសម្លាប់ ដែលបច្ចុប្បន្ននេះផ្លែផ្កាសន្តិភាព បានផ្តល់ឱកាសឱ្យប្រជាពលរដ្ឋ និងសប្បុរសជនមានលទ្ធភាពកសាងចេតិយនៅទីតាំងនោះ ដើម្បីឧទ្ទិសដល់វិញ្ញាណក្ខ័ន្ធអ្នកបានស្លាប់។

ក្នុងឱកាសនេះដែរ ឯកឧត្តមប្រធាន បានណែនាំដល់សមាជិក សមាជិកាទាំងអស់៖
– រួបរួមគ្នាថែរក្សាសន្តិភាពដែលយើងមាន ដែលរកបានដោយលំបាក
– រួមគ្នាថែរក្សាសមិទ្ធនានាដែលរាជរដ្ឋាភិបាល គណបក្សប្រជាជនកម្ពុជា ក៏ដូចជាក្រុមការងារបានកសាងឡើង ដើម្បីទុកឱកាសដល់ក្មេងជំនាន់ក្រោយ និងឈានឆ្ពោះទៅកាន់ការអភិវឌ្ឍបន្ថែមទៀត

– ពីរបៀបគូសសន្លឹកឆ្នោតឱ្យបានត្រឹមត្រូវ ត្រៀមឯកសារ ដែលពាក់ព័ន្ធនឹងការបោះឆ្នោត ដូចជា ៖ អត្តសញ្ញាណបណ្ណសញ្ជាតិខ្មែរ ឯកសារបញ្ជាក់អត្តសញ្ញាណ បម្រើឱ្យការបោះឆ្នោត ដើម្បីទៅបោះឆ្នោត និងសូមបោះឆ្នោតជូនគណបក្សប្រជាជនកម្ពុជា ដែលមានរូបសញ្ញាទេវតាបាចផ្កាជាសម្គាល់ លេខរៀងទី១៨ ដើម្បីថែរក្សាសន្តិភាព និង បន្តការអភិវឌ្ឍក្នុងសន្តិភាពទាំងអស់គ្នា ៕